Read Angguruk Yali 2 TAWARIKH 18 Bible Online

2 TAWARIKH 18 - Angguruk Yali bible

2 TAWARIKH 18

¹Yehuda inap onowe suwon Yosafat ino tung atfareg amloho fahet Israel inap onowe suwon Ahab ahaloho eke wibag.

²Wibagma mo ilig am wirig am turukmen piren ano hinahan ano atfagma Yosafat inowen ap suwon Ahab o Samaria weregma pen ha libag. Libagma Ahab inowen Yosafat otsi men fahet wam domba men sapi men anggolo waroho esetfagma nibag. Nibagma Ahab inowen Yosafat kapal haruk lit,

³”Nare, niren Ramot inap men tog abuhuken an men hat men Gilead kinangma ambiyeg lahuk ano?” ulug kapal hibagma Yosafat inowen, ”Nare, fano ehenma an numalikisi men hat humalikisi men ambiyeg tog abik lahuk.

⁴Nit uwan la fugmu NINIKNI Allahn komo nenepmisi ane fahet tam kapal hamihin,” ulug hiyag itfag.

⁵Hiyag itfagma Ahab inowen Allah amingmingangge nabi teng nuwal fimahen 400 palu enepfareg kapal isaruk lit, ”Nori, anden Ramot inap men tog abuhuken lahuk ano umbusuhuk ano?” ulug kapal isibagma iren, ”Ramot ino Allahn hat hinggikmu umbuhuwen tog abik lahun,” ulug hiyag itfag.

⁶Hiyag itfagma hun Yosafat inowen, ”NINIKNI Allah amingmingangge misig eke wereg halug aren fuki roho hiyag nisamisiyen kapal hul,” ibag.

⁷Ibagma Ahab inowen, ”Allah amingmingangge misig eke werehon NINIKNI Allahn komo nenepmisi ane hiyag nisawag ulug wol tila angge famen aren an nubam aruhu ane fahet fano ane hiyag num fug angge siyag ane eneg hiyag nutuken at fahet nirim peruk lahi. Ap ino hun Yimla amloho unuk te Mikha wereg,” ulug Yosafat hiyag itfag. Hiyag itfagma Yosafat inowen, ”Nare, ari roho imihin fug,” ulug hiyag itfagma

⁸Ahab inowen ot eke wol tibareg hiyag utuk lit, ”Folo-folo lamihinteg Mikha ino hondoholug watmihin,” ulug monde fibag.

⁹Israel inap onowe Ahab men Yehuda inap onowe Yosafat men ap suwonen wan turuk asum wan teg lit o Samaria elehet walinggoho ohowon sok iraham roti anggen lilibug turuk ambeg ap suwon hur atuk angge piren fam heriyeg lit weregma Allah amingmingangge arimano obog tohowen it enelukeman teko lahu ane fahet hiyag isaruk latfag.

¹⁰Hiyag isaruk lit hun Kenaana amloho Zedekia inowen ine angge besi fam andimbuk lebeng tohon wiri fibareg Ahab fam hiyag utuk lit, ”NINIKNI Allahn ele ehekon tu: Andimbuk tu fam Siria inap unubam lel haruk lit haren elehap enebuhun,” ulug hiyag itfag.

¹¹Allah amingmingangge winon arimanowen oho ari hag toho hiyag utuk lit, ”O Ramot inap men tog abik lahunmu NINIKNI Allahn it arimano hat ap suwon hinggikmu umbuhumu haren apmayap enebuhun,” ulug hiyag itfag.

¹²Hiyag utukmu itano ap Mikha hondohik lamihin ulug monde fibag ahun inowen Mikha hiyag utuk lit, ”Allah amingmingangge winon arimanowen ap suwon fam enele misihon eneg fano ane hiyag erehesa angge re haren oho fano ane hiyag itmihin,” ulug hiyag itfag.

¹³Hiyag itfagma Mikha inowen hebeloho hiyag utuk lit, ”Nikni Allahn an hiyag nitmisi ane eneg ap suwon hiyag itmin. At mondabi oluk werehon inowen holeg lit weregma uruk lahi,” ulug hiyag itfag.

¹⁴Hiyag itfareg ap suwon Ahab ambeg libagma Ahab inowen kapal haruk lit, ”Mikha nare, o Ramot inap men tog abik lahuk ano umbusuhuk ano?” ulug kapal hibagma Mikha inowen, ”Tog abik lahupmu ap arimano hit hininggikmu amuhupmu hit palimu amuhup,” ulug hiyag itfag.

¹⁵Hiyag itfagma Ahab inowen hiyag utuk lit, ”NINIKNI Allah unuk fam we tik-tem toho hiyag nitmihin. Anggoloenam anden te we tem toho hiyag nitmihin ulug heng haptuk latikik,” ulug hiyag itfag.

¹⁶Hiyag itfagma Mikha inowen hiyag utuk lit, ”Anden nei waruk hag toho yet harukmen Israel inap obog toho wam domba inikni elehon hag toho tom fene linggik-longgo urukmu yet isarikik. Yet isarukmen NINIKNI Allahn ele uruk lit, ’It arimano inikni elehen inibam man-man fano lawag,’ urukmu hol harikik,” ulug hiyag itfag.

¹⁷Hiyag itfagma hol hibareg Ahab inowen hun Yosafat hiyag utuk lit, ”Hun aruwen an nubam aruhu ane fahet fano ane hiyag num fug angge siyag ane eneg hiyag nutuk ulug hiyag hirihiyon ino hikit toho ketiya ehek ane aru oho holehen,” ulug hiyag itfag.

