Read Angguruk Yali 1 TAWARIKH 11 Bible Online

1 TAWARIKH 11 - Angguruk Yali bible

1 TAWARIKH 11

¹Welatfagma Israel inap ununggul unuk obog toho Daud ambeg o Hebron watfareg enele ubam uruk lit, ”Nit nenemep nununu hat men ambi reg laheyon hat holuk.

²Atam Saul inowen fet nenesug latisi li oho Israel ninap tog abul ulug larukmu haren milal neneptuk latikin angge re HIKNI Allahn hat hubam ele uruk lit, ’An numalikisi Israel inap haren fet enesug laruhunen onowe suwon welaruhun,’ irisi,” ulug Daud hiyag itfag.

³Ari ulug hiyag itfagma Daud inowen Israel inap onowesi obog toho unubam, ”An men hit men yabuk ambiyeg wituk lamuhuk,” ulug NINIKNI Allah olohotman o Hebron inowen sali imbibag. Sali imbibagma NINIKNI Allahn Samuel feneyen ibag ane hikit toho Daud unggul ke ahaluwe amben fanowon are ribareg Israel ninap nonowe suwon raja welaruhun ulug lahapfag.

⁴Welatfagma Daud umalikisi Israel inap obog toho men o Yerusalem unuk tamon o Yebus suwaleg latfag ambeg ino libareg o ino kul ulug turukmen

⁵Yebus inap o Yerusalem welatfahon arimanowen Daud fam enele uruk lit, ”Hat te o Yerusalem kuk fug teg lahen,” ibag angge famen Dauren elehet yaron walinggoho oho ambeg ap kuk fug tehon unuk Sion ino ilmig tibag. Ilmig tibag ambeg ino fobik unuk o pumbuk Daud suwalfag.

⁶O ino sambil Daud inowen umalikisi unubam ele uruk lit, ”Ap san Yebus inap tam unusimisi ahun ino hit sehen seneg lahebon honowe aruhu,” ulug hiyag isibag. Hiyag isibagma hiyap Zeruya amloho Yoab ino Yebus inap unusimin ulug atam o ino kibag. Atam kibag ane ariyen Yoab ino Daud umalikisi sehen seneg latfahon onowe atfag.

⁷Ari tibagma Daud ino elehet yaron walinggoho oho ambeg o ino yug toho welatfag. Yug toho welatfag ambeg ino aben o pumbuk ino unuk Daud suwalfag.

⁸O pumbuk unuk Daud suwalfahon walinggoho o witil lahuk ulug o Milowen ak tibareg[5] pulmu wiri fik libag. Wiri fik larukmu Yoab inowen o halog toho lin isibahon arimano haltuk latfag.

⁹Ari roho turukmen eneg NINIKNI Allah pohol ha kinang ha senehon inowen let turukmu Daud ine atfag.

¹⁰Daud otsi enembong se roho turuk inap fahet tuma haharoho imbibag. NINIKNI Allahn Daud ino Israel inap onowe suwon welaruhu ibag ane hikit toho Daud otsi arimano men Israel inap obog toho menen Daud ino ibil atuk lit ap suwon lahapfag.

¹¹Daud otsi enembong se roho turuk inap ununuk tuma hahareg: Hakhmoni amloho Yasobam ino ap hinahan enehako roho turukon itano sehelimuwon at eneg palimu welatfag. Yasobam inowen ap seliyon teng nanggoloben 300 men tog aptuk lit misihim it obog toho fit fam pinggi unusibag.

¹²At iraham o Ahohi ahun Dodo amloho Eleazar welatfag. Ar oho it hinahan enehako roho turuk inap sehelimu welatfag.

¹³Misihim Filistin inap arimanowen Israel inap men tog abul ulug o Pas-Damim palu atug watfagma Eleazar ino Daud iraham welatfag. It horogma roti anggen yabuk eke weregma Israel inap enekolen linggik-longgo ul ulug turukmen

¹⁴Eleazar men Daud men yabuk ino pulmu in arik libareg yabuk ino inine roho seneg lit Filistin inap arimano waroho apmayap enepfag. Ari tibag ane ino NINIKNI Allahn Israel inap windat enepmin pibareg ine roho let eneptukmu Israel inap palimu atfag.

¹⁵Misihim eke Filistin inaben tog abul ulug o Refaim tonggoma luhal atug watfareg o sabo wiroho welatfag. Welatfagma Daud helep humon ino horogma o Adulam owikmu weregma otsi enembong se roho turukon teng misigmen nubam hilag hinahan 30 sehelimuwon enebe hinahan Daud ambeg wambik watfag.

¹⁶Watfag sambil ino punumu elehet yaron oho ambeg Daud weregma Filistin inap palu misig o Betlehem welatfag.

¹⁷Welatfag ane ari fahet Dauren indi ouk toho wenggel hibareg otsi hiyag isaruk lit, ”Ap sa o Betlehem lamisireg sok o pumbukmu kurukon horogma ik fahet habulig ambehen ik hinanggik lamisireg an naminen walug watmisi?” ulug hiyag isibag.

