Read Angguruk Yali 1 TAWARIKH 17 Bible Online

1 TAWARIKH 17 - Angguruk Yali bible

1 TAWARIKH 17

¹Daud ino ibam yug toho wereg lit Allah amingmingangge nabi Natan fam ele uruk lit, ”Nare, an aru o fanowon e mur fam wirig ibam welahi angge famen NINIKNI Allah wene haharehon peti elma kilabeg angge ino o saboma wereg,” ulug hiyag itfag.

²Hiyag itfagma Natan inowen Daud fam, ”Hat hindimu wenggeltuk lahenon ari hikit toho turuk laruhunmu Allahn let haptuk laruhu,” ibag.

³Ibagma hup ino sambil Allahn Natan hiyag utuk lit,

⁴”Lamihinteg An namingmingangge Daud ino fam hiyag irik lamihinon tu: NINIKNI Allahn ele tu hag toho ehek: ’An yug toho welaruhu ulug o fanowon wit nuruhu fug.

⁵Atam Israel inap o Mesiren Anden hondog eneplug wilip atik iyag ambehen o fanowon fam welatikik fureg ketiya oho welahi. An o saboma eneg wereg lit o eke la eke la turuk lahi.

⁶Israel inap arimano o kema-kema larukmu An oho it men ambiyeg laruk lit Anden misihim sambil numalikisi Israel inap onowesi Anden lahap eneptikikon fam nele uruk lit, ’Nungge fahet An nubahet o e mur fam wituk lahep fug?’ ulug hiyag isaruk latikik ano? Eleg-o.

⁷Ari fahet namingmingangge Daud fam Anden imin ane tu hiyag itmihin: NINIKNI Allah pohol ha kinang ha senehon inowen ele tu uruk: ’Hat wam domba anggenma forohoman An numalikisi Israel inap fet enesug laruhun ulug hondog haptikik.

⁸Hat o kema-kema larukmu Anden fet hasug lit hat holohotman ap seliyon obog toho elehap eneptikik. Elehap eneptikikteg fobik Anden hat hunuk ap suwon kinangma werehon winon hag toho su aruhu ulug palimuwap tuhuk.

⁹An numalikisi Israel inap unubam, ’Kinang aru fam welamuhup,’ ulug hiyag isaruk lit unumanggen yag enebuhukmu enengginang yuhon fam weregma indam siyahap eneptuk latfag hag toho ap unubabut siyahonen siyahap enebuhup fug. We inindi yuwag toho welamuhup.

¹⁰Atam An numalikisi Israel inap fahet ap suwon hakim lahap eneptik iyag liyen Anden let eneptuk lit ap seliyon obog toho elehap eneptikik hag toho fobik oho turuk laruhukmu hat yuwag toho welaruhun. Nin Anden hat hiyag hutuk lahiyon tu: An HIKNI Allahn hat hibam wit huruhuk.

¹¹War aruhunon horog aruhumu humbusagsi sal eneptusa ambeg sal habuhupmu hamloho yuhon misig hat hubalmangge unduhuk fuhukteg Israel inap fet enesug laruhun ulug ineyap tuhuk.

¹²Aren fobik o fanowon misig An nubahet wiri fuhumu Anden at umalikisiyen endebuhubonen endebuhubon kinang aru senegman eneg mondabi welamuhuben in eneptuk laruhuk.

¹³An at Ikni aruhuk, at An namloho aruhu. Anden hat uwanma ap suwon welatisi ahun fahet nindi reg latikik angge famen fobik nambolmaya feserikikteg ubalma hat lahap haptikik hag toho hat hubalmangge fam tuhuk fug. Anden nindi reg laruhuk ane eleg aruhu fug.

¹⁴Haren ondohowonen endebuhubon arimano An nibam wereg lit An nunuk fam kinang aru seneg lamuhup ulug Anden inineyap eneptukmen eneg mondabi welamuhup,” ulug hiyag itfag.

¹⁵Allahn Natan fam seleg toho ibahon ino hikit toho Natan inowen Daud hiyag irik libag.

¹⁶Natan inowen hiyag irik libagma ap suwon Daud ino NINIKNI Allah wereg ambeg o saboma kibareg kinangma hur atfareg ele uruk lit, ”Allah NIKNI suwon, an men numalikisi men siyag ninap famen anggoloenam let neneptuk latikin.

¹⁷Let neneptuk latikinon fahet Hat hindimuwen we tot peruk lit an hamingminganggeyen endetuk lahiyonen endebuhubon fahet yat toho wenggel haruk lit hiyag nerehen. Nubalmangge eke indag am eke indag am turuk lamuhubon fahet Allah NIKNI suwon welahenon Haren selehap tehen.

¹⁸Haren an hamingmingangge aru palimuwap nabehen angge re anden Hat hubam nungge nin hiyag hitmin? Mun ane man ane an hamingmingangge aruwen nindimu wenggel haruk lahi ane, NIKNI Allah, Hat holuk.

¹⁹NIKNI, Hat hindimu wenggel harikinteg an hamingmingangge aru hindi nasug lit alem suwon aru tuhuk ulug an hiyag nerehen.

²⁰NIKNI, Haren turuk lahen hag toho ap winonen oho turuk urukmu indam oho holtuk latukuk fug. Hat Allah misig eneg welahen.

²¹Israel inap Haren hele loloho windat eneptikinmu Hat humalikisi atusa hag toho o pumbuk winon wereg eleg. Aben tuk fug teg ane alem suwon Hat humalikisi unubam turuk latikinon ari fahet kinang atogman atogma Hat hunuk wel haptuk. Humalikisi o Mesiren hondog eneplug wilip atuk lit o kema-kema ap o pumbuk winon Hat humalikisi onolohotman yanggal eneptuk latikin.

²²Israel inap An numalikisi mondabi welamuhup ulug mumal tarikinteg Hat Allah it Inikni atikin.

²³NINIKNI, ketiya Haren an men numaliki men fahet hiyag nutuk lahenon aru mondabi wenggel haruk lit sali ehenon wirim toho turuk laruhun.

²⁴We tik-tem toho ari roho turukmu Hat hunuk su atuken ap obog tohowen enele uruk lit, ’Allah pohol ha kinang ha senehon ino Israel inap INIKNI wereg,’ ulug wel haptukmen eneg welamuhup. An Daud hamingminganggeyen endetuk lahiyonen endebuhubon mondabi welamuhuben ninineyap neneptuk laruhun.

²⁵Hat Nikni Allahn an hamingmingangge nubam seleg toho hiyag nutuk lit, ’Anden humalikisi anggolo og huruhuk,’ ehen. Ari fahet anden nambong se roho Hat fam sembahyang ihi.

²⁶NIKNI, Hat hamu eneg Allah wereg lit alem fanowon tu hiyag nerehen.

²⁷Ketiya an hamingmingangge men numalikisi men Hat holohotma mondabi welamuhuken hi nenepmihin ulug heng haptuk lahi. NIKNI, Hat hinggarehen sali ehenon hikit toho Haren an numalikisi men ninineyap neneptukmu mondabi fano welamuhuk,” ulug Daud inowen sembahyang ibag.