Read Angguruk Yali 2 TAWARIKH 14 Bible Online

2 TAWARIKH 14 - Angguruk Yali bible

2 TAWARIKH 14

¹Welatfareg war atfagma Abia ino umbasi o pumbuk unuk Daud suwalfahon fam sal eneptuk latfag ambeg ar oho salfag. Salfagma amloho Asa ikni ubalma ap suwon lahibag. Lahibagma Asa inowen Yehuda inap sen enesugmu umalikisi inindi yuwag toho weregman eneg mo ilig am wirig am turukmu numen atfag.

²Ap suwon Asa inowen NINIKNI Allah aren wel turuk latfahonen fano peruk ane eneg turuk latfag.

³Ari roho turuk lit ap o winamonen tu Allah hag toho wereg ulug wel eneptuk angge fahet wam waroho yaltuk ambeg men hubu lahaptuk ambeg punu ke witfahon arimano men siyahap tibisil libareg usa ahalep halog tebeseruk lit e usa ahen uwag hutuk tibibahon oho paloho hik isibag.

⁴Hik isibareg umalikisi Yehuda inap unubam ele uruk lit, ”NINIKNI Allah nunumbasiyen wel turuk latfahon eneg yami ruruk lit Aren tu men ari men turuk lamuhup ulug imbibahon hikit toho turuk lamuhup,” ulug hiyag isibag.

⁵Hiyag isibareg o Yehuda kinangma oho o kema-kema punumu wam waroho yaltuk ambeg men amben fano angge yaloho hubu lahaptuk ambeg men siyahap tibisil libag. Siyahap tibisil libareg Yehuda inap fet enesug lit weregma inindi yuwag toho welatfag.

⁶NINIKNI Allahn Asa foroho lit weregma ap seliyon misig oho at men tog abik watfag fug. O itano li Asa inowen Yehuda kinang fam o pumbuk arimano walinggoho elehet ineyon oho feruk latfag.

⁷Elehet arimano uwan wa fug angge Asa inowen Yehuda inap unubam hiyag isaruk lit, ”NINIKNI Allah niren wel turuk laheyon fahet nenekol toho welatukukmu ap seliyon nit walinggoho werehon arimanowen nit nunusuhup tohon ulug Allahn sen eneptisi. Sen eneptisimu ap misihen oho nenele ying nenebik waharuk elehen kinang aru ninine roho seneg lahe. Ari fahet o pumbuk aruma fam ap seliyon kik wamuhup tohon ulug elehet walinggoho oho fuhuk. Elehet arimano waruk lit sok kurukon men sok latuk angge men wibuhukteg o yaron ap kahal enesug ambeg oho witil lahakuk,” ulug hiyag isibag. Hiyag isibag ane ari hikit toho elehet arimano fano oho feruk latfag.

⁸Asa otsi Yehuda inap fit men tog piyabangge suwon senehon enebe teng obog sehelet obog 300.000 welatfag. At otsi Benyamin inap sehen men tog piyabangge toron senehon enebe teng-teng angge 280.000 welatfag. It obog tohowen enehako roho turuk latfag.

⁹Misihim sambil Etiopia ahun Zerah inowen Yehuda inap men tog abuhuk ulug otsi enebe teng-teng angge winag isa fug tohon men wam kudan lisoho walug laruk angge teng nanggoloben 300 men o Maresa watfag.

¹⁰Watfagma Asa otsi menen unusik lul ulug o Maresa horogma Zefata tonggoma libareg Zerah otsi onorohole fil luhal atfag.

¹¹Luhal atfareg Asa inowen ele hi roho NINIKNI Allah fam sembahyang uruk lit, ”NINIKNI Allah, ap inine elehonen ap inine werehon men tog aptuk halug ap misihen oho let enebuk fug teg. We Haren eneg let enebuk teg lahen. Ari fahet let nenebik ma! Niren we Hat hubam eneg wenggel hiyaruk lit ap enebe winag isa fug toho wahason aruma men Hat hunuk fam tog abul ulug wahe. Hat eneg NINIKNI Allah welahen. Haren timin peruk lahenon ap kinangmon misihen oho apmayap tuk fug teg,” ibag.

¹²Ari ibagma NINIKNI Allahn Etiopia inap arimano Asa otsi Yehuda inap onolohotman apmayap enepfag. Apmayap enepfagma Etiopia inap arimano linggik-longgo urukmu

¹³Asa otsi menen muko unusil laruk lit o Gerar imbisik libag. NINIKNI Allah men otsi Yehuda inap menen Etiopia inap arimano mulangge unusibagma nin hebeloho in am fug teg latfag. In am fug teg latfagma Yehuda inaben Etiopia inap enenggengge anggolo huhulangge hilibag.

¹⁴Huhulangge hilibagma NINIKNI Allahn o pumbuk Gerar walinggoho werehon obog toho enekolap eneptukmu Asa otsi menen pin kuruk lit enenggengge anggolo welatfahon arimano huhulangge hilaruk latfag.

¹⁵Hilibareg wam foroho inap o saboma welatfahon arimano oho apmayap eneptuk lit enembohom kambing domba unta anggolo hilibareg o Yerusalem suhuloho watfag.