Read Angguruk Yali 1 TAWARIKH 24 Bible Online

1 TAWARIKH 24 - Angguruk Yali bible

1 TAWARIKH 24

¹Hun Harun umalikisi uhan itano ununuk Nadab, Abihu, Eleazar, Itamar men welatfag. Nadab men Abihu men inikni war am fugmu malik indag ta fug angge tam war atfagma onotsi Eleazar men Itamar men Allah amingmingangge imam welatfag. Welatfagma Daud inowen Harunen ondohowonen ondohowon arimano yabuk wal taneg turukon hikit toho minggir enepfag. Minggir eneptukmu hun Eleazar umbusag Zadok men Itamar umbusag Ahimelekh menen Daud let turuk latfag.

⁴Minggir enebul ulug enebe winag isarukmen Eleazaren ondohowonen ondohowon onowesi anggolo regma Itamaren ondohowonen ondohowon onowesi tor angge welatfag. Ari rehen Eleazaren ondohowonen ondohowon palu nisanggo fuman 16 minggir eneptuk lit Itamaren ondohowonen ondohowon palu likinen minggir enepfag.

⁵Eleazaren ondohowonen ondohowon arimano men Itamaren ondohowonen ondohowon arimano menen yabuk wal taneg turuk lit winonen Allah ibam foroho lit winonen Allah wene uruk ane milal eneptuk latfag. Yabuk wal taneg turukon tu palimu tu apma puk fug angge yabuk tam turukon san, fobik turukon san ulug enehangge hik tibag.

⁶Hik tibag ane ari ap suwon raja men ap suwon-suwon winon men imam Zadok men Abyatar amloho Ahimelekh men imam winon onowesi roho welatfahon men Lewi inap onowesi men weregma hik tibag. Enehangge misig Eleazaren ondohowonen ondohowon fahet hik tulug misig Itamaren ondohowonen endetfahon fahet hik turuk latfag. Ari roho hik turukmen eneg ununuk enehangge unubam atfahon arimano suwesingga hahatuk ahun Semaya hun Netaneel amloho inowen haharoho imbibag.

⁷Enehangge tamon hun Yoyarib fam, pirenehon Yedaya fam,

⁸hinahanehon Harim fam, uhanehon Seorim fam,

⁹fuwabon Malkia fam, falfalikon Miyamin fam,

¹⁰sabiron Hakos fam, likinon Abia fam,

¹¹sohowon Yesua fam, numon Sekhanya fam,

¹²nanggolobon Elyasib fam, nisanggowon Yakim fam,

¹³nuwalon Hupa fam, nunggul hurikon Yesebeab fam,

¹⁴nuwal fumahon Bilga fam, nisanggo fumahon Imer fam,

¹⁵nanggolop fumahon Hezir fam, num fumahon Hapizes fam,

¹⁶soho fumahon Petahya fam, likin fumahon Yehezkel fam,

¹⁷sabit fumahon Yakhin fam, falfalik fumahon Gamul fam,

¹⁸fuwab fumahon Delaya fam, uhaneg fumahon Maazya fam atfag.

¹⁹Enehangge unubam atfag ane hikit toho Allah amingmingangge arimano NINIKNI Allah ibam kuruk lit yabuk turuk latfag. Yabuk turuk ane ari Israel inap INIKNI Allahn it unumba Harun hiyag itfagma aren it hiyag isibag ane hikit toho turuk latfag.

²⁰Lewi inap onowesi winon ununuk tuma ul: Amram umalikisi sehelimuwon Subael, Subael umalikisi sehelimuwon Yehdeya,

²¹Rehabya umalikisi onowe roho welatfahon Yisia,

²²Yizharen ondohowonen endetfahon Selomot, Selomot umalikisi sehelimuwon Yahat,

²³Hebron amloho wandabon Yeria, pirenehon Amarya, hinahanehon Yahaziel, uhanehon Yekameam,

²⁴Uziel amloho Mikha, Mikha umalikisi sehelimuwon Samir,

²⁵Mikha are Yisia, Yisia umalikisi sehelimuwon Zakharia,

²⁶Merari umalikisi Mahli, Musi, Yaazia men,

²⁷Merari amloho Yaazia umalikisi Syoham, Zakur, Hibri men,

²⁸Mahli umalikisi sehelimuwon Eleazar ap umalik indag tibag fuhon ino men,

²⁹Kis amloho Yerahmeel,

³⁰Musi umalikisi Mahli, Eder, Yerimot men welatfag. It obog toho Lewi inap ununggul unuk wal taneg welatfag.

³¹Onori Harun umalikisi arimanowen yabuk san tam, san fobik wituk lamuhup ulug enehangge hik tibag hag toho iren oho ap suwon Daud men Zadok men Ahimelekh men imam onowesi men Lewi inap onowesi men weregma enehangge hik tibag. Hik turuk lit tu owe, tu ot puk fug angge it obog toho fahet enehangge ambi roho hik tibag.