Read Angguruk Yali 2 RAJA-RAJA 7 Bible Online

2 RAJA-RAJA 7 - Angguruk Yali bible

2 RAJA-RAJA 7

¹Hiyag itfagma Elisa inowen hiyag utuk lit, ”NINIKNI Allah ele iminon tu holeg lamin! O sono tiya hagma o pumbuk tu fam ayeg waroho waruk ambeg roti anggen mondabi fanowon sum misig fahet uang perak misig fam eneg, roti anggen we tot fanowon sum piren fahet oho uang perak misig fam eneg onggo paltukmu yet isahun,” ulug hiyag itfag.

²Hiyag itfagma ap suwon let turukon inowen Elisa fam hebeloho hiyag utuk lit, ”NINIKNI Allahn ketiya eneg osit humon poholman pilabik walep halug oho haren ehenon ari teko lelep fug peruk lahi,” ulug hiyag itfag. Hiyag itfagma Elisa inowen te, ”We tik-tem toho teko larukmu hat hilen yet hahun angge famen nungge-nungge nahun fug,” ibag.

³Ari ibareg weregman ap uhan enehap salukangge rohon elehet o Samaria walinggoho ohowon sokolma wereg lit it-it enele uruk lit, ”Nungge fahet nit tuma heriyegman eneg war amul?

⁴Nit o pumbukmu kul halug oho suburu oboken war amul. Tuma heriyeg lit welamul halug oho war amul. Ari fahet nit Siria inaben o sabo wiroho wereg ambeg luk ohon! Enembeg lulmu nunusulusa halug war amul, nunumbahalusa halug nonoluk welamulen maniyek!” uruk latfag.

⁵Uruk latfareg weregman o hup arik ohoma ap uhan itano in atfareg Siria inaben o sabo wiroho wereg ambeg libag. O sabo horog toho laruk lit yet harukmen Siria inap enebe elegma yet isibag.

⁶NINIKNI Allahn Siria inap sehen senehon arimano enekolap eneptukmu it arimanowen hol harukmen sehen seneg inap anggolo roho kereta wam kudan lisoho walug laruk angge fam lahibareg aplohok hum toho il waharukmu hol hibareg ap ekeyen eke fam ele uruk lit, ”Israel inap onowe suwon inowen Het inap onowesi men Mesir inap onowesi men unubam onggo og hisaminen Siria inap ambiyeg unusik lul ulug wol eneptisimu nunusuk oho waharuk,” uruk latfag.

⁷Ari uruk lit sinal ele fene Siria inap obog toho in atfareg wam kuda men keledai men o saboma ino lin isalug nenebe nunusuk nowen ulug linggik-longgo ibag.

⁸Linggik-longgo ibagma ap uhan enehap salukangge rohon itano o sabo eke fam kibareg suburu men ik men lin isibahon arimano naruk latfag. Nibareg emas umbagpag turuk angge men perak ili ruruk angge men sum embeselug libahon arimano hilibareg hiraho fik lalug nin suhuloho o sabo winon fam kibareg imbisibahon winon oho hilalug hiraho fik libag.

⁹Hiraho fik libareg it-it enele uruk lit, ”Nori, niren turuk laheyon aru siyag ane turuk lahe. O yoho ap obog tohowen wene fanowon ari holtep angge famen nungge fahet niren hiyag isa lahe fug? Nit nohulteg sono likiya eneg hiyag isahuk halug alem angginon nit nunubam umbuhup tohon ketiya nit lulteg ap suwon ambeg hiyag umulen luk ohon maniyek!” ibag.

¹⁰Ari ibareg o pumbukmu lul ulug laruk lit elehet o pumbuk walinggoho ohowon sok foroho inap unubam enele hi roho hiyag isaruk lit, ”Siria inaben o sabo wiroho wereg ambeg lahereg yet harukmen ap elegman we wam kuda men keledai men owahalma ililigmu o sabo oho lin isalug ap enebe eneg linggik-longgo ehesa,” ulug hiyag isibag.

