Read Angguruk Yali 1 TAWARIKH 16 Bible Online

1 TAWARIKH 16 - Angguruk Yali bible

1 TAWARIKH 16

¹Peti ino walug watfareg Dauren o sabo wiri fibag ambeg ino imbik kibag. Imbik kibareg nit men Allah men mangno roho welamul ulug wam waroho esetuk lit winon waroho hubu lahapfag.

²Wam waroho yalfareg Daud inowen ap obog toho o pumbuk aru werehon Allahn indi henesug laruhu ulug NINIKNI Allah unuk fam hi enepfag.

³Hi enepfareg roti wirahowon men wam unu men kue kin altap hahon men o pumbuk ino welatfahon obog toho abet hiyabet fibir enepfag.

⁴Ari roho tibareg Daud inowen Lewi inap minggiroho winon hiyag isaruk lit Israel ninap NINIKNI Allah unuk suwap tul ulug wel turuk asini yunggultuk lit At ubam sembahyang uruk lit peti NINIKNI Allahn tohon aru alukema yabuk turuk lamuhup ulug in enepfag.

⁵In enepfahon arimano onowe Asaf weregma at iraham Zakharia welatfag. Weregma Yeiel, Semiramot, Yehiel, Matica, Eliab, Benaya, Obed-Edom, Yeiel menen puhuli men pinggong men watukmu Asaf inowen waruk teltuk latfag.

⁶Ari roho turukmu Allah amingmingangge Benaya men Yahaziel menen likiya hupmu Allahn sali imbibag ane haharehon peti elma kilabeg angge alukema pinggong ele ine roho watuk latfag.

⁷Dauren Asaf ori men unubam NINIKNI Allah wel turuk asini yunggultuk lamuhup ulug tam hiyag isa fug angge we ino sambil eneg hiyag isibag. Hiyag isibag ane hikit toho sini yunggulfahon tu:

⁸”NINIKNI Allahn let neneptisi ulug wel turuk lit At unuk suwap turuk lamek! Aren turuk ane fahet ap o pumbuk obog toho hiyag isaruk lamuhup.

⁹Aren su ane turuk latisiyon obog toho fahet Allah asini yunggultuk lamuhup.

¹⁰At ebe mondabi fanowon ino anggengge nit welahe ulug henehiyeg toho welamuhup. At alukema welahebon arimano obog tohowen henehiyeg haruk lamuhup.

¹¹At fam ine werehon heng turuk lamuhup. Likiya hupmu At orohole yami ruruk lamuhup.

¹²Allah amingmingangge Yakub umalikisi welahebon, Israel umalikisi Allahn mumal heneptisiyon welahebon, Allahn fano ane turuk latisiyon wenggel haruk lit Aren anggin ane ap fam emberuk latisiyon oho honoluk toho welamuhup.

¹⁴Allah nit NINIKNI wereg. Aren alem kong toho emberuk ane ap kinang atogman atogma werehon unubam emberuk.

¹⁵Allahn umalikisi fam An Hinikni aruhuk ulug sali imbibahon fahet wenggel harukmen eneg welamuhup. Aren sali imbibahon fahet nunumalikisiyen endebuhubonen endebuhubon welamuhup li oho apeleg aruhu fug.

¹⁶Sali ino atam Abraham fam imbibareg fobik Ishak fam oho imbibag.

¹⁷Nin Yakub fam emberuk lit Israel inaben seneg lamuhup ulug mondabiyap tibag.

¹⁸Hiyag isaruk lit, ”Kanaan kinang aru hit mondabi ngi amuhuben og hisahuk,” ulug hiyag isibag.

¹⁹Indam enebe tor angge wereg lit ap pohon hag toho Kanaan kinang fam welatfag.

²⁰It arimano ap winon inibam o pumbuk eke la eke wam turuk latfag.

²¹Ari roho turukmu NINIKNI Allahn let eneptuken ap misihen oho it enele ying eneptuk latfag fug. It fahet Aren ap suwon komo eneptuk lit,

²²”Anden mumal eneptikikon aruma eneleyap enebuhup fug. An namingmingangge nabi aruma honolok ane unubam turuk lamuhup fug,” ulug komo eneptuk latfag.

²³Kinang atogman atogma welahebonen NINIKNI Allah wel turuk lit sini yunggultuk lamek! NINIKNI Allahn fanowap neneptisi ulug likiya hupmu hiyag isaruk lamuhup!

²⁴At umbagpag turukon inowen ine roho turuk ane fahet o pumbuk munon-manon hiyag isaruk lamuhup.

