Read Angguruk Yali 2 RAJA-RAJA 8 Bible Online

2 RAJA-RAJA 8 - Angguruk Yali bible

2 RAJA-RAJA 8

¹O misihim sambil Allah amingmingangge Elisa inowen o Sunem hiyap amloho war atfagma Elisan olukap tibahon isinga fam ele uruk lit, ”NINIKNI Allahn suburu obok humon monde fik waruhumu kinang tu fam weregman eneg mo ilig am wirig am turukmu sabiren aruhu. Ari fahet hat hibam werehon men o winama lahupteg welamuhup,” ulug hiyag itfag.

²Hiyag itfag ane ari hikit toho hiyap ino ibam werehon men libareg o Filistin kinang fam weregman eneg mo sabiren libag.

³Libagma hiyap ino suhuloho ibam watfareg ibam men angginang men at o Filistin kinangma libag li ap ekeyen seneg latfahon ino suhuloho og numag ulug ap suwon fam heng tik libag.

⁴Heng tik libag sambil ino Elisa amingmingangge Gehazi ino ap suwon ambeg libagma ap suwonen at ubam ele uruk lit, ”Hikni Elisa inowen ine roho turuk latisi ane obog toho hiyag nimin,” ibag.

⁵Ibagma Gehazi inowen malik war atfahon Elisan olukap tibag ane ari ap suwon fam tintil turukmen malik olukap tibahon isinga ino nibam men nangginang men fahet heng timin ulug ap suwon ambeg watfag. Waharukmu Gehazi inowen ap suwon fam, ”Nikni hat ap suwon, hiyap ihiyon ari men amloho war atisimu Elisan olukap tirisiyon ino men hambeg wahasama yet isimin,” ibag.

⁶Ibagma ap suwon inowen hiyap ino fam, ”Hat hubam teko larisi ane hiyag nimin,” ibagma hiyap inowen hiyag itfagma ap suwon inowen amingmingangge eke fam ele uruk lit, ”Hiyap aru men lalihipteg at anggengge men angginang fam yatuk latusa ane hikit toho onggo og umuhuben at angginang seneg latusa inap hiyag isamihin,” ulug hiyag itfag ane hikit toho tibag.

⁷Welatfagma Elisa o Damsyik libag. Libag li o Siria inap onowe suwon Benhadad ino ouk warukmu aben at ubam, ”Allah amingmingangge Elisa ino o Damsyik wahareg wereg,” ulug hiyag itfag.

⁸Hiyag itfagma ap suwon inowen hun Hazael fam, ”Fano-fano angge walug lamihinteg an fahet fano aruhu ano ulug NINIKNI Allah kapal hamisiyen Allah amingmingangge ambeg lamihin,” ulug hiyag itfag.

⁹Hiyag itfagma Hazael inowen fano-fano angge eke hag eke hag o Damsyik welatfahon wibareg wam unta teng misigmen nubam hilag nuwalen 40 palimu imbik lahalug Elisa ambeg libareg at ubam ele uruk lit, ”Hat hamloho Benhadad o Siria inap onowe suwon ouk ubam werehon ino eleg aruhu ano ulug anden hat kapal hiyaminen hambeg mon nabik waha,” ulug hiyag itfag.

¹⁰Hiyag itfagma Elisa inowen, ”Lamihinteg fano aruhun ulug hiyag itmihin,” ibareg nin hiyag utuk lit, ”Ari imihin angge famen NINIKNI Allahn fulu roho hiyag nutuk lit, ’We tem toho war aruhu,’ irisi,” ulug hiyag itfag.

¹¹Ari ulug hiyag itfareg Allah amingmingangge Elisa ino indi angginen orohole hilik teg lit tot amusun toho ebe lebe ruk fug angge welatfareg uba yatuk latfag.

¹²Uba yatukmu yet hibareg Hazael inowen, ”Nikni, nungge fahet uba yatuk lahen?” ulug kapal hibagma Elisa inowen, ”Haren Israel inap siyahap enebil laruk laruhunon an noluk. Haren it inibam pumbuk elehet walinggoho werehon arimano harep pisatil, ap kabiniyon karog fam unusil, malik fuwon ununggul arap toho unusil, hiyap malik forohowon enehum pilang heheg unusil laruk laruhun,” ulug hiyag itfag.

¹³Hiyag itfagma Hazael inowen, ”An mene siyahon hag toho welahiyonen nangginoho alem suwon ehenon ari turuk laruhuk?” ibagma Elisa inowen, ”O Siria inap onowe suwon lahaku ulug NINIKNI Allahn hat fahet fulu roho hiyag nitisi,” ibag.

