Read Angguruk Yali 2 RAJA-RAJA 9 Bible Online

2 RAJA-RAJA 9 - Angguruk Yali bible

2 RAJA-RAJA 9

¹Welatfagma Allah amingmingangge nabi Elisa inowen otsi nabi enesehelimuwon eke wol tibareg hiyag utuk lit, ”E zaitun ahaluwe kubag aru wamihinteg folo-folo o pumbuk Ramot Gilead kinangma lamihin.

²O Ramot inowen hun Nimsi amloho Yosafat inowen indag tibahon Yehu ino yami rik lahunteg hiyahakun halug ori enesehelimu heriyegman wol tuhunteg at men hili undamon fam kuhup.

³Kuhupteg kubag walug lahunon ino oko e zaitun ahaluwe Yehu unggulmu hilili fuhunteg hele uruk lit, ’NINIKNI Allahn ele urukon tu: E ahaluwe tu feneyen Anden hat Israel inap onowe suwon welaruhun ulug lahap haptuk lahi,’ uhun. Ari uhunteg sok husoho folo-folo wilip atug lahun,” ulug hiyag itfag.

⁴Hiyag itfagma nabi kabiniyon ino o Ramot-Gilead libag.

⁵Libareg hun Yehu men ori sehen seneg inap onowesi arimano menen enele sahaltuk lit heriyegma yet isibareg nabi inowen, ”Nikni, hat onowe roho welahenon, nele hiyag hitminen wahi,” ibag. Ibagma Yehu inowen, ”Nit sehelimuwon sa hiyag itmin ulug wahen?” ibagma nabi inowen, ”Hat onowe roho welahenon hiyag hitminen wahi,” ibag.

⁶Ibagma Yehu in atfareg nabi ino men hili undamon fam kibag. Kibareg nabi inowen kubag walug watfahon ino oko e zaitun ahaluwe Yehu unggulmu hilili fibareg ele uruk lit, ”Israel ninap NINIKNI Allahn ele urukon tu, ’E ahaluwe tu feneyen Anden hat An numalikisi Israel inap onowe suwon welaruhun ulug lahap haptuk lahi.

⁷Ap suwon lahakunteg hat hikni Yoram men umbusag Ahaben ondohowonen ondohowon winon men unusuhun. It obog toho unusuhun ane ari feneyen Ahab uhe Izebel inowen An namingmingangge nabi men An nele holtuk latfahon obog toho men unusibag ane fahet Ahaben ondohowonen ondohowon obog toho Anden unusuhuk.

⁸Unusuhukmu aren ondohowonen ondohowon ap eneg enebe suwonet toronet obog toho eleg amuhupmu misig oho Israel kinangma welaruhu fug.

⁹Anden hun Nebat amloho Yerobeam inowen ondohowonen ondohowon men hun Ahia amloho Baesa inowen ondohowonen ondohowon men siyahap eneptik iyag hag toho ir oho mondabi siyahap enebuhuk.

¹⁰He Izebel wareg angge o Yizreel anggenma umbusuhupmu meneyen kiyal heheg nahup,” ulug hiyag itfag. Hiyag itfareg nabi inowen aben sen nabuhup tohon ulug folo-folo sok husoho wilip atug libag.

¹¹Yehu ino ori ambeg suhuloho watfagma iren, ”Hat fano welahen? Ap nenek turukon ari alem nungge fahet pen hiya waha?” ulug kapal hibagma Yehu inowen, ”Ap ubabut ari hahonen sibiling-sibiling ane uruk angge re hit honoluk,” ibag.

¹²Ibagma iren, ”Hele si ane uk fug! Fag toho hiyag nisimin!” ulug hiyag itfagma aren, ”Tu men ari men hiyag nutuk lit, ’NINIKNI Allahn ele urukon tu, ’Anden hat Israel inap onowe suwon welaruhun ulug lahap haptuk lahi,’ ehek,” ulug hiyag isibag.

¹³Hiyag isibagma itano ori obog tohowen enesum wan teg latfahon nonggoloho Yehu alukema yal o ino pila roho kuruk ambeg tuwale fibareg pinggong ele hum toho watuk lit enele hi roho, ”Yehu nit nonowe suwon lahakek,” uruk latfag.

