Read Angguruk Yali 2 TAWARIKH 11 Bible Online

2 TAWARIKH 11 - Angguruk Yali bible

2 TAWARIKH 11

¹Salomo amloho Rehabeam ino o Yerusalem watfareg Israel inap ik eleruk fil werehon arimano anden sen enesug laruhuken suhuloho an ninggikmu amag ulug tog abuhuk pibareg Yehuda inap men Benyamin inap men enesehelimuwen sehen seneg inap tog aptuk ane inindi anggat tohon teng-teng angge 180.000 andog enepfag.

²Ari turukmu itano NINIKNI Allahn amingmingangge nabi Semaya fam ele hiyag utuk lit,

³”Rehabeam men umalikisi Yehuda inap men Benyamin inap men hiyag isamihinon tu:

⁴NINIKNI Allahn ele uruk lit, ’Honori Israel inap men tog abul ulug wilip amuhup fug. Hinibam man-man lalihip. Honori minggiroho enemu atuson Anden perikik ane hikit toho teko larisi,’ ehek imihin,” ulug hiyag itfag ane ino hun Semaya inowen hiyag isibagma it arimanowen NINIKNI Allahn tem toho hiyag nesehek ulug Yerobeam men tog abuk fug angge inibam libag.

⁵Rehabeam ino o Yerusalem yug toho wereg lit o pumbuk Yehuda kinang men Benyamin kinang men fam werehon elehet yaron walinggoho oko kilaptuk latfag.

⁶O pumbuk elehet walinggoho oho fibahon ununuk tu: Betlehem, Etam, Tekoa,

⁷Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon, o Hebron.

¹¹O pumbuk arimano walinggoho elehet ineyon oho fibareg o arimano seneg lamuhup ulug ap suwon-suwon lahap enepfag. Lahap enepfareg suburu men e zaitun ahaluwe men hele anggur ahaluwe men andog toho foroho lamuhup ulug kilapfag.

¹²O pumbuk arimano fam ap seliyon kik wamuhup tohon ulug sing men fit men anggolo roho foroho latfag. Ari roho turuk lit Rehabeam inowen Yehuda kinang men Benyamin kinang men ine roho seneg latfag.

¹³Ari roho turukmu Allah amingmingangge imam men Lewi inap men o Israel kinang atogman atogma welatfahon arimano Rehabeam ibil atfag.

¹⁴Ap suwon Yerobeam men umalikisi menen Lewi inap NINIKNI Allah amingmingangge imam wereg lit iyabuk wituk lamuhup fug ulug hiyag isaruk latfagma Lewi inap arimano inibam men enembohom endetuk ambeg men embeselug o Yehuda kinang men Yerusalem men welamuhuk ulug libag.

¹⁵Libagma Yerobeam inowen Israel inap enesehelimuwen Lewi inap fuhon eneko imam in enepfag. In enepfahon arimano mungguwat men wam sapi hag angge Yerobeamen witfahon arimano men enemingmingangge wereg lit Yerobeamen punu ke hubu lahaptuk ambeg witil laruk latfahon foroho latfag.

¹⁶Ari roho weregma Lewi inap Yehuda kinang embeselug o Yerusalem waharukmu it onombolim Israel inap ununggul unuk obog toho sehelimuwon inindi wirik toho Israel inap INIKNI Allah fam wenggel haruk latfahon o Yerusalem waharuk latfag. O Yerusalem waharuk lit NINIKNI Allah nunumbasiyen wel turuk latfahon niren oho wel tul ulug wam waroho hubu lahaptuk latfag.

¹⁷It arimano ap suwon Rehabeam ibil atuk latfag ane ariyen Rehabeam inowen Yehuda kinang ine roho seneg latfag. Ari roho ap suwon unubabut fanowon Daud men Salomo men onombolim larukmen eneg mo ilig am wirig am turukmu hinahan atfag.

¹⁸Rehabeam inowen ap suwon Dauren endetfahon Yerimot ahaloho Mahalat hilibag. Mahalat isinga Abihail ino hun Isai inowen endetfahon Elhiab ahaloho welatfag.

¹⁹Mahalat inowen umalikisi Yeus, Semarya, Zaham men indag enepfag.

²⁰Rehabeam inowen uhe pirenehon Absalom ahaloho Maakha hilibag. Maakha inowen Abia, Atai, Ziza, Selomit men indag enepfag.

²¹Rehabeam inowen Mahalat men Maakha men onombolim uhesi num fimahen 18 hilibareg nin sebe roho hiyap teng pirenman nubam hilag falfaliken 60 ibam kilap enebik watfag. Hiyap arimanowen ap umalik teng misigmen nubam hilag misig 28 men hilani malik teng piren nubam hilag falfaliken 60 men indag itfag. Rehabeam inowen uhesi winon we tot indi enesug lit Absalom ahaloho Maakha indi anggolo reg latfag.

²²Rehabeam indimuwen wenggel haruk lit an war aruhukmu Maakha amloho Abia an nubalmangge ap suwon lahaku pibareg Abia ino ori fahet onowe roho welaruhu ulug lahapfag.

²³Lahapfareg indi anggat toho wenggel haruk lit umalikisi winon arimano unubam o pumbuk elehet yaron walinggoho ohowon seneg lamuhup ulug hiyag isibagma Yehuda men Benyamin men kinangma libareg kinang atogman atogma o wal taneg yug toho welatfag. Weregma Rehabeam inowen hiyap anggolo og isibareg likiya hupmu suburu su roho og isarukmen eneg welatfag.