¹⁴Ari ibagma Hazael ino Elisa embeselug ikni Benhadad ambeg libagma Benhadad inowen, ”Hun Elisan nungge ehek?” ulug kapal hibagma Hazael inowen, ”Tem toho fano aruhun imihin ehek,” ulug hiyag itfag.

¹⁵Likiyamon Hazael inowen sum eke ik fam yuhuloho wibareg ap suwon ambeg libareg war amag ulug ap suwon orohole sum ik yuhulfahon fam hondo ribibagma war atfag. War atfagma Hazael ino Benhadad ubalma ap suwon lahibag.

¹⁶Hun Ahab amloho Yoram inowen Israel inap fet enesugmen eneg mo ilig am wirig am turukmu fuwaben atfagma Yosafat amloho Yoram amuwon ino ap suwon lahibareg ikni uwan war am fugmu iraham wereg lit Yehuda inap fet enesug latfag.

¹⁷Yoram indag tibag sali mo ilig am wirig am turukmen teng misigmen nubam hilag fuwaben 32 atfagma ap suwon lahibareg o Yerusalem wereg lit Yehuda inap fet enesugmen eneg mo likinen libag.

¹⁸Yoram inowen ap suwon Ahab ahaloho eke hilibareg Ahab umalikisi menen Israel inap onowesi tam welatfahon onombolim laruk lit siyag ane til-wil laruk latfag hag toho Yoram inowen oho NINIKNI Allahn siyag perukon eneg turuk latfag.

¹⁹Ari roho turuk latfag angge famen NINIKNI Allahn Daud ubam haren enderuhunonen endebuhubon ap suwon eneg weregman eneg mondabi welamuhup ulug sali imbibahon fahet wenggel haruk lit Yehuda kinang siyahap tibag fug.

²⁰Yoram ino Yehuda inap onowe suwon weregma Edom inap arimanowen Yehuda inap enepma welamuhuk fug ulug wenggel hibareg Edom ahun eke ap suwon raja lahapfag.

²¹Lahapfagma Yoram inowen Edom inap arimano nin apmayap enebuhuk ulug kereta wam kudan lisoho walug laruk angge obog toho walug o pumbuk Zair libag. Libagma Edom inaben at men kereta walug watfahon men waling enebik watfareg weregman hubanggo in atfareg Edom inap unusurukmu enekolen linggik-longgo uruk lit inibam libag.

²²Ari roho tibag angge famen fobik Edom inap arimano Yehuda inap enepma welamuhuk fug ulug enemu in atfareg weregman eneg ketiya oho Yehuda inap enepma wereg eleg. Edom inap enemu in atfag li o Libna inap oho enemu in atfag.

²³Yoram oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho suwesingga Yehuda inap onowesi suwonen turuk latfag ane fahet haharehon fam paloho imbibag.

²⁴Welatfareg war atfagma Yoram ino umbasi o pumbuk unuk Daud suwalehon fam sal eneptuk latfag ambeg ar oho salfag. Salfagma amloho Ahazia ikni ubalma ap suwon lahibag.

²⁵Hun Ahab amloho Yoram inowen Israel inap fet enesugmen eneg mo ilig am wirig am turukmu nisanggowen atfagma Yoram amuwon amloho Ahazia Yehuda inap onowe suwon lahibag.

²⁶Ahazia indag atfag sali mo ilig am wirig am turukmen falfalik fimahen 22 atfagma ap suwon lahibareg o Yerusalem wereg lit Yehuda inap fet enesugmen mo misig libag. Ahazia isinga Israel inap onowe suwon Omri amloho Ahab inowen indag tibahon unuk Atalia welatfag.

²⁷Ahazia ino hun Ahab ahalohowen indag tibahon wereg lit Ahab umalikisi menen NINIKNI Allahn siyag perukon eneg turuk latfag hag toho aren oho it onombolim laruk lit siyag ane eneg til-wil laruk latfag.

²⁸Ahazia ino men Israel inap onowe suwon Yoram men ambiyeg o Gilead kinangma libareg o pumbuk Ramot horogman Siria inap onowe suwon Hazael men tog aptukmen Siria inaben Yoram tog sinat watfag.

²⁹Tog sinat watfagma Yoramen yowilangge nubam werehon hihit nabukag ulug o Yizreel libareg ouk waruk lit weregma Yehuda inap onowe Ahazia inowen pen ha watfag.