¹⁸Nin Mikha inowen ele uruk lit, ”Nikni, ketiya NINIKNI Allahn ele irisiyon tu holeg lamin. Anden yet harukmen NINIKNI Allah lehoma heriyeg lit weregma otsi malaikat obog toho arimano At iraham luhaleg lit inggik pikit fil hare fil unduhukmu yet isarikik.

¹⁹Yet isarukmen NINIKNI Allahn ele uruk lit, ’Israel inap onowe Ahab ino tog elman aben ware fusukag pihireg ap san Ahab ambeg lahureg ele hiyag utuk lit, ’O Ramot-Gilead inap men tog abik lahun,’ ulug indi kahaluhu?’ ulug malaikat arimano kapal isarisi. Kapal isarisimu it enele misig ane eneg hiyag utusa fug.

²⁰Hiyag utusa fugmu ap enembol fam angge misig At alukema in arik waharisireg hiyag utuk lit, ’An tuwen Ahab indi kahalik lahuk,’ irisimu NINIKNI Allahn kapal haruk lit, ’Nangginoho tuhun?’ ulug kapal harisimu

²¹ap enembol fam angge inowen, ’An wilip atlug lahukteg Hat hamingmingangge nabi Ahab olohotman wene hiyag isaruk inap inindi kahal enebuhukmu it arimanowen enele si ane hiyag umuhup,’ ulug hiyag itisi. Hiyag itisimu NINIKNI Allahn te, ’Fano ehenma haren Ahab indi kahalik lahunmu ehen ane hikit toho teko lahu,’ ulug hiyag itisi.

²²NINIKNI Allahn irisi ane hikit toho at inowen hat Ahab hubam alem angginon amag ulug hat hamingmingangge obog toho aruma inindi kahal eneptisimu it aruma enele si ane hat hiyag herehesa,” ulug Mikha inowen Ahab hiyag itfag.

²³Ari ulug hiyag itfagma hun Zedekia ino Mikha iraham libareg orohole tag toho watuk lit, ”NINIKNI Allah hime inowen an numbahalug nangginoho hat eneg hiyag hutuk?” ulug pet tibag.

²⁴Pet tibagma Mikha inowen hebeloho hiyag utuk lit, ”Nare, ari ehen angge famen ap seliyonen hunusul ulug waharukmu hat hakolen o undama hirag atmin ulug kuhun sambil ino anden ihi ane fahet tik-tem toho irisi ulug holuk aruhu,” ulug hiyag itfag.

²⁵Hiyag itfagma Ahab inowen otsi hiyag isaruk lit, ”Hun Mikha aru senetihipteg o pumbuk Samaria tu seneg ahun Amon men namloho Yoas men enembeg hondoholug lalihipteg

²⁶henele hiyag isaruk lit, ’Ap suwon inowen ehekon tu: Hun aru inggik hele waroho ap siyag ane turukon kilap eneptuk ibam kila feselihipteg suburu men ik men we tor angge og utukmen eneg an tog abik lahukteg fano nibam waruhuk ehek,’ ulug hiyag isa lalihip,” ulug otsi hiyag isibag.

²⁷Ari ibagma Mikha inowen hiyag utuk lit, ”Nikni, ehen ane hikit toho tog abik lahunteg fano hibam waruhun halug anden hiyag hirihi ane fahet NINIKNI Allahn hiyag nitisi fug ane irikik ulug nonoluk aruhu,” ulug hiyag itfareg nin eke uruk lit, ”Anden ihiyon aru ap o pumbuk obog tohowen holeg lamok,” ibag.

²⁸Ari ibareg welatfagma Israel inap onowe Ahab men Yehuda inap onowe Yosafat men it piren itano o Ramot inap men tog abuhuk ulug wilip atfareg Gilead kinangma libag.

²⁹Libareg Ahab inowen hun Yosafat hiyag utuk lit, ”Ap seliyonen an fahet ap amuwon pukag ulug an sum winon wan timinteg tog silimu laminmu hat ap suwonen wan turuk asum wan toho lamihin,” ulug hiyag itfareg Ahab ino sum ap winonen tohon wan tibareg tog silimu libag.

³⁰Tog uwan abuk fugmu Siria inap onowe suwon inowen sehen senehon wam kudan lisoho walug laruk angge kereta fam unduhuk inap onowesi hiyag isaruk lit, ”Tog aptuk lit yuhun inap unusuk fug, we Israel inap onowe ino fuki roho tog pising toho ware fisiyok!” ulug milal enepfag.

³¹Milal enepfagma tog silimu libareg onowesi arimanowen hun Yosafat ino yet hibareg, ”Israel inap onowe ino ari wereg,” ulug enele uruk lit at wabul ulug horog-horog libareg walinggig lit weregman Yosafat ino akolen ele hum toho nga ruruk latfag. Nga urukmu NINIKNI Allahn holfareg ili waruk lit ap aruma Yosafat embeselug lawag pibag.

³²Ari pibagma sehen seneg inap onowesi arimanowen hun aru Israel inap onowe fug ulug onoluk atfagma at wabul pibag angge famen embeselug ap winon men tog aptuk latfag.

³³Tog aptuk lit Siria ahun misihen tog amu ke pising turuk latfagma Israel inap onowe Ahab ino sing wan teg latfahon honggoleg keyen tog kibag. Kibagma Ahab inowen kereta pikit lawag ulug haltuk ahun fam hiyag utuk lit, ”Tog nuwarehesama tog silimu embeselug hebeloho og naplug lamihin,” ulug hiyag itfag.

³⁴Ari ibag angge famen o ari sambil tog pale fuk fug angge aptukmen eneg werehen ap suwon Ahab ino kereta palimuwen mako wambuhu rohon ulug ap winonen senegma Siria inap onolohotma kereta fam unduhukmen eneg mo ubuk urukmu hun ino war atfag.