Read Angguruk Yali 1 TAWARIKH 13 Bible Online

1 TAWARIKH 13 - Angguruk Yali bible

1 TAWARIKH 13

¹Welatfagma Daud inowen sehen seneg inap enebe teng-teng angge 1.000 onowesi men enebe teng uhan 100 onowesi men tog aptuk ane fahet milal eneptuk inap obog toho men enele sahalfag.

²Sahalfareg Daud inowen Israel inap onowesi at ibil atfahon obog toho luhaloho weregma hiyag isaruk lit, ”Hiren fano pelihipmu NINIKNI Allahn oho iren fano tulusa pemisi halug nonori inibam Israel kinang atogman atogma pok atuson nenembeg luhal arik wamuhuben wol enebik lalihip ulug ap mon enebulen maniyek! Allah amingmingangge imam men Lewi inap men inibam pumbuk walinggoho enembohom forohowon arimano oho wamuhup.

³Wamuhupteg niret iret Wene Numen haharehon peti elma kilabeg angge Saul oluk weregma wenggel haruk latukuk fuhon ino wak lahukteg walug wamuhuk,” ulug hiyag isibag.

⁴Hiyag isibagma ap luhaleg latfahon obog tohowen fano ehek pibareg ehen ane hikit toho tuhuk ibag.

⁵Ari ibagma Daud inowen Wene Numen haharehon peti elma kilabeg angge ino o Kiryat-Yearim wak lahuken wamuhup ulug Israel inap ik Sikhor o Mesir werehon famen tulug o Hamat laruk ke welatfahon obog toho wol enepfagma watfag.

⁶Watfareg Daud ino Israel inap obog toho men peti ino wak lul ulug Yehuda kinangma o Baala unuk eke Kiryat-Yearim suwaleg latfag ambeg ino libag. Peti ino NINIKNI Allah pohol ha kinang ha senehon otsi malaikat palimu heriyehon unuk fam wirig latfag.

⁷Libareg peti ino hun Abinadab ibamen wilibi fibareg kereta wam kudan lisoho walug laruk angge keron eke palimu imbik lahibag. Imbik lahibareg Uza men Ahyo menen kereta ino walug laruk latfag.

⁸Laruk lit Daud men Israel inap obog toho menen sini fam Allah wel tul ulug pinggong, puhuli, waruk men teltuk lit inine roho yunggultil laruk latfag.

⁹Laruk lit hun Kidonen tohon roti anggen waruk ambeg larukmen wam sapi unuyug kebunggalman pi roho wamburukmu Uza inowen yet hibareg peti aru mako wambuhu rohon ulug inggiken peti ino sene fibag.

¹⁰Sene ferikim itano NINIKNI Allahn Uza fahet olok hibareg nungge fahet peti Anden tohon senerehek ulug Uza ware fisibagma Allah olohotman war atfag.

¹¹Ari roho tibag ambeg ino aben unuk Peres-Uza suwalfagma ketiya oho uruk.[6] NINIKNI Allahn olok haruk lit Uza ino ware fisibag ane fahet Daud indi siyag atfag.

¹²Daud inowen Allah fahet akol hibareg, ”Nangginoho peti aru anden nibam walug lamin?” ibag.

¹³Ari ibareg Daud inowen peti ino o Yerusalem walug lamin fug ulug o Gat ahun unuk Obed-Edom ibam imbik libag.

¹⁴Pikalem hinahan peti ino Obed-Edom ibam weregma NINIKNI Allahn Obed-Edom uhe umalikisi men anggengge obog toho fano welamuhup ulug indi enesug latfag.