Read Angguruk Yali 1 TAWARIKH 21 Bible Online

1 TAWARIKH 21 - Angguruk Yali bible

1 TAWARIKH 21

¹Iblis inowen Israel inap siyahap enebuhuk ulug wenggel hibareg Daud indi nina fisibagma aren notsi enebe winag isahuk pibag.

²Ari pibareg Dauren Yoab men Israel inap onowesi men unubam hiyag isaruk lit, ”Israel inap enebe nowen wereg ulug an noluk aruhuwen enebe obog toho winag isil laruk lit o Bersyeba famen tulug o Dan lahup,” ulug hiyag isibag.

³Hiyag isibagma Yoaben hebeloho hiyag utuk lit, ”NINIKNI Allahn umalikisi anggolo werehon arimano nin sebe roho anggolowap enebuhumu enebe winag isa fug toho welamuhuben sembahyang uruk lahi. It obog toho hat nikni ap suwon welahenon hamingmingangge wereg angge re haren winag eselen fug. Nungge fahet it enebe nowen wereg ulug noluk teg lale peruk lahen? Peruk lahen ane ariyen Israel inap alem angginon unubam aruhu rohon,” ulug hiyag itfag.

⁴Ari ulug hiyag itfag angge famen ap suwon inowen winag isa lalihip ibag ane ino imbisibag fugmu Yoab ino Israel kinang atogman atogma walinggoho libareg suhuloho o Yerusalem watfag.

⁵Watfareg Yoab inowen Israel inap enebe winag isil libahon fahet Daud hiyag itfag. Yoab inowen ap suwonen ibag ane fahet mondabi siyag pibareg Lewi inap men Benyamin inap men winag isil la fug angge we Israel inap sehen senehon teng-teng angge 1.100.000 men Yehuda inap sehen senehon teng-teng angge 470.000 men winag isil libahon fahet ap suwon hiyag itfag.

⁷Dauren winag isahup ibag ane ari fahet Allahn siyag pibareg Israel inap alem angginon unubam imbibag.

⁸Imbibagma Dauren Allah fam ele uruk lit, ”Anden siyag ane hum toho tirikik. Ketiya an nindimuwen wenggeluk fug angge tirikikon ino Haren elehap timihin,” ibag.

⁹Ibagma NINIKNI Allahn Daud amingmingangge fulu ane yet halug ap hiyag isaruk ahun Gad ino fam ele uruk lit,

¹⁰”Daud hiyag irik lamihinon tu: NINIKNI Allahn ele hiyag hutukon holeg lamin! Anden alem angginon hinahan hiyag hitminmu misig tu nubam timihin ulug hiyag nitmihin ik lamihin,” ibag.

¹¹Ibag ane ari hikit toho Gad ino Daud ambeg libareg hiyag utuk lit, ”NINIKNI Allah ele tu holeg lamin: Hat hangginangma suburu obok toho weregman eneg mo hinahan lahu ano, ap seliyonen huwabul ulug mug haplug larukmu hakolen larukmen eneg pikalem hinahan lahu ano, humalikisi ouk alem suwon karog Allahn tohon urukon fam unusuhuk peruk ane hikit toho amingmingangge malaikat inowen Israel kinang obog toho siyahap til larukmen eneg hup hinahan aruhu ano? Ketiya fano wenggel hamihinteg alem tu nubam aruhu ulug hiyag nitmihin ane an mon nabehek ahun hiyag irik lamin,” ulug hiyag itfag.

¹³Hiyag itfagma Dauren Gad fam ele uruk lit, ”An nakol anggolo haruk lahi. NINIKNI Allah indi anggolo nisaruk lit werehen an At inggikmu eneg welaruhuk, ap ininggikmu numbahaku fug,” ibag.

¹⁴Ari ibag li itano NINIKNI Allahn ouk alem suwon monde fik watfagma Israel inap teng-teng angge 70.000 war atfag.

¹⁵War atfagma Allahn o Yerusalem oho siyahap timihin ulug ot malaikat eke monde fibagma malaikat ino libareg unusimin ulug turukmu NINIKNI Allahn yet hibareg siyahap enebukag peruk ane embeselug yihi ulug malaikat ap unusurukon fam ele uruk lit, ”Imbisin! Hinggik imbik wambin!” ibag. Ari ibagma itano NINIKNI Allah ot malaikat ino o Yebus ahun Ornanen roti anggen waruk ambeg iraham unduhuk latfag.

