Read Angguruk Yali 2 TAWARIKH 16 Bible Online

2 TAWARIKH 16 - Angguruk Yali bible

2 TAWARIKH 16

¹Ap suwon Asa inowen Yehuda inap fet enesugmen mo ilig am wirig am turukmu teng misigmen nubam hilag sohowen 36 atfagma Israel inap onowe Baesa inowen Yehuda inap arimano apmayap enebuhuk ulug ik ambut fil libareg Yehuda kinangman kuk wilip am turukon sap enesug ambeg ulug o Rama pumbuk walinggoho elehet waruk latfag.

²Ari turuk latfag ane fahet hol hibareg Yehuda inap onowe Asa inowen fano-fano angge emas perak Allah ibam men at ibam men foroho latfahon wibareg o Siria inap onowe suwon Benhadad og irik lalihip ulug otsi mon enepfagma o Damsyik walug libag.

³Walug libareg Asa otsiyen Benhadad hiyag utuk lit, ”Ninikni Asa inowen irisiyon tu holeg lamin: Hat hikni men an nikni menen mangno roho welamuhuk ulug sali imbibag hag toho an men hat men oho nininggik ahandip toho welamuhuken sali umbul. Sali umbulen fano-fano angge emas perak notsiyen walug wahason aruma og hutuk lahi. Og hitminmu haren Israel inap onowe Baesa men mangno roho welamuhuk irikin ane apmayap tuhunmu Baesa ino holuhureg ine eleg atuk lit an men tog abuhuk peruk ane embeselug suhuloho ibam lahu irisi,” ulug hiyag itfag.

⁴Hiyag itfagma Benhadad inowen fano pibareg otsi sehen senehon onowesi unubam o pumbuk Israel kinangma werehon men tog abik lalihip ulug hiyag isibagma libareg o Iyon, Dan, Abel-Maim, o pumbuk roti anggen foroho ambeg kinang Naftali fam werehon obog toho halog tibisil libag.

⁵Halog tibisil libag ane fahet hol hibareg Baesa inowen o Rama walinggoho elehet waruk ane imbisibag.

⁶Imbisibagma ap suwon Asa inowen umalikisi Yehuda inap obog toho hiyag isaruk lit e helep hun Baesa inowen o Rama walinggoho elehet wahuk ulug emberisiyon arimano wak lalihip ulug hiyag isibag ane hikit toho e helep hun Baesa inowen imbibahon wak libareg walug watfag. E helep walug watfahon arimano hun Asa inowen wibareg o pumbuk Geba men Mizpa men walinggoho elehet wak libag.

⁷O itano li fulu roho yet halug hiyag isaruk ahun Hanani ino Yehuda inap onowe Asa ambeg watfareg at ubam ele uruk lit, ”Haren NINIKNI Allah haren oho wel turuk lahenonen an let nabuhu puk fug angge Siria inap onowe suwonen eneg let nabuhu ulug wenggel harikin ane ari fahet Siria inap haren apmayap eneplen angge famen hat hinggikmuwen wilip atusa.

⁸Indam Etiopia inap sehen senehon men Libia inap sehen senehon men enebe teng-teng angge wereg lit ap anggolo wam kuda fam lahalug larukon men kereta wam kudan lisoho walug laruk angge fam larukon menen inine roho turuk latfag angge famen haren NINIKNI Allahn let napmisi ulug wenggel harikinmu Aren it arimano hat hinggikmu emberisi.

⁹NINIKNI Allah inowen ap inindi piren teg eleg angge nubam wenggel harukon arimano inineyap enepmin ulug yami eneptuk lit ilen ap kinang atogman atogma werehon obog toho kim isil laruk. Haren hindi misig toho At ubam wenggel ha fug angge hapelehen sohu-sohu ane tirikin. Ari fahet o yoho famen tulug fobik oho ap seliyonen hunusik waharuken hat tog aptukmen eneg welaruhun,” ulug hiyag itfag.

¹⁰Hiyag itfag ane ari fahet undama ahe lahibagma Asa inowen fulu roho yet halug hiyag isaruk ahun ino senetfareg ap siyag ane turukon kilap eneptuk ambeg kila fisibag. O itano li ak tibareg Asa inowen umalikisi Yehuda inap enesehelimuwon oho enele ying eneptuk latfag.

¹¹Ap suwon Asa oluk wereg lit turuk latfag ane tuma tor angge haharoho emberuk lahe. Aren yabuk seneg lit turuk latfag ane ak tibag ambehen tulug obog tibag ane fahet suwesingga Yehuda inap onowesi men Israel inap onowesi menen turuk latfag ane fahet haharehon fam paloho imbibag.

¹²Hun Asa ap suwon lahibag sali mo ilig am wirig am turukmu teng misigmen nubam hilag nisanggowen 39 atfagma ouk ubam atukmu uyug pirenet siyag atfag. Welatfareg ouk ino anggin atfag angge famen Asa inowen NINIKNI Allahn let nabuhu puk fug angge we ap hihir eneptuk inaben let nabusa ulug wenggel haruk latfag.

¹³Welatfareg ap suwon lahibag sali mo ilig am wirig am turukmu teng misigmen nubam hilag nunggul huriken 41 atfagma hun Asa ino war atfag.

¹⁴War atfagma Asa wareg angge ino o pumbuk Daud fam inggareg fahet helep fo ribag ambeg kilapfag. Kilapfag ambeg ino e ahaluwe amben fanowon men amben fano angge eke hag eke hag ap inindi anggat tehonen tag toho wirihon men tuwalegma wareg angge emberimu imbik kibag. Imbik kibareg at fahet ninindi ulug indok suwon munggaltuk latfag.