Read Angguruk Yali 1 TAWARIKH 27 Bible Online

1 TAWARIKH 27 - Angguruk Yali bible

1 TAWARIKH 27

¹Mo ilig am wirig am turukmen pikalem misig-misig inam atukmu Israel inap sehen senehon minggiroho palu enepfahon arimano wal tanehen it unubam imbibag ane hikit toho yabuk turuk latfag. Palu wal taneg enebe teng-teng angge 24.000 welatfahon arimano Israel inap ununggul unuk onowesi men sehen seneg inap palu suwon onowesi men palu toron onowesi men ap suwon raja amingmingangge winon menen milal eneptuk latfag.

²Hun Zabdiel amloho Yasobam ino pikalem atamon fam yabuk turuk latfahon onowe welatfag.

³At ino hun Peresen ondohowonen endetfahon wereg lit otsi milal eneptukmu it onowesi roho werehon winon at apma welatfag.

⁴O Ahohi ahun Dodai ino pikalem pirenehon fam yabuk turuk latfahon onowe welatfag. Hun Miklot ino at iraham wereg lit it onotsi milal eneptuk latfag.

⁵Allah amingmingangge imam Yoyada amloho Benaya ino pikalem hinahanehon fam yabuk turuk latfahon onowe welatfag.

⁶Benaya ino enehako roho turuk inap teng misigmen nubam hilag hinahan 30 arimano sehelimu wereg lit it onowe lahibagma amloho Amizabad ino at iraham wereg lit onotsi milal eneptuk latfag.

⁷Yoab ot Asael ino pikalem uhanehon fam yabuk turuk latfahon onowe welatfag. Welatfagma at ubalmangge amloho Zebaja ino it onowe lahibag.

⁸Hun Yizrah inowen ondohowonen endetfahon Samhut ino pikalem fuwabon fam yabuk turuk latfahon onowe welatfag.

⁹O Tekoa ahun Ikes amloho Ira ino pikalem falfalikon fam yabuk turuk latfahon onowe welatfag.

¹⁰Efraim ahun o Peloni indag atfahon Heles ino pikalem sabiron fam yabuk turuk latfahon onowe welatfag.

¹¹Hun Zerah inowen ondohowonen endetfahon o Husa indag atfahon Sibkhai ino pikalem likinon fam yabuk turuk latfahon onowe welatfag.

¹²Benyamin ahun o Anatot indag atfahon Abiezer ino pikalem sohowon fam yabuk turuk latfahon onowe welatfag.

¹³Hun Zerah inowen ondohowonen endetfahon o Netofa indag atfahon Maharai ino pikalem numon fam yabuk turuk latfahon onowe welatfag.

¹⁴Efraim ahun o Piraton indag atfahon Benaya ino pikalem nanggolobon fam yabuk turuk latfahon onowe welatfag.

¹⁵Hun Otnielen ondohowonen endetfahon o Netofa indag atfahon Heldai ino pikalem nisanggowon fam yabuk turuk latfahon onowe welatfag.

¹⁶Israel inap ununggul unuk onowesi ununuk tuma ul: [Ununggul unuk] — [Milal eneptuk ahun] Ruben — Zikhri amloho Eliezer Simeon — Maakha amloho Sefaca Lewi — Kemuel amloho Hasabya. Harun — Zadok Yehuda — Daud are Elihu Isakhar — Mikhael amloho Omri Zebulon — Obaja amloho Yismaya Naftali — Azriel amloho Yerimot Efraim — Azazya amloho Hosea Manasye hubula filon — Pedaya amloho Yoel Manasye yali filon — Zakharia amloho Yido Benyamin — Abner amloho Yaasiel Dan — Yeroham amloho Azareel

²³Atamtam NINIKNI Allahn ele uruk lit, ”Anden Israel inap inineyap enebuhukmu suhal mondeg hag amuhup,” ulug sali imbibag. Sali imbibag ane ari wenggel hibareg Daud inowen Israel inap enebe winag isaruk lit kabiniyon indag tibag sali mo ilig am wirig am turukmu likin fuman 20 atfahon emberim filon eneg winag isahuk pibag.

²⁴Pibag ane ari hikit toho he Zeruya amloho Yoab inowen Israel inap winag isaruk ane ak tibag angge famen aren tibag ane ino fahet Allahn olok hibareg alem angginon Israel inap unubam imbibagma Yoab inowen Israel inap winag isaruk ane ino imbisibag. Imbisibag ane ino fahet suwesingga ap suwon Daud inowen mun ane man ane turuk latfag ane haharoho imbibahon fam Israel inap enebe winag isibahon fahet hahatfag fug.

²⁵Hun Adiel amloho Azmawet inowen ap suwon raja anggengge o Yerusalem welatfahon arimano foroho latfag. Ap suwon anggengge o pumbuk suwon toron walinggoho foroho latfahon men o yaron fam foroho latfag angge men hun Uzia amloho Yonatan inowen seneg latfag.

²⁶Hun Kelub amloho Ezri ino suburu yabuk wituk inap onowe welatfag.

²⁷O Rama ahun Simei inowen anggur yabuk arimano foroho latfag. Hele anggur ahaluwe foroho ibam anggur yatuk ambeg welatfahon arimano o Syifmi ahun Zabdi inowen seneg latfag.

²⁸E zaitun men e ara men punumu yatuk latfahon arimano o Gederi ahun Baal-Hanan inowen foroho latfag. E zaitun ahaluwe foroho ambeg arimano Yoas inowen seneg latfag.

²⁹Wam sapi kinang Saron fam foroho latfahon arimano o Saron ahun Sitrai inowen seneg latfag. Wam sapi tonggoma foroho latfahon arimano hun Adlai amloho Safat inowen seneg latfag.

³⁰Ismael ahun Obil inowen wam unta arimano seneg latfag. Wam keledai heyon o Meronot ahun Yehdeyan seneg latfag.

³¹Wam domba o Hagri ahun Yazis inowen seneg latfag. It obog tohowen ap suwon Daud anggengge arimano foroho latfag.

³²Daud ikni Isai are Yonatan ino indi anggat teg lit suwesingga fam hahareg ane kim ha reg latfag. At inowen Daud komo ruruk latfag. Hun Hakhmoni amloho Yehiel inowen ap suwon umalikisi fet enesug latfag.

³³Hun Ahitofel inowen oho ap suwon raja komo ruruk latfag. O Arki ahun Husai ino ap suwon are welatfag.

³⁴Ahitofel ino war atfagma ubalmangge hun Benaya amloho Yoyada men Abyatar men lahibag. Ap suwon otsi sehen senehon onowe Yoab welatfag.