¹¹Hiyag isibag ane ino sok foroho inaben holfareg ap winonen oho holukag ulug enele hi roho urukmu ap ekeyen hol hibareg ap suwon hiyag irik libag.

¹²Hubanggo ap suwon ino nohorukmu hiyag irik libagma in atfareg otsi fam hiyag isaruk lit, ”Siria inap lahason ari alem nungge fahet lahasa ulug anden seleg toho hiyag hisamin. Nit suburu obok toho welaheyon it onoluk toho wereg lit o saboman wilip ahasareg anggenma hirag arik lahasa. Lahasa ane ari it inindimuwen Israel inap o pumbuk Samarian wilip atlug waharuk isalug onoluk angge sen enebulteg nit o pumbuk ino fam kul ulug lahasa,” ulug hiyag isibag.

¹³Hiyag isibagma ot misihen ele uruk lit, ”Nikni, nonori anggolo tam war atusa hag toho nit o pumbuk tu fam nonoluk welaheyon aruma oho war am hag toho welahereg aben wam kuda we tot onoluk werehon enesehelimuwon fuwaben wak lalusareg wam kuda fam lahalug it wilip ahasa ambeg pen ha lalusan ap mon enepmihin,” ibag.

¹⁴Ari ibagma kereta wam kudan lisoho walug laruk angge piren wak libagma ap suwon inowen, ”Kereta fam lahalug Siria inap sehen senehon onombolim mug eneplug lalihipteg pen isa lalihip,” ulug ap mon enepfag.

¹⁵Mon enepfag inap arimano Siria inap unuyug mug eneplug Yordan ikma laruk lit yet harukmen Siria inap linggik-longgo uruk lit sum men enenggengge men obog toho kalem ke hik-hak isil libahon arimano anggolo weregma yet hibag. Yet hibag ane ari ap mon enepfahon arimanowen ap suwon hiyag irik libag.

¹⁶Hiyag irik libagma o Samaria inap obog toho wilip atfareg o sabo Siria inaben lin isibahon arimano fam kibareg iren lin isibag angge arimano huhulangge hilibag. Hilibag angge arimano inibam walug watfareg ayeg waroho waruk lit NINIKNI Allahn ibag ane hikit toho roti anggen mondabi fanowon sum misig fahet uang perak misig fam eneg, roti anggen we tot fanowon sum piren fahet oho uang perak misig fam eneg onggo paltuk latfag.

¹⁷Onggo apma roho paltuk latfag li ap suwon inowen at let turukon ino sok foroho laruhun ulug imbibagma ap ino elehet o pumbuk walinggoho ohowon sok ino foroho lit weregman sok iraham onggo paloho hilil laruk inap arimano unuyuhen ap ino sobit-sabar isalug laruk latfagma Elisan ap suwon at ambeg watfag sambil ibag ane hikit toho ap ino war atfag.

¹⁸Alem ari uwan teko la fugmu Elisa inowen ap suwon fam hiyag utuk lit, ”O sono tiya hagma o pumbuk tu fam ayeg waroho waruk ambeg roti anggen mondabi fanowon sum misig fahet uang perak misig fam eneg, roti anggen we tot fanowon sum piren fahet oho uang perak misig fam eneg onggo paltukmu yet isahun,” ulug hiyag itfag.

¹⁹Hiyag itfagma ap suwon let turukon inowen Elisa fam ele uruk lit, ”NINIKNI Allahn ketiya eneg osit humon poholman pilabik walep halug oho haren ehenon ari teko lelep fug peruk lahi,” ulug hiyag itfag. Hiyag itfagma Elisa inowen te, ”We tik-tem toho teko larukmu hat hilen yet hahun angge famen nungge-nungge nahun fug,” ibag.

²⁰Ibag ane ino hikit toho ap arimanowen ap suwon let turukon ino unuyuhen sobit-sabar isalug laruk latfagma ap ino sok iraham itano war atfag.