Read Angguruk Yali 1 TAWARIKH 26 Bible Online

1 TAWARIKH 26 - Angguruk Yali bible

1 TAWARIKH 26

¹Allah ibam sok foroho inap arimano oho minggir enepfag. It ununuk tuma umbul: Korah ahun Ebyasaf inowen ondohowonen endetfahon Kore amloho Meselemia inowen sok eke foroho latfag.

²Meselemia amloho wandabon Zakharia, pirenehon Yediael, hinahanehon Zebaja, uhanehon Yatniel,

³fuwabon Elam, falfalikon Yohanan, sabiron Elyoenai welatfag.

⁴Obed-Edom inowen oho sok eke foroho latfag. Allahn Obed-Edom ino ineyap turukmu amloho wandabon Semaya, pirenehon Yozabad, hinahanehon Yoah, uhanehon Sakhar, fuwabon Netaneel,

⁵falfalikon Amiel, sabiron Isakhar, sohowon Peuletai indag enepfag.

⁶Obed-Edom amloho Semaya umalikisi arimano enembong se roho turuk inap wereg lit it ununggul unuk onowesi atfag.

⁷Semaya umalikisi ununuk Otni, Refael, Obed, Elzabad men onori enehako roho turukon Elihu men Semakhya men welatfag.

⁸It arimano obog toho Obed-Edomen ondohowonen ondohowon welatfag. It unumalikisi men onori men enebe mangno roho teng pirenman nubam hilag likinen 62 welatfahon arimano obog tohowen enehako roho turuk lit iniyabuk fano roho wituk latfag.

⁹Meselemia umalikisi men ori men enebe mangno roho num fumahen 18 welatfag. Ir oho enembong se roho turuk inap welatfag.

¹⁰Merari inowen ondohowonen endetfahon Hosa inowen amloho eke unuk Simri indag tibag. Simri ino malik wandabon fug angge famen ikniyen hat hori fahet onowe hag toho welaruhun ulug lahabe fibag.

¹¹Hosa amloho pirenehon Hilkia, hinahanehon Tebalya, uhanehon Zakharia welatfag. Hosa umalikisi men ori men enebe mangno roho nuwalen welatfag.

¹²It arimanowen ununggul unuk wal-wal minggir enepfag ane hikit toho NINIKNI Allah ibam sok foroho latfag. Sok arimano foroho lit onori Lewi inaben NINIKNI Allah ibam yabuk turuk latfag hag toho iren oho turuk latfag.

¹³Ap ununggul unuk welatfahon arimano wal tanehen sok misig-misig foroho lamuhup ulug enehangge hik turuk lit aruma suwon, aruma toron puk fug angge ununggul unuk obog toho fahet ambi roho enehangge hik tibag.

¹⁴Enehangge hik turukmu sok yali filon forohowon fahet hum Selemia fam atfag. Nin enehangge hik turukmu sok iliko filon fahet Selemia amloho Zakharia indi anggat toho ap komo eneptuk latfahon fam atfag.

¹⁵Sok wiriko filon fahet Obed-Edom fam atukmu mun angge man angge emberuk ambeg forohowon fahet Obed-Edom umalikisi unubam atfag.

¹⁶Sok hubula filon men, sok unuk Syalekhet suwaleg latfahon kebunggalem laharukmu iraham werehon ino men forohowon fahet hun Supim men Hosa men unubam atfag. Sok misig foroho inap arimano sok winon foroho inap horogma unduhuk lit

¹⁷likiya hupmu ap falfaliken yali fil, ap uhan iliko fil, ap uhan wiriko fil, mun angge man angge emberuk ambeg piren itano iniraham ap piren-piren unduhuk latfag.

¹⁸Allah ibam hubula fil hili toron witfahon unuk Parbar alukema ap piren unduhukmu Parbar iraham funggalma ap uhan unduhuk lit Parbar ino foroho latfag.

¹⁹Sok foroho inap minggir enepfahon arimano hun Korah inowen endetfahonen ondohowon men Merari inowen endetfahonen ondohowon men welatfag.

²⁰Fano-fano angge Allah ibam foroho latfahon men aben Allah fahet imbik waharuk latfag angge men sok foroho inap onori Lewi inap arimanowen seneg latfag. It ununuk tuma ul:

²¹Gerson amloho Ladan inowen endetfahon misig unuk Yehiel welatfag.

²²Yehiel umalikisi Zetam men Yoel menen fano-fano angge NINIKNI Allah ibam foroho latfahon arimano seneg latfag.

²³It men hun Amram inowen ondohowonen endetfahon men Yizharen endetfahon men Hebronen endetfahon men Uzielen endetfahon menen iniyabuk ambiyeg turuk latfag.

²⁴Atamtam Musa amloho Gersom inowen indag tibahon Sebuel ino fano-fano angge Allah men Ambi Atuk Ibam foroho latfahon arimano seneg inap onowe welatfag.

²⁵Sebuel ot Eliezer inowen Rehabya indag tibag. Rehabya amloho Yesaya, Yesaya amloho Yoram, Yoram amloho Zikhri, Zikhri amloho Selomit welatfag.

²⁶Fano-fano angge ap suwon Daud men Israel inap ununggul unuk onowesi men sehen seneg inap palu suwon onowesi men palu toron onowesi menen tog aptuk lit huhulangge walug NINIKNI Allah ibam imbik waharuk latfahon arimano hun Selomit ori menen foroho latfag.

²⁸Hun Samuel fulu roho hiyag isaruk ahun ino men hun Kis amloho Saul men Ner amloho Abner men Zeruya amloho Yoab menen mun angge man angge Allah fahet emberuk latfahon obog toho Selomit ori menen foroho latfag.

²⁹Hun Yizhar inowen ondohowonen endetfahon Kenanya umalikisi menen Israel inap hal eneptuk lit unggum unubam welatfahon kong turuk latfag.

³⁰Hun Hebronen ondohowonen endetfahon Hasabya ori menen ap suwon raja unuk fam Israel inap ik Yordan hubula fil welatfahon arimano hal eneptuk lit NINIKNI Allah wel turuk ane oho haltuk latfag. Hasabya men ori men enehako roho turuk inap wereg lit enebe mangno roho teng-teng angge 1.700 welatfag.

³¹Hun Hebronen ondohowonen ondohowon ununggul unuk wal-wal welatfahon onowe hun Yeria welatfag. Hun Daud ino ap suwon lahibagma mo ilig am wirig am turukmu teng misigmen nubam hilag nuwalen 40 atfagma Daud otsiyen ap inine roho turukon hiyag enebul ulug Yeria ori obog toho yami enebil larukmen eneg o Yaezer Gilead kinang fam Yerian ondohowonen ondohowon inine roho turukon anggolo weregma hiyag enepfag.

³²Hiyag enepfagma ap suwon Daud inowen it obog toho onowe Yeria men hiyag isaruk lit, ”An nunuk fam Ruben inap, Gad inap, Manasye inap minggiroho winon men hal eneptuk lit Allah wel turuk ane oho haltuk lamuhup,” ulug lahap enepfag. Lahap enepfahon arimano ununggul unuk wal-wal welatfahon onowesi wereg lit inine roho turuk inap welatfag. It enebe mangno roho teng-teng angge 2.700 welatfag.