Read Angguruk Yali 1 TAWARIKH 18 Bible Online

1 TAWARIKH 18 - Angguruk Yali bible

1 TAWARIKH 18

¹Welatfareg Daud inowen Filistin inap arimano waroho apmayap enepfareg inibam o Gat ino men pumbuk walinggoho welatfahon men ilmig tibag.

²Ilmig tibareg Moab inap arimano oho apmayap enepfagma Daud amingmingangge atfareg hundig-hundig fano-fano angge ambeg walug waharuk latfag.

³Ari roho turukmu o Zoba inap onowe Hadadezer inowen kinang ik Efrat ilanma werehon ino ilmig tahuk ulug laruk urukmu Daud inowen hol hibareg at men tog abik laruk lit o Hamat horogma apmayap tik libag.

⁴Libareg Daud inowen wam kudan lisoho walug laruk angge teng-teng angge 1.000 ilmig turuk lit ap wam kuda fam lahalug larukon teng-teng angge 7.000 men unuyug fam larukon teng-teng angge 20.000 men sen enepfag. Sen enepfareg wam kuda arimano lahup fug ulug enendeng kong eneptuk lit wam kuda teng uhan 100 enendeng kong enepfag fug.

⁵Siria inaben o Zoba inap onowe Hadadezer ibil amul ulug waharukmu Daud inowen hol hibareg it enesehelimuwon teng-teng angge 22.000 unusibag.

⁶Unusibareg Daud inowen otsi o Siria pumbuk sen enesug lamuhup ulug mon enebik watfagma Siria inap arimano Daud amingmingangge atuk lit hundig-hundig fano-fano angge ambeg walug waharuk latfag. Ari roho turuk lit Daud inowen tog abuhuk ulug laruk ambeg arimano obog toho NINIKNI Allahn let turukmu Daud ino palimu atuk latfag.

⁷Palimu atfareg tog piyabangge ili ruruk angge emas fam witfahon Hadadezer otsiyen wan turuk latfahon arimano Dauren hilalug o Yerusalem watfag.

⁸Hun Hadadezeren seneg latfag ambeg o Tibhat men Kun menen tohon ine angge tembaga anggolo foroho latfahon arimano oho Daud inowen hilalug o Yerusalem walug watfag. Walug watfahon arimano fam fobik Salomo inowen Allah ibam fahet kou ik sene yenggeleg hahon ili rurukon ino men o uwag men foroho angge winon men wiri fibag.

⁹Tam o Hamat inap onowe Tou inowen Hadadezer men anggoloenam tog aptuk latfag. Welatfagma Daud inowen Hadadezer otsi obog toho men mulangge unusirisi urukmu Tou inowen hol hibareg Hadadezer ino fano ware feserikin ulug hi ruhunen lamihin ulug amloho Hadoram ap suwon Daud ambeg monde fik watfag. Monde fik waharuk lit foroho angge ili rurukon emas perak tembaga men fam witfahon Daud og irik watfag.

¹¹Og irik watfag angge arimano men Edom inap, Moab inap, Amon inap, Filistin inap, Amalek inap ininggikmuwen taluk enepfag angge ili rurukon perak emas men oho Dauren NINIKNI Allah fahet imbibag.

¹²Misihim eke he Zeruya amloho Abisai inowen o Saho tonggoman Edom inap enebe teng-teng angge 18.000 unusibag.

¹³Unusibagma Daud inowen otsi o Edom kinang sen enesug lamuhup ulug mon enebik watfagma Edom inap obog toho Daud amingmingangge atfag. Ari roho turukmu Daud inowen tog abuhuk ulug laruk ambeg arimanowen NINIKNI Allahn let turukmen eneg Daud ino palimu atuk latfag.

¹⁴Daud inowen Israel inap obog toho fet enesug lit mun ane man ane alem fano roho haltuk latfag.

¹⁵Zeruya amloho Yoab ino sehen seneg inap onowe welatfag. Ahilud amloho Yosafat ino ap suwon komo rurukon welatfag.

¹⁶Ahitub amloho Zadok men Abyatar amloho Ahimelekh men Allah amingmingangge imam welatfag. Hun Sausa ino suwesingga hahatuk ahun welatfag.

¹⁷Yoyada amloho Benaya ino Daud ebe foroho latfag inap onowe welatfag. Daud umalikisi yuhon arimano it winon enemberimu wereg lit Daud iraham welatfag.