¹⁶Ari turukmu Dauren orohole leko yet harukmen NINIKNI Allah ot malaikat inowen karog inggikmu seneko pohol honggoleg kinang honggoleg unduhuk lit o Yerusalem siyahap timin ulug turukmu yet hibareg Daud men o Yerusalem inap onowesi menen fesi lahapfareg onorohole han kinangma ying atfag.

¹⁷Ying atfareg Daud inowen Allah fam ele uruk lit, ”An namuwen eneg numalikisi Israel inap winag isa lalihip uruk lit siyag ane anggolo tirikik. Nambohom Israel inap aruman siyag ane turusa fug. Ari fahet Hat humalikisi aruma siyahap enepmihin fug. Hat NINIKNI Allah hinggiken an numalikisi men eneg nunusimihin,” ibag.

¹⁸Ari ibagma NINIKNI Allah amingmingangge malaikat inowen Gad fam ele uruk lit, ”Daud fam hiyag irik lamihinon tu: NINIKNI Allah olohotma hubu lahaptukon fahet o Yebus ahun Ornanen roti anggen waruk ambeg helep sengget warik lahamihin,” ulug hiyag itfag.

¹⁹NINIKNI Allah unuk fam Gad inowen hiyag itfag ane hikit toho Daud ino lahibag.

²⁰Laharukmu hun Ornanen roti anggen waruk lit hebeloho yet harukmen malaikat ino weregma yet hibareg umalikisi uhan men hirag atfag.

²¹It hirahoman Daud ino enembeg lahibagma Ornanen orohole leko Daud ino yet hibareg roti anggen waruk ambeg embeselug Daud olohotma libareg orohole han kinangma sahung atfag.

²²Sahung teg lit weregma Daud inowen Ornan fam ele uruk lit, ”Ouk alem suwonen Israel ninap nunusurukon ino eleg aruhu ulug NINIKNI Allah fahet hubu lahaptuk ambeg eke wiri fuhuk perikikteg roti anggen waruk ambeg tu ayeg waroho og nitmihinen hambeg lahik wahi. Onggo nowen fam ayeg warihi ha reg, haren hiyag nitmihin,” ulug hiyag itfag.

²³Hiyag itfagma Ornan inowen Daud fam ele uruk lit, ”Nikni, hat ap suwon, kinang aru hilamihinteg Allah og itmin pehen ane roho embemihin. Wam sapi aruma men e yaltukon roti anggen waruk angge tu men Allah fahet yaltuk lit roti anggen aru oho At olohotma embemihinen obog toho hat og hutuk lahi,” ibag.

²⁴Ibagma ap suwon Daud inowen Ornan fam ele uruk lit, ”Ayeg wabuk fug angge kinang aru hilaminteg NIKNI Allah fahet hubu lahaptuk laruhuk fug pihireg haren hiyag nitmihin ane hikit toho onggo palminteg eneg kinang aru anden tohon atmisi,” ulug hiyag itfag.

²⁵Hiyag itfag ane ari hikit toho Daud inowen roti anggen waruk ambeg onggo uang emas umbagpag turukon teng-teng angge 600 Ornan og itfag.

²⁶Og itfareg Dauren kinang ino fam helep sengget watfareg NINIKNI Allah wel timin ulug wam eke yaltuk lit eke Allah olohotman nul ulug esetuk lit NINIKNI Allah fam ele ibagma NINIKNI Allahn ele hol hibareg poholman indok ambulpul turukon pilabik watfagma wam hubu lahaptuk ambeg imbibahon ino nibag.

²⁷Nibagma NINIKNI Allahn ot malaikat fam ele uruk lit, ”Karog Israel inap unusuruk lahenon ino ei fam kilabin,” ulug hiyag itfag.

²⁸Hiyag itfagma Daud indimuwen wenggel haruk lit o Yebus ahun Ornanen roti anggen waruk ambehen an nele urukmu NINIKNI Allahn hol neyehek ulug indimu oluk atfareg fobik oho Allah fahet hubu lahaptuk latfag.

²⁹Ari tibag li Allah men Ambi Atuk Ibam hun Musan tam lekma witfahon ino men hubu lahaptuk ambeg men o Gibeon horogma punumu wereg latfag angge famen

³⁰Daud ino NINIKNI Allah ot malaikaren karog fam ap unusurukon fahet akolen Allahn ele hiyag nitmisi ulug o Gibeon laruk ane imbisibag.