¹⁴Ari ibag sambilen tulug Yehu inowen ap suwon Yoram apmayap tuhuk ulug wenggel haruk latfag. Ari obog toho uwan teko la fugmu Yoram ino umalikisi Israel inap sehen senehon obog toho menen o Siria inap onowe suwon Hazael yanggaluhuk ulug o Ramot Gilead kinangma libag.

¹⁵Libareg tog aptukmen o Siria inaben Yoram tog sinat watfagma Yoram ino yowilangge nubam werehon hihit nabukag ulug o Yizreel libareg welatfag. Weregma Elisa ot ekeyen Yehu ino ap suwon lahapfagma Yehu inowen ele uruk lit, ”Hiren an ap suwon lahakukon fahet fano peruk lahep halug ap misig oho o Yizreel hiyag isa lamin ulug o Ramot tuman lamisi fug,” ibag.

¹⁶Yehu ino kereta wam kudan lisoho walug laruk angge emberimu lahalug ap suwon Yoram ouk waruk lit welatfag ambeg o Yizreel libag. Libag li Yehuda inap onowe suwon Ahazia ino oho Yoram pen ha watfareg welatfag.

¹⁷Weregma ap o pumbuk foroho ahun eke o yaron fam lahalug ap yet isaruk ambeg unduhuk lit yet harukmen Yehu otsi luhaloho waharukmu yet isibareg ele hi roho, ”Ap mondoko waharukmu yet isaruk lahi,” ibagma Yoram inowen ap ino hiyag utuk lit, ”Ap eke wam kuda fam lahalug it onolohotma lamisiyen hiyag itmihin. Lamisireg it unubam hinindi fano roho wahep ano ulug kapal isa lawag,” ibag.

¹⁸Ibagma ap eke wam kuda fam lahalug it onolohotma libareg Yehu fam ele uruk lit, ”Ninikni ap suwon inowen, ’Hinindi fano roho wahep?’ ulug kapal hisaruk,” ibagma Yehu inowen, ”Inindi fano roho wahasa ano ulug nungge fahet kapal niya wahen? An men lulen ma!” ulug hiyag itfagma ap ino hebeloho Yehu ombolim libag. Libagma yet hibareg ap o pumbuk foroho ahunen, ”Ap monde fihiyon ino enembeg laha angge famen suhuloho waharuk eleg,” ibag.

¹⁹Ibareg ap eke monde fibagma libareg it unubam ele uruk lit, ”Ap suwon inowen hinindi fano roho wahep ulug kapal hisaruk,” ibagma Yehu inowen, ”Inindi fano roho wahasa ano ulug nungge fahet kapal niya wahen? An men lulen ma!” ulug hiyag itfagma ap ino hebeloho Yehu ombolim libag.

²⁰Libagma ap o pumbuk foroho ahunen, ”Ap monde fihiyon ino enembeg laha angge famen suhuloho waharuk eleg,” ibareg nin ele uruk lit, ”Anden it waharukon yet isarukmen it onowe kereta wam kudan lisoho walug laruk angge fam laruk ane ari hun Nimsi umbusag Yehu ino nenek turuk lit laruk ane hikit toho waharuk,” ibag.

²¹Ibagma Yoram inowen, ”An laminen kereta anden tohon walug maniyek!” ulug hiyag isibag ane hikit toho walug watfagma Israel inap onowe suwon Yoram men Yehuda inap onowe Ahazia men wal taneg kereta iren tohon fam lahalug Yehu o Yizreel ahun Nabot angginang fam weregma libag.

²²Libareg Yoram inowen Yehu yet halug at ubam, ”Hindi fano roho wahen?” ulug kapal hibagma Yehu inowen, ”Hat hisingan pamongge watuk lit usane til-wil larukmu yet haruk lit an nindi fano roho wahi fug,” ibag.

²³Ibagma itano Yoram inowen ele hi roho Ahazia fam, ”Nunusimin ulug waha,” uruk lit an nuwaruhu rohon folo-folo lamin ulug hebel atukmen

²⁴Yehu inowen sehen wibareg tog ine roho pising tibagma Yoram ahulim honggoleg keyen ahako folok toho tog ambiyang amigmu wilip atfagma Yoram ino kereta fam unduhukmen fuk toho wambibareg war atfag.

