Read Angguruk Yali 1 TAWARIKH 20 Bible Online

1 TAWARIKH 20 - Angguruk Yali bible

1 TAWARIKH 20

¹Mo wirig atfareg ilig atug heriyegma ap suwon-suwon tog abul ulug wilip atuk li Yoab inowen otsi sehen senehon hondog eneplug libareg Amon inap enengginang siyaha fisibag. Siyaha fisibareg o pumbuk Raba ino walinggoho kilap enebik libagma Daud amu eneg o Yerusalem pok atfag. Pok atfagma Yoab inowen o Raba pin halog toho siyaha fisibag.

²Siyaha fisibagma Daud oho watfareg o Raba inap onowe suwonen lahaptuk angge emas umbagpag turukon fam wirihon unggulmu wan teg latfahon ino wibareg at unggulmu wan tibag. Lahaptuk angge ino fam helep ayeg ili faya urukon eke topno roho weregma aben leg harukmu anggin 35 kilogram teg latfag. Ap suwonen lahaptuk angge ari hilibareg nin sebe roho o Raba inap enenggengge anggolo yoholiyangge wibag.

³Arimano obog toho hilaruk lit o Raba inap ininggik lisoho hondog eneplug libareg helep kong turuk angge men wanggun ineyon men yaha fam yabuk wit nutuk lit o witukon fahet kinang huluwon wiratuk lamuhup ulug mingming eneptuk latfag. It arimano unubam turuk latfag hag toho Dauren Amon inap pumbuk obog toho unubam turuk latfag. Ari tibareg Daud otsi sehen senehon obog toho men o Yerusalem suhuloho watfag.

⁴Welatfareg Israel inaben Filistin inap men o Gezer horogma tog abik libag. Tog aptuk lit o Husa ahun Sibkhai inowen hun Sipai uwag yaron ino ware fisibag. Ware fisibag ane ariyen Filistin inap arimano Israel inap enepma atfag.

⁵Enepma atfagma Israel inaben nin eke Filistin inap men tog aptuk lit hun Yair amloho Elhanan inowen o Gat ahun Goliat are Lahmi inggikmu fit humon yaron seneg latfahon ino ware fisibag.

⁶Welatfareg Israel inaben o Gat horogma tog abik libag. Tog aptuk ambeg inowen ap uwag yaron inggik uyug amlo pikit filonet hare filonet wal taneg falfaliken wereg latfahon Israel inap iniline in arik libag. Ap ino oho umbasi unuwag yaronen ondohowonen endetfahon welatfag.

⁷Ap inowen Israel inap ininggaliyap eneptuken Daud owe Simea amloho Yonatan inowen pinggi ware fisibag.

⁸Ari roho turuk lit ap unumbasi unuwag yaronen ondohowonen endetfahon o Gat welatfahon arimano Daud otsi menen misig-misig unusuruk latfag.