Read Angguruk Yali 1 TAWARIKH 12 Bible Online

1 TAWARIKH 12 - Angguruk Yali bible

1 TAWARIKH 12

¹Kis amloho Saul inowen nuwaruhu rohon ulug Daud ino o Ziklag hiraho lit weregma ap anggolo at ibil amul ulug ambeg watfag. It watfahon arimano Daud iraham wereg lit tog enembong se roho aptuk latfag.

²Iren minggin tog seneg lit ininggik pikironet hareyonet minggin pising isaruk lit helep oho hik isa reg latfag. It arimano Saul ori Benyamin inap welatfag.

³It ununuk tuma haharehon ul: O Gibea ahun Semaa umalikisi Abiezer it onowe roho welatfahon ino men Yoas men, hun Azmawet umalikisi Yeziel men Pelet men, o Anatot inap Berakha men Yehu men,

⁴o Gibeon ahun Yismaya Daud otsi enembong se roho turukon teng misigmen nubam hilag hinahan enesehelimu wereg lit onowe lahibahon ino men, o Gedera inap Yeremia, Yehaziel, Yohanan, Yozabad men,

⁵o Harufi inap Eluzai, Yerimot, Bealya, Semarya, Sefatia men,

⁶Korah inap Elkana, Yisia, Azareel, Yoezer, Yasobam men,

⁷o Gedor ahun Yeroham umalikisi Yoela men Zebaja men Daud men welatfag.

⁸Gad inap winonen oho Daud ombolim lahuk ulug onori embeselug Daud ino o Yehuda lekma punumu elehet yaron oho ambeg weregma watfag. It onorohole olomene orohole hag toho wereg lit mene folo-folo tom fene laruk hag toho laruk latfag. Iren tog piyabangge lahaptuk lit fit seneko enembong se roho tog aptuk latfag.

⁹Hun Ezer it onowe roho weregma ap pirenehon Obaja, hinahanehon Eliab,

¹⁰uhanehon Mismana, fuwabon Yeremia,

¹¹falfalikon Atai, sabiron Eliel,

¹²likinon Yohanan, sohowon Elzabad,

¹³numon Yeremia, nanggolobon Makhbanai welatfag.

¹⁴Gad inap arimano tog seneg inap onowesi roho wereg lit it enebe toronen ap seliyon teng fuwaben waroho apmayap enebuk tegma it enebe suwonen ap seliyon teng-teng angge 1.000 apmayap enebuk teg latfag.

¹⁵Misihim pikalem atamon fam ik Yordan fu waharuk lit ik ayeg ke obog toho hondo ribagma it arimano ik ino paloho nindig atfareg ap tonggo arimano fam welatfahon obog toho yanggal enepfagma yali fil hubula fil linggik-longgo ibag.

¹⁶O itano li Benyamin inap minggiroho winon men Yehuda inap minggiroho winon men oho punumu elehet yaron oho ambeg Daud weregma watfag.

¹⁷Watfagma Daud ino wilip atug enembeg watfareg ele uruk lit, ”Hiren Daud ibil atuk lit let turuk lamuhuk ulug wahep halug an men hit men ninindi misig toho welamuhuk angge famen hiren an nele ying naptuk lit Daud ino siyag ane turuk latisi fuhon famen ap seliyon ininggikmu umbuhuk ulug wahep halug Allah nunumbasiyen wel turuk latfahon inowen yet hisahureg alem angginon hit hunubam umbuhu,” ulug hiyag isibag.

¹⁸Hiyag isibagma ap teng misigmen nubam hilag hinahan onowe Amasai ino Allah ahime ubam atfagma ele uruk lit, ”Daud nare, Isai amloho welahenon, nit hat hibil atuk lit mangno roho welamuhuk. Hikni Allahn let haptukmu hat men hat let haptukon men palimu atuk lit fano welamuhup,” ulug hiyag itfagma Daud inowen hit an men wereg lit notsi onowesi roho welamuhuben lahap henebuhuk ulug hiyag isibag.

¹⁹Manasye inap minggiroho winon oho Daud ibil atfag. Ibil atfag li Filistin inaben Saul men tog abul ulug turukmu Daud ino Filistin inap men welatfagma Filistin inap onowesi arimanowen enele sahaltuk lit, ”Daud ino nin hebeloho at ikni Saul ibil aruhureg nit welahe ane fahet hiyag uruhumu Filistin ninap nunusuhup tohon nit men tog abik lul fug,” ulug hiyag itfagma Daud ino it men ambiyeg tog abik libag fug.

