Read Angguruk Yali 2 TAWARIKH 1 Bible Online

2 TAWARIKH 1 - Angguruk Yali bible

2 TAWARIKH 1

¹Daud amloho Salomo ino ap suwon lahibareg Israel kinang inggik ine roho seneg latfag. Senegma NINIKNI Allah at men wereg lit let turukmu mondabi ine atfag.

²Misihim sambil Salomo inowen Israel inap onowesi obog toho, sehen seneg inap teng-teng angge 1.000 onowesi men, teng uhan 100 onowesi men, alem haloho emberuk inap men, otsi at let turukon men, ununggul unuk wal taneg onowesi welatfahon men wol enepfagma ambeg watfag.

³Ambeg watfagma Salomo it men ambiyeg o sabo fanowon NINIKNI Allah amingmingangge Musan lekman witfahon wereg ambeg lul ulug o Gibeon horogma punumu hubu lahaptuk ambeg libag.

⁴Peti Allah Wene Numen haharehon kilabeg angge tam o sabo fanowon fam foroho latfahon ino hun Daud inowen o Kiryat-Yearimen walug o sabo winon aren o Yerusalem witfahon elma imbik watfag angge famen

⁵hubu lahaptuk angge hun Hur inowen endetfahon Uri amloho Bezaleel inowen ine angge tembaga fam witfahon ino o Gibeon tam welatfag ambeg o sabo fanowon olohotma unduhuk lit weregma Salomo otsi menen Allah wel tul ulug libag.

⁶Libareg Salomo inowen o sabo fanowon alukema hubu lahaptuk angge ino fam NINIKNI Allah fahet wam teng-teng angge 1.000 waroho hubu lahapfag.

⁷Hubu lahapfareg hubanggo nohorukmen NINIKNI Allah ambeg waharukmu yet hibag. Yet harukmen Allahn ele hiyag utuk lit, ”Og nitmisi peruk lahenon ari haren heng napmihinmu Anden og hitmin,” ibag.

⁸Ari ibagma Salomo inowen ele uruk lit, ”An nikni Daud ino Haren hindi haruk lit anggoloenam let turuk latikinteg at ubalmangge an ap suwon lahap naptikin.

⁹Lahap naptikinmu anden numalikisi kinang alinlan winag isa fug teg hag toho mondoko werehon sen enesug lahimu ketiya Hat NIKNI Allahn an nikni Daud ubam sali imbinahon hikirap timihin.

¹⁰Anden Hat humalikisi aruma fet enesug lit mun ane man ane haloho emberuk laruhuken nindi anggarap naptuk lit mun ane man ane fahet alem noluk aruhuwen nindi wirikap napmihin. Nindi wirikap napmihin fug halug Hat humalikisi hum toho werehon aruma anden fet enesug lam fug teg laruhuk,” ibag.

¹¹Ibagma Allah inowen Salomo fam, ”Haren mun angge man angge fano-fano angge eke hag eke hag ninggikmu welalep perukon men, nunuk su amag perukon men, hat fahet inirim teg inap unusuruk ane men, amusun toho welale perukon fahet heng nabuk fug angge Hat humalikisi onowe welaruhun ulug lahap naptikin inap aruma fano fet enesug laruhuken nindi anggarap naptuk lit mun ane man ane fahet nolukap napmihin ulug heng nabehenma

¹²mun ane man ane alem obog toho fahet holuk aruhuwen hindi anggarap habuhuk. Haren heng nabehen fuhon oho Anden sebe roho og huruhukmu mun angge man angge fano-fano angge eke hag eke hag hinggikmu aruhumu hat hunuk oho su aruhu. Ari roho welaruhunmu ap suwon hat uwanma welatfahon men, fobik in amuhubon men misig oho hat tung teg laruhunon hag toho welaruhu fug,” ulug hiyag itfag.

¹³Hiyag itfagma Salomo ino o sabo fanowon o Gibeon punumu welatfag ambehen suhuloho o Yerusalem watfareg wereg lit Israel inap fet enesug latfag.

¹⁴Salomo inowen tog aptuk ane fahet wamen lisoho walug laruk angge teng-teng angge 1.400 men ap wam kuda fam lahalug larukon teng-teng angge 12.000 men andog enepfareg it winon unubam o pumbuk kereta foroho ambeg wal taneg welamuhup ulug hiyag isibareg winon unubam an horogma o Yerusalem welamuhup ulug hiyag isibag.

¹⁵Salomo welatfag li itano o Yerusalem perak emas ili rurukon arimano helep ik pilikmu mondeg hag toho mondeg latfag. E sahi ineyon tom Libanon famen walug watfahon oho farema e anggolo wereg hag toho mondeg latfag.

¹⁶Ap suwon otsi arimanowen onowe Salomo fahet wam kuda o Mesir men o Kilikia men onggo paloho wak laruk lit

¹⁷wamen lisoho walug laruk angge kereta o Mesir onggo palik laruk latfag. Wam kuda arimano wal taneg fahet onggo uang perak teng falfaliken 150 fam paltuk latfag, kereta misig fahet onggo uang perak teng-teng angge 600 fam paltuk latfag. Onggo paloho wak laruk latfahon arimano Salomo otsiyen minggiroho Het inap onowesi men Siria inap onowesi men unubam ayeg watuk latfag.