²⁵NINIKNI Allah mondabi suwon ulug ap obog tohowen wel tukag. Nunumba ulug wel eneptukon arimano mondabi apma regma we At fahet eneg enekol toho welamuhup.

²⁶Ap o pumbuk winonen ninikni ulug wel eneptukon arimano warehon hag angge wereg angge famen NINIKNI Allah ino pohol ha kinang ha wal tibag ahun wereg.

²⁷At ino umbagpag turuk lit mondabi palimu wereg. Ap inineyap eneptuk ane men enehiyehap eneptuk ane men At ibam keleg toho wereg.

²⁸At eneg ine roho wereg lit umbagpag turukon ino ap ununggul unuk obog tohowen wel tik waharuk lamuhup.

²⁹At unuk fanowon palimu roho werehon suwap turuk lit Allah fahet umbul peruk lahebon walug waharuk lamuhup! Allah ibam kuruk lit wan turuk asum wan teg lit[8] NINIKNI Allah olohotma henelenggen fam hur atlug sembahyang uruk lamuhup!

³⁰Ap kinang atogman atogma welahebon At alukema henekolen henebe elek turuk lamuhup! Kinang yuk tuk fug angge ine roho wereg.

³¹Poholma kinangma welahebon henehiyeg toho welamuhup! Ap o pumbuk obog toho unubam hiyag isaruk lit, ”NINIKNI Allah ap suwon nit fet nenesug lit wereg,” ulug hiyag isaruk lamuhup.

³²Ik saho ahik inowet ahummu wereg angge arimanowet Allah wel turuk lit enele mi ruruk lamuhup! Kinang ebeyet yabukmu yatuk anggeyet enehiyeg toho welamag.

³³E farema werehonen oho enehiyeg haruk lamuhup. NINIKNI Allahn o pumbuk munon-manon alem unubam werehon haloho umbuhuk ulug waharuk.

³⁴ NINIKNI Allah wel turuk lamek! Allah fano ulug At fog tiyek! Aren umalikisi indi enesugmen eneg welaruhu.

³⁵’NINIKNI Allah, Hat let neneptuk lahenonen windat nenebik ma,’ ilihip. ’Nit o kema-kema hik nisarusa ambehen wiliboho andog nenebik waruhun. Waruhunmu niren Hat hunuk fanowon palimuwap turuk lit nenehiyeg toho wel haptuk lamuhuk,’ ilihip.

³⁶Israel ninap NINIKNI Allah ketiya famen tulug fobik oho mondabi wel turuk lamuhup,” ulug Asaf ori menen sini ari yunggulfag. Yunggulfagma Israel inap obog tohowen, ”Amin! NINIKNI Allah wel turuk lahe,” ibag.

³⁷Ari ibagma Daud inowen hiyag isibag ane hikit toho Asaf ori men NINIKNI Allahn sali imbibag ane haharehon peti elma kilabeg angge iraham wereg lit likiya hupmu yabuk waruk latfag.

³⁸It men Obed-Edom ori men enebe teng pirenman nubam hilag nunggul huriken 68 arimanowen yabuk ambiyeg turukmu hun Yedutun amloho Obed-Edom ino men Hosa menen peti kilapfag ibam sok ino foroho latfag.

³⁹Forohoma Daud inowen Allah amingmingangge Zadok ori men hiyag isibag ane hikit toho NINIKNI Allah men Ambi Atuk Ibam alukema yabuk turuk lamuhuk ulug o Gibeon horogma punumu Allah fahet hubu lahaptuk ambeg welatfag.

⁴⁰It arimanowen NINIKNI Allahn ele Israel inap hiyag isibahon hahareg ane hikit toho likiya hupmu NINIKNI Allah olohotma wam waroho helep sengget watfahon fam indokma yaltuk latfag.

⁴¹It iniraham Heman men Yedutun men ap ununuk wal taneg uruk lit en enepfahon arimano men oho o Gibeon welatfag. Iren likiya hupmu sini uruk lit, ”NINIKNI Allahn indi nenesugmen eneg welaruhu,” ulug Allah wel turuk latfag.

⁴²Heman men Yedutun menen puhuli, pinggong, ele uruk angge winon men watuk lit Allah wel turukmu Yedutun umalikisi arimanowen Allah men Ambi Atuk Ibam sok kuruk ambeg foroho latfag.

⁴³Ari regma yabuk obog toho tebehe ulug Israel inap obog toho inibam wal taneg larukmu Daud inowen oho nuhe numalikisi men hi enebik lamin ulug ibam libag.