Read Angguruk Yali 2 TAWARIKH 17 Bible Online

2 TAWARIKH 17 - Angguruk Yali bible

2 TAWARIKH 17

¹Asa war atfagma amloho Yosafat ubalmangge ap suwon lahibareg ine atfagma Israel inaben at apmayap tuk fug teg latfag.

²Yosafat inowen otsi sehen senehon unubam o pumbuk Yehuda kinangma werehon elehet yaron walinggoho oho ambeg wal taneg welamuhup ulug hiyag isibareg otsi winon unubam Yehuda kinang men o Efraim pumbuk nikni Asan ilmig tarisiyon arimano men foroho lamuhuben wal taneg welamuhup ulug mon enepfag.

³Umba Daud we ket eneg ap suwon lahibareg atamtam fano ane turuk latfag hag toho Yosafat inowen oho turukmu yet hibareg NINIKNI Allah at men welatfag. Usangge ununuk Baal arimano wel enebuk fug angge

⁴Allah ikniyen wel turuk latfahon aren oho yami ruruk latfag. Yami ruruk lit Israel inap onowesiyen turuk latfag hag toho tuk fug angge Allahn tu men ari men turuk lamuhup ulug komo enepfag ane hikit toho turuk latfag.

⁵Ari roho turukmu NINIKNI Allahn let turuk lit weregma Yosafat inowen kinang obog toho ine anggolo roho seneg latfag. Senegma Yehuda inap arimanowen fano-fano angge anggolo og irik waharukmu Yosafat tung atfag.

⁶NINIKNI Allah ele holtukmen eneg indi wirik atfagma tu Allah hag toho wereg ulug wel eneptuk angge fahet hubu lahaptuk ambeg punu ke witfahon arimano elehap turuk lit e usa ahen uwag hutuk tibibahon arimano heneko hik isibag.

⁷Ap suwon lahibag sambilen mo ilig am wirig am turukmen hinahan atfagma Yosafat inowen Allahn tuk teg ane fahet komo enepfahon ap o pumbuk Yehuda kinangma werehon obog toho milal enebik lalihip ulug otsi at iraham welatfahon Benhail, Obaja, Zakharia, Netaneel, Mikha men mon enepfag.

⁸Mon enepfagma NINIKNI Allahn komo enepfag ane suwesingga fam haharoho imbibahon ino walug laruk lit Lewi inap ununuk Semaya, Netanya, Zebaja, Asael, Semiramot, Yonatan, Adonia, Tobia, Tob-Adonia men, imam Elisama men Yoram men it men ambiyeg libag. Libareg o pumbuk Yehuda kinangma werehon obog toho walinggoho pen isil laruk lit ap obog toho Allah Wene milal eneptuk latfag.

¹⁰NINIKNI Allahn ap suwon wereg ambeg Yehuda kinang walinggoho werehon obog toho enekolap enepfagma Yosafat men tog abik waharuk latfag fug.

¹¹Filistin inaben hundig-hundig Yehuda inap onowe og umon fano-fano angge men ili ruruk angge perak men walug waharukmu Arab inaben oho wam domba yuhambukon teng-teng angge 7.700 men wam kambing yuhambukon teng-teng angge 7.700 walug watfag.

¹²Ari roho turukmen eneg Yosafat ino mondabi ine atfareg Yehuda kinangma o yaron elehet ineyon walinggoho ohowon men o pumbuk suburu roti anggen foroho ambeg men witil laruk latfag.

¹³O pumbuk witfahon arimano fam mun angge man angge anggolo foroho latfag. Yosafat otsi sehen senehon enehako roho turukon o Yerusalem welatfag.

¹⁴Sehen seneg inap arimano ununggul unuk wal taneg werehon hikit toho iniyabuk turuk latfahon tu: Ununggul unuk Yehuda inap onowe hun Adna welatfag. Adna inowen otsi sehen senehon enebe teng-teng angge 300.000 milal eneptuk latfag.

¹⁵Adna iraham welatfahon Yohanan inowen otsi sehen senehon teng-teng angge 280.000 milal eneptuk latfag.

¹⁶Yohanan iraham welatfahon hun Zikhri amloho Amasia inowen otsi enekol eleg toho turukon enebe teng-teng angge 200.000 milal eneptuk latfag. Amasia ino indiyen NINIKNI Allah fahet yabuk wituk laruhuk ulug yabuk turuk latfag.

¹⁷Ununggul unuk Benyamin inap onowe hun Elyada welatfag. Elyada ino ahako roho turuk ahun wereg lit otsi sehen men tog piyabangge men senehon enebe teng-teng angge 200.000 milal eneptuk latfag.

¹⁸Elyada iraham welatfahon Yozabad inowen otsi fano roho tog aptukon enebe teng-teng angge 180.000 milal eneptuk latfag.

¹⁹It obog tohowen ap suwon Yosafat inowen hiyag isibag ane hikit toho iniyabuk turukmu Yosafat otsi sehen senehon winon ap suwonen hiyag isibag ane hikit toho o pumbuk Yehuda kinangma walinggoho werehon elehet yaron oko kilapfag ambeg arimano fam wereg latfag.