Read Angguruk Yali 1 TAWARIKH 23 Bible Online

1 TAWARIKH 23 - Angguruk Yali bible

1 TAWARIKH 23

¹Daud ino sabal atfareg at inggarehen amloho Salomo ino Israel inap fet enesug laruhun ulug ap suwon lahapfag.

²Lahapmin ulug wenggel haruk lit Israel inap onowesi obog toho men Allah amingmingangge imam men Lewi inap men wol enepfag.

³Wol enepfahon arimano watfagma Lewi inap kabiniyon indag tibag sali mo ilig am wirig am turukmu teng misigmen nubam hilag hinahan 30 atfahon emberim filon enebe winag isarukmen teng-teng angge 38.000 welatfag.

⁴Weregma Daud inowen hiyag isaruk lit, ”Hit minggiroho winon henebe teng-teng angge 24.000 aruma it NINIKNI Allah ibamen yabuk warukon onowesi roho welamuhup, hit winon henebe teng-teng angge 6.000 aruman alem haloho emberuk lit unggum kong turuk lamuhup,

⁵hit winon 4.000 aruman Allah ibam sok foroho lamuhup, hit winon 4.000 welahebonen ele uruk angge anden witikikon fam NINIKNI Allah fahet sini yunggultuk lamuhup,” ulug hiyag isibag.

⁶Ari ulug hiyag isibareg Lewi inap arimano ununggul unuk Lewi umalikisi Gerson men Kehat men Merari menen ondohowonen ondohowon wereg ane hikit toho palu hinahan minggiri fibag.

⁷Gerson inap arimano Gerson umalikisi Ladan man Simei menen endetfahonen ondohowon wereg.

⁸Ladan umalikisi hinahan itano Yehiel men otsi Zetam men Yoel men welatfag.

⁹Simei umalikisi hinahan itano ununuk Selomit, Haziel, Haran men welatfag. It arimano obog toho Ladan inap ununggul unuk wal taneg werehon onowesi welatfag.

¹⁰Ap eke unuk Simei umalikisi uhan itano Yahat, Ziza, Yeus, Beria men welatfag.

¹¹Yahat wandabon weregma ot Ziza indag tibag. It onotsi Yeus men Beria menen unumalikisi we tor angge indag enepfagma re ununggul unuk we misig hag toho wereg lit yabuk ambiyeg waruk latfag.

¹²Kehat umalikisi uhan itano ununuk Amram, Yizhar, Hebron, Uziel men welatfag.

¹³Amram umalikisi Harun men Musa men welatfag. Harunen endetfahonen ondohowon arimano Allah olohotma unduhuk lit fano-fano angge Allahn tohon iren eneg seneg lit NINIKNI Allah fahet hubu lahaptuk lit At unuk fam ap hi eneptuk ane mondabi senegman eneg welamuhup ulug in enepfag angge famen

¹⁴Allah amingmingangge Musa inowen endetfahonen ondohowon arimanowen Lewi inap yabuk winon hiyag isibahon ambiyeg waruk latfag.

¹⁵Musa umalikisi Gersom men Eliezer men welatfag.

¹⁶Gersom amloho Sebuel ino ununggul unuk Gersom inap onowe welatfag.

¹⁷Eliezer inowen we amloho misig indag tibahon unuk Rehabya ino welatfag. Rehabya inowen umalikisi anggolo indag enepfag.

¹⁸Yizhar amloho Selomit ino ununggul unuk Yizhar inap onowe welatfag.

¹⁹Hebron inowen umalikisi uhan indag enepfahon wandabon ino Yeria, pirenehon Amarya, hinahanehon Yahaziel, uhanehon Yekameam welatfag.

²⁰Uziel umalikisi piren itano Mikha wandabon weregma ot Yisia welatfag.

²¹Merari umalikisi Mahli men Musi men welatfag. Mahli umalikisi Eleazar men Kis men welatfag.

²²Eleazar inowen ap umalik indag ta fug angge we hilani umalik eneg indag enepfag. Indag enepfareg war atfagma Eleazar ot unuk Kis umalikisiyen Eleazar aholani itano og enepfag.

²³Musi umalikisi hinahan itano ununuk Mahli, Eder, Yeremot men welatfag.

²⁴It obog toho Lewi inap ununggul unuk onowesi welatfahon arimano enebe winag isaruk lit ununuk suwesingga fam haharoho imbibag. Haharoho imbibahon arimano kabiniyon indag atfag sali mo ilig am wirig am turukmu likin fumahen 20 atfahon emberim filon welatfag. It arimano NINIKNI Allah ibam yabuk waruk lamuhup ulug lahap enepfag.

²⁵Ari tibahon fahet Daud inowen ele uruk lit, ”Israel ninap NINIKNI Allahn let neneptisimu alem siyahon eke inam atuk elehen ninindi yuwag toho welahereg NINIKNI Allah oho o Yerusalem aru mondabi welaruhu.

²⁶Ari regma Lewi inaben atam o sabo Allah men Ambi Atuk Ibam wiri fil halog til laruk latfahon ino men, sembahyang uruk lit wan turuk angge obog toho men paya roho walug laruk latfag hag toho fobik ari roho turuk lamuhup fug,” ibag.

²⁷Dauren fotog-fotogma ibag ane ino hikit toho Lewi inap kabiniyon indag atfag sali mo ilig am wirig am turukmu likin fumahen atfahon emberim filon eneg winag isaruk latfag.

²⁸It arimano unubahet Dauren ele uruk lit, ”Lewi inaben NINIKNI Allah ibam yabuk turuk lit Harun umalikisi Allah amingmingangge imam arimano let eneptuk lamuhup. Let eneptuk lit Allah ibam undama hili werehon arimano men selma elehet walinggoho oho ambeg ino men foroho lit Allah ibamen foroho angge arimano puhun toho umatuk lit Allah ibam haltuk ane eke hag eke hag seneg lamuhup.

²⁹Obog toho arimano seneg lit roti Allah fahet emberukon men, roti anggen fano roho lilibug tohon Allah olohotma yaltukon men, roti suwap turuk angge wa fug angge wiratukon men, wiratuk angge eke hag eke hag men Lewi inaben oho haloho emberuk lamuhup. Allah fahet imbik waharuk angge arimano wirimangge hele men kubag men fam wirim turuk lamuhup.

³⁰O sakan turukmu oho mo ubuk ik ohoma oho NINIKNI Allah wel tul ulug sini yunggultuk lamuhup.

³¹O sabit sambil men pikalem keron inam atuk sambil men Allah fam sembahyang uruk sambil winon oho sini yunggultuk lamuhup. NINIKNI Allah olohotma yabuk turuk lit likiya hupmu palu misig-misig enebe emberusa ane hikit toho winag isalug yabuk turuk lamuhup,” ulug hiyag isibag.

³²Hiyag isibag ane ari hikit toho Lewi inap arimanowen indam o sabo Allah men Ambi Atuk Ibam foroho latfag hag toho fobik oho onori Harun umalikisi arimanowen Allah ibam yabuk turukon let eneptuk lit Allah ibam foroho latfag.