Read Angguruk Yali 2 TAWARIKH 15 Bible Online

2 TAWARIKH 15 - Angguruk Yali bible

2 TAWARIKH 15

¹Allah ahime fanowon ino hun Oded amloho Azarya ubam atfagma

²Asa ambeg libareg ele uruk lit, ”Nikni Asa, hat men Yehuda hinap men Benyamin hinap menen holeg lamek! Hit NINIKNI Allah men welamuhup halug At hit men welaruhu. Hiren At yami ruruk lamuhup halug hiyahakup. Hiren henembol yig utuk lamuhup halug Aren oho ambol yig hisahu.

³Israel inap arimano amusun toho Allah we tem werehon fam wenggel ha fug angge welatusa. Onowesi imam arimanowen tuk teg ane fahet milal eneptuk elehen Allahn tu men ari men turuk lamuhup ulug komo enepfag ane enepeleg teg latusa.

⁴Asengseng haruk lit eneg INIKNI Allah ambeg hebeloho laruk latusa. At yami ruruk lit Aren hiyag nabusa peruk latisi ane hikit toho hiyaharuk latusa.

⁵O itano li ap kinang atogman atogma werehon it-it wat-war atuken ap o kema-kema la fug teg latusa.

⁶Allahn alem angginon eke hag eke hag unubam emberuk lit inindi nonghonga feserukmu enele wal taneg urukon it-it yik aptuk lit o pumbuk ekeyen eke siyahap eneptuk latusa.

⁷Ari fahet ketiya hit hinindi wirik toho wereg lit fano tul peruk lahebon hinine roho turuk lamek! Sat toho turuk lamuhubon fahet onggo og hisahuwon wep toho wereg!” ulug hiyag isibag.

⁸Ari ulug nabi Azarya inowen hiyag isibagma ap suwon Asa inowen holfareg indi wirik toho usangge ap inindimu siyahap eneptuk angge kinang Yehuda men Benyamin men o pumbuk tom Efraim werehon aren ilmig tibahon fam welatfahon obog toho elehap tibag. Elehap tibareg NINIKNI Allah fahet hubu lahaptuk ambeg Allah ibam alukema welatfahon ino nin hebeloho fanowap tibag.

⁹NINIKNI Allah Asan wel turuk latfahon ino Asa men weregma yet hibareg Efraim inap, Manasye inap, Simeon inap menen Asa ibil amuhuk ulug enebe anggolo kinang Asan senehon fam pog ninap welamuhuk ulug waharuk latfag. It arimano men umalikisi Yehuda inap men Benyamin inap men Asa inowen wol enepfagma

¹⁰o Yerusalem palu arik watfag. Asa ap suwon lahibag sambilen mo ilig am wirig am turukmen nuwal fimahen 15 libagma pikalem hinahanehon fam ap arimano obog toho o Yerusalem watfareg

¹¹NINIKNI Allah wel tul ulug huhulangge hilibahon wam sapi teng pireneg fimahen 700 men wam domba teng obog sehelet obog 7.000 men waroho hubu lahapfag.

¹²Hubu lahapfareg NINIKNI Allahn unumbasi unubam, ”An men hit men nininggik ahandip toho welamuhuk,” ulug sali imbibahon ineyap turuk lit, ”Hat nunumbasiyen wel haptuk latfahon niren oho nenehime men nenebe obog tohowen yami haptuk lamuhuk.

¹³Ap san-san abet hiyabet, suwon toronen Hat nit Israel ninap NINIKNI Allah yami haptuk laruhu fug halug war aruhu,” ulug sali imbibag.

¹⁴Sali imbibag ane ari pinggong men puhuli men enele hum toho watuk lit enele hi roho, ”We tik-tem toho ehe,” uruk latfag.

¹⁵Tem toho uruk latfag ane ari fahet Yehuda inap obog tohowen enehiyeg haruk latfag. Inindi obog tohowen Allah fam sali emberuk lit enehimeyen oho NINIKNI Allah yami ruruk latfagma NINIKNI Allahn aluke yig isaruk lit fet enesugmu ap seliyon walinggoho werehonen siyahap enebik wam fug angge werehen Yehuda inap arimano inindi yuwag toho welatfag.

¹⁶Weregma Asa ambiyanga Maakha inowen e uwag Allah hiyap angge hag toho wereg perukon unuk Asyera fahet hutuk tibibahon ino Asan heneko lilibug tibisibareg ik Kidron ayegma indok yale fisik libag. Yale fisik libareg ambiyanga Maakha ino fam hiyag utuk lit, ”Haren usangge ap ininggaliyap eneptukon ari hutuk teberikinmu hiyap suwon welaruhun fug,” ulug pilapfag.

¹⁷Asa ap suwon oluk wereg li Israel inaben usangge fahet punumu kema-kema hubu lahaptukmen eneg welatfag angge famen inikni Asa ino indi piren teg eleg lit NINIKNI Allah fam wenggel haruk latfag.

¹⁸Allah fam wenggel haruk lit ikniyen Allah fahet eke hag eke hag imbibahon arimano Allah ibam fano-fano angge foroho ambeg imbik kibareg at inggarehen oho Allah fahet perak men emas men Allah wel turuk lit wan teg angge winon men imbik kibag.

¹⁹Imbik kibareg Asa umalikisi Yehuda inaben o pumbuk winon men tog abuk fug angge weregman eneg mo ilig am wirig am turukmu teng misigmen nubam hilag likinen 35 atfag.