Read Angguruk Yali 1 TAWARIKH 5 Bible Online

1 TAWARIKH 5 - Angguruk Yali bible

1 TAWARIKH 5

¹Ruben ino hun Israel amloho wandabon welatfag angge famen Ruben inowen ikni uhe eke men nohoruk lit ubalma siyahap tibahon fahet ikniyen hat wandabon hag toho welaruhun fug ulug hiyag itfagma Israel amloho Yusuf eneg wandabon hag toho welatfag. Welatfag angge famen Yusuf ino wandabon hag toho wereg ulug suwesingga hun Israel umalikisi ununuk haharoho werehon fam hahatfag fug.

²Hun Israel umalikisi winon apma regma we amloho Yehuda eneg ine roho wereg latfag. Wereg latfag ane ariyen Yehuda inowen ondohowonen endetfahon eke fobik Israel inap onowe suwon lahibag.

³Hun Israel amloho wandabon Ruben umalikisi Henokh, Palu, Hezron, Karmi men welatfag.

⁴Hun Yoel amloho Semaya welatfag. Semaya amloho Gog welatfag. Gog amloho Simei welatfag.

⁵Simei amloho Mikha welatfag. Mikha amloho Reaya welatfag. Reaya amloho Baal welatfag.

⁶Baal amloho Beera ino Ruben inowen ondohowonen ondohowon arimano onowe weregma Asyur inap onowe suwon Tilgat-Pilneser inowen inggik hele waroho o Asyur kinangma imbisik libag.

⁷Beera ori arimanowen ondohowonen ondohowon ununggul unuk wal-wal welatfahon onowesi ununuk suwesingga fam haharoho imbibahon arimano onowe roho welatfahon Yeiel men Zakharia men

⁸Bela men welatfag. Bela ikni Azas, Azas ikni Sema, Sema ikni Yoel welatfag. Ruben inap arimano inibam o Aroer wereg lit kinang suwon o Nebo men Baal-Maon men seneg latfag.

⁹Ruben inap o Gilead kinang fam weregma enembohom anggolo atuken yali fil lekma libareg kinang ik Efrat ayegma werehon oho it ngi atfag.

¹⁰Ap suwon Saul welatfag li Ruben inap arimanowen Hagri inap men tog aptuk lit apmayap enepfareg inibam o sabo witfahon ilmig tibareg o Gilead kinang pisan toho yali fil yug toho welatfag.

¹¹Gad inap arimano Ruben inap inibam horog toho o Basan kinangma wereg lit enengginang hilihili o Salkha horogma imbik libag.

¹²It onowesi Yoel men ot Safam men onotsi piren Yaenai men Safat men o Basan welatfag.

¹³Gad inap winon ununggul unuk sabiren Mikhael inap, Mesulam inap, Syeba inap, Yorai inap, Yakan inap, Ziya inap, Eber inap men welatfag.

¹⁴It arimano inikni Abihail welatfag. Abihail ikni Huri, Huri ikni Yaroah, Yaroah ikni Gilead, Gilead ikni Mikhael, Mikhael ikni Yesisai, Yesisai ikni Yahdo, Yahdo ikni Bus welatfag.

¹⁵Hun Guni inowen endetfahon Abdiel amloho Ahi ino it onowe welatfag.

¹⁶It arimano o Gilead men o Basan men o pumbuk walinggoho welatfahon men o Saron wam foroho angginang ino atogman atogma welatfag.

¹⁷Yehuda inap onowe suwon Yotam weregma Israel inap onowe suwon Yerobeam welatfag li itano it arimano obog toho suwesingga Gad inap ununggul unuk haharoho werehon fam ununuk hahatfag.

¹⁸Ruben inap men Gad inap men Manasye inap minggiroho winon men tog aptukon teng-teng angge 44.760 welatfag. Iren sehen men karog men tog piyabangge men seneg lit tog aptuk ane enehako roho turuk latfag.

¹⁹It arimanowen Hagri inap, Yetur inap, Nafis inap, Nodab inap men tog aptuk lit

²⁰Allah fam enele hi roho urukmu Allahn an nubam fano wenggel neyehesama enele holmin pibareg inibil atfagma Hagri inap men laruk latfahon obog toho it ininggikmu atfag.

²¹Ininggikmu atfagma enembohom unta teng-teng angge 50.000 men, domba teng-teng angge 250.000 men, keledai teng-teng angge 2.000 men huhulangge hilaruk lit ap oho teng-teng angge 100.000 ininggik hele waroho og eneplug libag.

²²Allah inibil atfagma ap anggolo pinggi unusuruk lit it inibam ilmig tibareg yug toho weregman eneg fobik Asyur inaben ininggik hele waroho o Asyur kinangma imbisik libag.

²³Manasye inap minggiroho winon enebe anggolo wereg lit kinang Basan fam o Baal-Hermon men o Senir men tom Hermon horogma welatfag.

²⁴It ununggul unuk onowesi Hefer, Yisei, Eliel, Azriel, Yeremia, Hodawia, Yahdiel men welatfag. It arimanowen tog enehako roho aptuk lit unumalikisi fano roho sen enesug latfag ane ariyen ununuk su atfag.

²⁵Ununuk su atfag angge famen fobik Allah unumbasiyen wel turuk latfahon ino enembol yig utuk lit ap Allahn it enelukeman elehap tibag inaben tu Allah hag toho wereg ulug wel eneptuk latfag angge arimano iren oho wel eneptuk latfag.

²⁶Ari turuk latfag ane ari fahet Israel inap Inikni Allah inowen Asyur inap onowe suwon Pul unuk eke Tilgat-Pilneser suwalehon indi kahaltukmu Ruben inap men Gad inap men Manasye inap minggiroho winon arimano men ininggik hele waroho Asyur kinangma imbisik libag. Imbisik libagma ketiya oho o Halah men, o Hara men, ik Habor ayegma men, ik Gozan ayegma men yug toho wereg.