Read Angguruk Yali 1 TAWARIKH 10 Bible Online

1 TAWARIKH 10 - Angguruk Yali bible

1 TAWARIKH 10

¹Filistin inaben Israel inap men tom Gilboa famen tog aptuk latfareg Israel inap enekolen larukmu Filistin inaben muko unusibagma ap anggolo war atfag.

²Unusibareg Filistin inaben Saul umalikisi men mug eneplug laruk lit Saul umalikisi ununuk te Yonatan, Abinadab, Malkisua itano oho unusik libag.

³Libareg sehen seneg inaben Saul hiyahibareg wabul ulug tog tahan tibil laruk lit tog sinat watfag.

⁴Watfagma Saulen ot misig at asehen seneg latfahon fam ele uruk lit, ”Karog lisoho wamihinteg an kangguloho nuwarin! Ap enembilahap paleg eleg inaben an nele ying naptuk lit nuwabuhup tohon!” ibag. Ibagma amingmingangge inowen nakolen watmin fug ulug imbisibag. Imbisibagma Saulen karog inggarehen tohon ino wibareg kinangma lahabe fibareg inggarehen karog ambiyangma ilag atfag.

⁵Ilag atfagma ot at asehen seneg latfahon inowen yet harukmen Saul war atfagma yet hibareg itano ar oho inggarehen karog aren tohon ambiyangma ilag atfareg war atfag.

⁶Ari sambil Saul umalikisi hinahan itano men ori obog toho ambiyeg unusibagma war atfag.

⁷Israel inap sehen senehon arimano enekolen linggik-longgo urukmu Saul umalikisi men war atfagma Israel inap Yizreel tonggoma welatfahonen hol isibareg inibam embeselug ir oho linggik-longgo uruk latfagma Filistin inap kik watfareg Israel inap enengginang ilmig tibareg welatfag.

⁸Israel inap muko unusibareg likiyamon Filistin inap watfareg ap unusibahon arimano enenggengge hilaruk lit Saul umalikisi hinahan itano men tom Gilboa fam waroho yinggigmu hiyag enepfag.

⁹Hiyag enepfareg Saul anggengge hilaruk lit unggul paloho wibareg tog aptuk asum oho nonggoloho hilibag. Hilibareg, ”Nunumbasi niren wel eneptuk laheyon men nonori o Filistin pumbuk walinggoho werehon arimano men unubam Saul umalikisiyet war atusa ane hiyag isa lalihip,” ulug ap mon enepfag.

¹⁰Mon enepfareg tog aptuk asum Saulen tohon ino unumba iren wel turuk latfahon ibam eke imbik libareg Saul unggul uwag ino unumba Dagon ibam ubahat fam po ribik lahibag.

¹¹Filistin inaben Saul ubam tibag ane o Yabes-Gilead inap obog tohowen hol hibareg

¹²enehako roho turuk inap obog toho wilip atlug libareg Saul ebe warehon men umalikisi enebe warehon men arimano og enebik libag. Og eneplug o Yabes watfareg unuwag e suwon welatfahon ino alma salfag. Salfareg suburu na fug angge hiyang weregman eneg hup sabirenam atfag.

¹³Saul inowen NINIKNI Allah ele holuk fug anggeyen ambol yig utuk lit nangginmin ulug NINIKNI Allah fam hinog og ha la fug angge ap warehon ahimeyen hiyag nitmisi ulug kapal ha libag ane ari fahet NINIKNI Allahn Saul ino ware fisibareg hun Isai amloho Daud ino Saul ubalmangge ap suwon aruhu ulug lahapfag.