²⁵War atfagma Yehu inowen ot at let turukon Bidkar fam ele uruk lit, ”NINIKNI Allahn indam Yoram ikni Ahab fam hiyag itfag ane hat holuk? O ino sambil an men hat men kereta piren fam lahalug Ahab ombolim larukmu NINIKNI Allahn hiyag utuk lit, ’Sono eneg haren perikin ane hikit toho hun Nabot umalikisi men unusurukmu yet isarikik. Ari fahet Anden Nabot angginang tu famen alem angginon hubam umbuhuk,’ ibag. NINIKNI Allahn ibag ane ari hikir amag ulug haren Yoram wareg angge wamihinteg Nabot iyabukmu hik isa lamihin,” ulug hiyag itfag.

²⁶

²⁷Ari turukmu yet hibareg Yehuda inap onowe suwon Ahazia ino longgo imin ulug o Bet-Hagan fil larukmu Yehu inowen muko laruk lit, ”Ar oho ware fisiyek!” ulug otsi hiyag isibagma Ahazia ino kereta fam o Yibleam horogma o Gur fil laharuk ke larukmu tog sinat watfag. Tog sinat watfagma Yoram o Megido libareg war atfag.

²⁸War atfagma Ahazia amingmingangge arimanowen inikni wareg angge kereta fam imbik lahibareg o Yerusalem walug watfag. Walug watfareg o pumbuk unuk Daud suwalehon fam umbasi sal eneptuk latfag ambeg iraham at inggareg fahet habul tibag ambeg salfag.

²⁹Hun Ahab amloho Yoram ap suwon lahibag sali mo ilig am wirig am turukmu nanggoloben atfagma Ahazia ino Yehuda inap onowe suwon lahibag li ari obog toho teko libag.

³⁰Ari teko libagma Yehu ino o Yizreel libag. Yehu waha urukmu holfareg he Izebel inowen oruk puhun tebelug orohole fene wam finggi are roho olma wereg lit aben yet niyawag ulug keyenteg fo reg ambeg iraham heriyeg latfag.

³¹Heriyeg lit Yehu ino elehet o pumbuk walinggoho ohowon sok ele keyen kik waharukmu yet hibareg Izebel inowen at unuk salikap toho uruk lit, ”Hun Zimri,[3] hikni ware feserikin hahun, hat fano welahen ano?” ulug hi ribag.

³²Hi ribagma Yehu inowen Izebel keyenteg fo reg ambeg iraham heriyegma lahap haruk lit, ”Ap sa-sa an nibilon?” ibareg Izebel ibam foroho inap piren hinahan at ubam pilap haruk latfahon unubam,

³³”He ari pilabeg hik isa wambik maniyek!” ibag. Ibagma ap itanowen Izebel ino keyenteg ele keyen pilabeg hik isa wamburukmu amep sililim-salalam o ubahat fene oho wam kuda enebene oho atfagma wam kudan unuyuhen sobir-sabar isibag.

³⁴Sobir-sabar isibagma Yehu olma kibareg ik men suburu men nibag. Nibareg ap welatfahon unubam ele uruk lit, ”He ari Allahn huluwap tirisi hiyap angge famen ap suwon ahaloho wereg angge re at wareg angge kinangma salik lalihip,” ulug hiyag isibag.

³⁵Hiyag isibagma wareg angge ino kinangma saltulen wak lul ulug libareg yet harukmen ebe elegma unggul uwag men inggik men uyug men eneg weregma hiyahibag.

³⁶Hiyahibagma suhuloho Yehu ambeg watfareg iren yet hibag ane hiyag itfagma Yehu inowen ele uruk lit, ”NINIKNI Allahn amingmingangge o Tisbe ahun Elia feneyen ele ibahon tu, ’Izebel unu ino o Yizreel anggenman meneyen kiyal heheg nahup.

³⁷At wareg angge saluk fug angge umbusuhupmu kinang amug war aruhu. War aruhumu ap misihen oho wareg angge ino fahet Izebel wereg uk fug teg laruhu,’ ibag ane ari ketiya hikir aha,” ibag.