²⁰Daud ino suhuloho o Ziklag larukmu Manasye inap Adnah, Yozabad, Yediael, Mikhael, Yozabad, Elihu, Ziletai men Daud men welamuhuk ulug ambeg watfag. It arimano Daud uwan ibil am fug lit Manasye inap sehen senehon onowesi roho welatfahon wal tanehen unumalikisi teng-teng angge 1.000 sen enesug latfag.

²¹It enehako roho tog aptuk inap eneg wereg lit Daud men mangno roho yoholiyangge waruk inap men tog aptuk latfag. Ari roho turukmu yet isibareg Dauren notsi sehen senehon onowesi roho welamuhup ulug lahap enepfag.

²²Likiya hupmu aben Daud ibil amuhuk ulug ambeg waharukmen eneg Daud otsi sehen senehon arimano Allah otsi luhaloho wereg hag toho anggolo atfag.

²³NINIKNI Allahn ibag ane hikit toho Saul ubalmangge Daud ap suwon lahabul ulug Israel inap sehen senehon anggolo Daud o Hebron weregma watfag. It Daud ambeg watfahon enebe winag isarukmen

²⁴Yehuda inap tog abuk tehon eneg tog piyabangge lahaptuk lit fit senehon arimano teng-teng angge 6.800 watfag.

²⁵Simeon inap tog enembong se roho aptukon teng-teng angge 7.100 watfag.

²⁶Lewi inap teng-teng angge 4.600 watfag.

²⁷It enesehelimu hun Harun inowen ondohowonen ondohowon onowe Yoyada umalikisi teng-teng angge 3.700 men,

²⁸ap kabiniyon tog ambong se roho aptukon Zadok men at unggul unukon onowesi roho welatfahon falfalik fumahen 22 men watfag.

²⁹Saul ori Benyamin inap oho enebe teng-teng angge 3.000 Daud ambeg watfag. Watfag li itano Benyamin inap Daud ibil atfahon arimano we tor angge weregma Benyamin inap winon Saul ori men welatfahon arimano anggolo welatfag.

³⁰Efraim inap tog enembong se roho aptuk lit onori enesehelimu ununuk palimu rehon enebe teng-teng angge oho 20.800 Daud ambeg watfag.

³¹Manasye inap minggiroho winon enebe teng-teng angge 18.000 arimanowen Daud ap suwon lahabuhuben lalihip ulug ununuk wal taneg ibahon oho Daud ambeg watfag.

³²Isakhar inap onowesi enebe teng sabiren 200 men onori it enele holtukon obog toho men watfag. Isakhar inap arimanowen mun ane man ane teko larukon fahet inindi anggat teg lit ari roho turuk lamuhup ulug Israel inap hiyag isaruk latfag.

³³Zebulon inaben tog aptuk angge eke hag eke hag seneg latfahon teng-teng angge 50.000 Daud ambeg waharuk lit ninindi piren teg eleg angge at let turuk lamuhuk ulug watfag.

³⁴Naftali inap onowesi enebe teng-teng angge 1.000 men unumalikisi tog piyabangge lahaboho fit seneg latfahon oho teng-teng angge 37.000 Daud ambeg watfag.

³⁵Dan inap tog aptuk ane fahet milal enepfahon enebe teng-teng angge 28.600 watfag.

³⁶Asyer inap tog aptuk ane fahet milal enepfahon enebe teng-teng angge 40.000 watfag.

³⁷Ruben inap men Gad inap men Manasye inap minggiroho winon men ik Yordan fuma fil welatfahon arimanowen tog aptuk angge eke hag eke hag seneg latfahon enebe teng-teng angge 120.000 Daud ambeg watfag.

³⁸It arimano obog tohowen sehen seneg lit Daud ino Israel ninap obog toho nonowe suwon lahabul ulug inindi piren teg eleg angge o Hebron iraroho luhal arik watfag. It watfahon inindi misig toho welatfag hag toho Israel inap pok atfahon arimanowen oho Daud ino nonowe suwon welaruhu ulug inindi misig toho wenggel haruk latfag.

³⁹O Hebron watfahon arimano hup hinahan Daud men weregma onoriyen ik men suburu men og isarukmu naruk latfag.

⁴⁰Ari roho weregma Israel inap obog toho enehiyeg haruk lit o Hebron horogma welatfahon men Isakhar inap, Zebulon inap, Naftali inap menen oho roti anggen men e ara anggen men kue kin altap hahon men anggur ahaluwe men e zaitun ahaluwe men wam sapi men domba men anggolo wibareg enembohom keledai, unta, sapi enemberimu imbik lahalug it o Hebron weregma og isa waharuk latfag.