¹⁸Hiyag isibagma Daud otsi hinahan itano o Betlehem libareg Filistin inaben o sabo wiroho welatfag ambeg kuruk lit sok horogma ik fahet habulfag ambehen ik hinanggibareg Daud ambeg suhuloho walug watfag angge famen Daud inowen namin fug ibareg NINIKNI Allah olohotma hilili fibag.

¹⁹Hilili feruk lit, ”Nikni Allahn anden ik aru na nowen ulug fet nasug lamag! An notsiyen war atuk ane fahet enekol eleg toho hinanggik lahasa angge re ik aru nangginoho namin? Ik aru an notsi enemep naruk hag toho nele,” ulug nibag fug. Ari tibag ane ino Daud otsi enembong se roho turuk inap hinahan itanowen tibag.

²⁰Yoab ot Abisai ino Daud otsi enembong se roho turuk inap teng misigmen nubam hilag hinahan itano 30 onowe welatfag. Abisai inowen ap seliyon teng nanggoloben 300 men tog aptuk lit fit fam pinggi unusibag. Ap teng misigmen nubam hilag hinahan itano enesehelimu

²¹at unuk palimu atukmu Abisai ino it onowe atfag angge famen it hinahan itanowen enembong se roho turuk latfag hag toho aren turuk latfag fug.

²²Yoyada amloho Benaya o Kabzeel ahun inowen oho tog ahako roho aptuk lit su ane eke hag eke hag turuk latfag. Aren o Moab inap enembong se roho turukon piren itano pinggi unusibag. Misihim osit soho anggen hag toho narukmu olomene singa eke kinang fo reg ambeg mako wambibareg weregma Benaya ino wambibareg ware fisibag.

²³Wina sambil o Mesir ahun eke ware fisibag. Ap ino uwag yat tehen wirim tibahon il piren men sebe roho misig pul ke minggiroho men welatfag. At inggikmu fit humon-hamon eke senegma Benaya ino e eneg seneg lit at olohotma libareg fit aren seneg latfahon ino taluk toho wibareg ap ino fit inggarehen tohon fam ware fisibag.

²⁴Ari obog toho Yoyada amloho Benaya inowen turuk lit Daud otsi teng misigmen nubam hilag hinahan arimano sehelimu at unuk su atfag.

²⁵It sehelimu at unuk palimu atfag angge famen it hinahan itanowen enehako roho turuk latfag hag toho aren turuk latfag fug. Dauren Benaya ino fam, ”Notsi an fet nasug inap onowe welaruhun,” ulug lahapfag.

²⁶Daud otsi enembong se roho turuk inap ununuk tuma hahareg: Yoab ot Asael men, hun Dodo amloho Elhanan o Betlehem ahun ino men,

²⁷o Harod ahun Samot men, o Peloni ahun Heles men,

²⁸hun Ikes amloho Ira o Tekoa ahun ino men, o Anatot ahun Abiezer men,

²⁹o Husa ahun Sibkhai men, o Ahohi ahun Ilai men,

³⁰o Netofa inap Maharai men hun Baana amloho Heled men,

³¹Ribai amloho Itai o Gibea kinang Benyamin fam welatfahon ino men, o Piraton ahun Benaya men,

³²Hurai o Gaas tonggoma welatfahon ino men, o Bet-Araba ahun Abiel men,

³³o Bahurim ahun Azmawet men, o Saalbon ahun Elyahba men,

³⁴o Gizon ahun Hasyem men, Sage amloho Yonatan o Harari ahun ino men,

³⁵Sakhar amloho Ahiam o Harari ahun ino men, Ur amloho Elifal men,

³⁶o Mekherati ahun Hefer men, o Peloni ahun Ahia men,

³⁷o Karmel ahun Hezro men, Esbai amloho Naarai men,

³⁸Natan are Yoel men, Hagri amloho Mibhar men,

³⁹Amon ahun Zelek men, o Beerot ahun Naharai he Zeruya amloho Yoab asehen seneg latfahon ino men,

⁴⁰o Yetri inap Ira men Gareb men,

⁴¹Het ahun Uria men, Ahlai amloho Zabad men,

⁴²Ruben inap onowe eke unuk Adina hun Siza amloho ino otsi teng misigmen nubam hilag hinahan 30 men,

⁴³Maakha amloho Hanan men, o Mitni ahun Yosafat men,

⁴⁴o Astarot ahun Uzia men, o Aroer ahun Hotam umalikisi Syama men Yeiel men,

⁴⁵Simri amloho Yediael men, ot Yoha o Tizi ahun ino men,

⁴⁶o Mahawim ahun Eliel men, Elnaam umalikisi Yeribai men Yosawia men, o Moab ahun Yitma men,

⁴⁷o Mezobaya inap Eliel men Obed men Yaasiel men arimano obog toho Daud otsi enembong se roho turuk inap welatfag.