Read Angguruk Yali 2 TAWARIKH 12 Bible Online

2 TAWARIKH 12 - Angguruk Yali bible

2 TAWARIKH 12

¹Ap suwon Rehabeam ino nin sebe roho ine atfareg NINIKNI Allahn ari-ari turuk lamuhup ulug imbibahon imbisibagma umalikisi Israel inaben oho ap suwonen tibag ane hikit toho NINIKNI Allah ele embeseruk lit

²enembol yig utuk latfag. Yig utuk latfag ane ari fahet Rehabeam ap suwon weregman eneg mo fuwaben libagma Mesir inap onowe suwon Sisak ino o Yerusalem inap men tog abul ulug watfag.

³Waharuk lit wam kudan lisoho walug laruk angge teng-teng angge fam larukon 1.200 men, wam kuda fam lahalug larukon teng obog sehelet obog 60.000 men, Libia inap, Suki inap, Etiopia inap men Mesir inap onowe ibil atfahon enebe winag isa fug toho men o Mesir kinangman ambiyeg watfag.

⁴Watfareg o Mesir inap onowe suwon inowen o pumbuk Yehuda kinangma werehon elehet walinggoho ohowon arimano ilmig tibareg o Yerusalem oho senerik lamin ulug Yerusalem horogma watfag.

⁵Watfagma Rehabeam men Yehuda inap onowesi hun Sisak fahet enekolen inibam wal taneg embeselug o Yerusalem watfahon men palu roho weregma Allah amingmingangge nabi Semaya ino enembeg libareg unubam ele uruk lit, ”NINIKNI Allahn ele urukon tu holeg lamok: Hiren An henembol yig nitikipmu Anden oho nambol yig hisaruk lit Sisak inggikmu hunumbaharuk lahi ehek,” ulug hiyag isibag.

⁶Ari ulug hiyag isibagma Yehuda inap onowesi men ap suwon Yerobeam menen inindi apma roho enele uruk lit, ”NINIKNI Allahn tem ehek,” ibag.

⁷Inindi apma roho enele urukmu NINIKNI Allahn hol isibareg Semaya fam ele uruk lit, ”Iren apmayap taruk lit siyag ane turukuk ehesama Anden it elehap enebuhuk fug. An nundama ahe laharisiyon ino hun Sisak feneyen o Yerusalem fam hik esele angge famen we tot welamuhukteg Anden ap aruma windat enebuhuk.

⁸Windat enebuhuk angge famen Mesir inap onoweyen apmayap enebuhumu ap aruma at amingmingangge wereg lit Allah apma wereg ane men ap suwon-suwon kinangma werehon enepma wereg ane men wirim teg eleg ulug onoluk aruhu,” ibag.

⁹Ari ibagma Mesir inap onowe suwon Sisak ino o Yerusalem kibareg fano-fano angge NINIKNI Allah ibam men ap suwon ibam men foroho latfahon obog toho yoholiyangge hilalug tog piyabangge hun Salomoen umbagpag turuk angge emas fam witfahon oho hilalug libag.

¹⁰Tog piyabangge hilibahon ubalma ap suwon Rehabeam inowen tembaga ineyon fam tog piyabangge keron witfag. Witfareg tog piyabangge aruma foroho lamuhup ulug ap suwon ibam sok foroho inap og isibag.

¹¹Og isibareg Rehabeam ino hundig-hundig Allah ibam kurukmu ap suwon ibam sok foroho inap at hondoholug larukonen tog piyabangge arimano oko walug senegman eneg ap suwon Allah ibamen wilip atug larukmu sok foroho inaben tog piyabangge arimano nin hebeloho hili it wit isibag ambeg imbik laruk latfag.

¹²Rehabeam inowen indi apma roho siyag ane tirikik ibag ane fahet NINIKNI Allahn olok haruk lit mondabi siyahap tuhuk pibag ane imbisibag. Yehuda inap enesehelimu fano ane we tot weregma yet isibareg NINIKNI Allahn alem mondabi angginon unubam imbibag fug.

¹³Imbibag fugmu ap suwon Rehabeam ino o Yerusalem wereg lit nin ine atfag. Rehabeam indag tibag sali mo ilig am wirig am turukmen teng misigmen nubam hilag nunggul huriken 41 atfagma Yehuda inap onowe suwon lahibareg o Yerusalem NINIKNI Allahn nunuk wel naptuk ambeg ulug Israel inap ununggul unuk obog toho enesehelimuwen eneko mumal tibag ambeg wereg lit umalikisi fet enesugmen eneg mo nanggolop fimahen 17 atfag. Rehabeam isinga o Amon hiyap unuk Naama welatfag.

¹⁴Rehabeam indi obog tohowen NINIKNI Allah yami ruk fug angge siyag ane anggolo turuk latfag.

¹⁵Rehabeam oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane ak tibag ambehen tulug obog tibag ane fahet suwesingga Allah amingmingangge nabi Semaya men Ido menen turuk latfag ane fahet haharehon fam paloho imbibag. Suwesingga ari fam Rehabeam inowen ondohowonen ondohowon ununuk hahareg lit wereg. Rehabeam inowen ap suwon lahibag sambilen tulug war atfag sambil fam Yerobeam men tog aptukmen eneg welatfag.

¹⁶Welatfareg war atfagma Rehabeam ino umbasi o pumbuk unuk Daud suwalfahon fam sal eneptuk latfag ambeg ar oho salfag. Salfagma amloho Abia ikni ubalma ap suwon lahibag.