Read Angguruk Yali 2 TAWARIKH 19 Bible Online

2 TAWARIKH 19 - Angguruk Yali bible

2 TAWARIKH 19

¹Ap suwon Ahab war atfagma Yehuda inap onowe Yosafat ino ebe fano roho ibam o Yerusalem watfag.

²Watfagma hun Hanani amloho Yehu fulu roho yet halug hiyag isaruk ahun ino Yosafat ambeg libareg at ubam ele uruk lit, ”Nungge fahet Allah fam wenggel haruk eleg ahun ino haren let tirikin? NINIKNI Allah fahet inirim peruk inap hindi enesug latikin ane ari siyag. Haren siyag ane tirikinon ari fahet NINIKNI Allahn olok haruk angge famen

³haren e usa ahen uwag arimano heneko hik isaruk lit hindiyen Allah eneg yami ruruk lahenon ari fano,” ibag.

⁴Yosafat ino o Yerusalem yug toho wereg lit tam turuk latfag hag toho numalikisi NINIKNI Allah nunumbasiyen wel turuk latfahon ambeg suhuloho waharuk lamuhuben hiyag isil lahuk ulug o Bersyeba famen tulug tom Efraim fam pen isil laruk latfag.

⁵Pen isil laruk lit o pumbuk elehet yaron walinggoho ohowon Yehuda kinangma werehon obog toho fam alem haltuk inap lahap eneptuk latfag.

⁶Lahap eneptuk lit Yosafat inowen alem haltuk inap unubam, ”Hiniyabuk fano roho turuk lamuhuben hinindi anggat toho wenggel haruk lamuhup. Alem haloho emberuk ane ari ap fahet turuk lamuhup fug, NINIKNI Allah fahet turuk lamuhup. At hit men weregma unggum kong turuk lamuhup.

⁷Ari fahet NINIKNI Allah fahet henekol toho wereg lit fuki roho kim isalug alem kong turuk lamuhup. Pikir ane apmayap turukon men, ap tu suwon, tu toron ulug wenggel haruk ane men, ninibil amag ulug fano-fano angge og isarukmu hilarukon men fahet NINIKNI Allah niren wel turuk laheyonen irim peruk,” ulug hiyag isaruk latfag.

⁸Ari tibareg o Yerusalemen oho Yosafat inowen Lewi inap men imam inap men Israel inap onowesi sehelimuwon men alem haltuk inap onowesi roho welamuhup ulug lahap enepfag. Lahap eneptuk lit it unubam, ”NINIKNI Allahn tu men ari men turuk lamuhup ulug komo enepfag ane hikit toho unggum kong turuk lit Yerusalem inap alem unubam werehon haloho emberuk lamuhup,” ulug hiyag isibag.

⁹Hiyag isibareg nin ele uruk lit, ”NINIKNI Allah fahet henekol toho wereg lit hinindi handuhal teg eleg angge tuk teg ane hikit toho turuk lamuhup.

¹⁰O pumbuk Yehuda kinangma werehon arimano fam ap ekeyen ap eke ware fusuhu ano, tuk teg ane tuhu fug ano, Allahn komo enepfag ane apmayap tuhu halug hit honori alem haltuk inap o pumbuk wal taneg werehonen alem arimano haltuk lamuhup. Alem arimano angginen haluk fug teg lamuhup halug hiren kong toho emberuk lamuhuben hiyag hisa waharuk lamuhup. Waharuk lamuhupmu NINIKNI Allahn fano peruk ane apmayap tuhup tohon ulug komo eneptuk lamuhup. Komo eneptuk lamuhup fug halug alem hunubam aruhumu hiret iret fahet NINIKNI Allahn olok hahu rohon!

¹¹Ap ekeyen NINIKNI Allahn tuk teg ane fahet komo enepfahon apmayap tuhu halug alem haltuk ane imam inap onowe Amarya ubam aruhu. Ap ekeyen an ap suwonen tuk teg ane fahet emberikikon apmayap tuhu halug alem haltuk ane Yehuda inap onowe Zebaja hun Ismael amloho ino ubam aruhu. Hiren alem haltukmu Lewi inap arimano hit hiniraham wereg lit let heneptuk lamuhup. NINIKNI Allah ap fano ane turukon men welaruhu,” ulug hiyag isibag.