Read Angguruk Yali 2 TAWARIKH 2 Bible Online

2 TAWARIKH 2 - Angguruk Yali bible

2 TAWARIKH 2

¹Salomo inowen NINIKNI Allah wel turuk ibam men an ap suwon nibam men wibuhup ulug otsi hiyag isibag.

²Hiyag isibareg onggo eleg angge yabuk wit nutuk lamuhup ulug Israel inap eneseheli keyon teng obog sehelet obog andog eneptuk lit ap teng-teng angge 82.000 unubam tom fene helep fele ruruk lamuhup ulug hiyag isibareg ap teng-teng angge 70.000 unubam helep fele rohon arimano salmako walug waharuk lamuhup ulug hiyag isibag. Ap arimanowen yabuk fano roho wibukag ulug kim isaruk lamuhubon ulug ap anggolo 3.600 in enepfag.

³In enepfareg Salomo inowen otsi Ho Tirus inap onowe Hiram ambeg lalihip ulug mon enepfagma libareg hiyag utuk lit, ”An nikni ap suwon Daud inowen nibam wit tahuk perisimu haren e sahi og irik waharikin.

⁴Ketiya anden an NIKNI Allah unuk wel turuk ambeg ulug o eke wit uruhuk peruk lahi. Allahn ngi aruhu ambeg inowen At olohotman amben fano angge yaloho hubu lahabeheg roti anggen tag toho wirahowon embeheg turuk lamuhup. Hubet men hupmu men, o sabit sambil men, pikalem ket inam atuk sambil men, NINIKNI Allahn An wel naptuk lit henehiyehen yunggultuk lamuhup ulug imbibag sambil men At olohotma wam waroho hubu lahaptuk lamuhup. Ari roho hit Israel hinaben turukmen eneg welamuhup ulug nit NINIKNI Allahn imbibag.

⁵Allah ari hag toho imbibag ahun ino eneg su regma ap winonen nunumba ulug wel eneptukon arimano At men wirim teg eleg angge re Ninikni Allah suwon fahet o suwon eke wiruhuk peruk lahi.

⁶Pohol obog tohowen Ninikni Allah ebe walinggig lam fug teg anggeyen ap san At wereg ambeg ulug o eke wibuk teg? Anden oho wibuk fug teg lale angge famen At poholma werehon alukema hubu lahaptuk ambeg ulug o ino wiri fuhuk peruk lahi.

⁷Ari peruk lahimu ketiya ap inggik fano ahun ili ruruk angge emas perak men, ine angge tembaga besi men fam nungge-nungge lale feruk lit sum il hik toho yihikon wiyuk anggen, mut, polu men fam palehon oho yihik feruk lit e fam hesenggengge wa rehon eke monde fik waruhunmu at inowen an notsi Yehuda inap Yerusalem inap ininggik fanowon nikni Daud inowen tam wol eneptisiyon men ambiyeg o ino wituk lamuhup.

⁸Hat hotsi e mutuk ane onoluk teg peruk lahireg haren hiyag isahunmu an fahet tom Libanon fam e sahi yaron men e mur ineyon men e fanowon winon men mubuhuben heng haptuk lahi. An namingmingangge arimanowen it men ambiyeg e arimano mutuk lamuhuben mon enebik wahi.

⁹O suwon fano anggolowon wiruhuk peruk lahi ane hikit toho obamangge anggolo mining numuhup.

¹⁰Hotsiyen e mutuk lit naruk lamuhup ulug roti jelai anggen men gandum anggen men wal taneg sum teng-teng angge 2.000 ton men, hele anggur ahaluwe men e zaitun ahaluwe men wal taneg kubag teng-teng angge 400.000 liter men og isa waruhuk,” ulug hiyag itfag.

¹¹Hiyag itfagma Tirus inap onowe Hiram inowen Salomo fahet suwesingga haharoho emberuk lit, ”HINIKNI Allahn numalikisi nindi enesug lahireg we Salomoen eneg fet enesug lamag ulug hat ap suwon lahap haptisi,” ulug hi ribareg

¹²nin eke hiyag utuk lit, ”Israel hinap HINIKNI Allah pohol ha kinang ha wal tibag ahun inowen ap suwon Daud amloho indi anggat teg lit mun ane man ane alem oluk tehon og itisimu hat amloho inowen NINIKNI Allah wel turuk ibam men an ap suwon nibam men wiruhuk peruk lahen angge re anden HINIKNI Allah wel turuk lahi.

¹³Ari fahet anden ketiya not eke unuk Huram Abi ino hambeg monde fik waruhuk. Huram Abi ino indi anggat teg lit inggik ine roho yabuk eke hag eke hag wibuk teg.

¹⁴At isinga unggul unuk Dan hiyap famen o Tirus ahun eke hilibag. Amloho Huram inowen ili ruruk angge emas perak men, ine angge tembaga besi men, helep e men fam nungge-nungge laltuk lit sum il hik toho yihikon wiyuk anggen, mut, polu palehon men yihik feruk lit e fam hesenggengge waruk lit haren hiyag uruhun ane indimu fano roho wenggel halug yi angge ti angge wibuk teg. At ino hambeg monde fik waruhukmu at inowen hat hamingmingangge men hikni Dauren wol eneptisi inap men ininggik fano inap arimano men ambiyeg mun angge man angge wit hutuk lamuhup.

¹⁵Ari fahet ketiya hotsi hiyag isahunmu hat noweyen hiyag nitikin ane roho roti jelai anggen men gandum anggen men e zaitun ahaluwe men ik anggur ahaluwe men walug wamuhup.

¹⁶Walug wamuhupmu haren e anggolo mining numuhup ulug heng neneptikin ane hikit toho e fanowon tom Libanon fam werehon mubuhuk. Mubuhukteg hele fam humaho felug saho ahik ahum keyen o Yafo walug wamuhuk. Walug wamuhukmu hat hinggarehen o Yerusalem walug lahun,” ulug hiyag itfag.

¹⁷Ari ulug hiyag itfagma ikni Dauren ap pohon Israel inap enesehelimu welatfahon obog toho winag isibag hag toho amloho Salomo inowen oho winag isarukmen enebe teng-teng angge 153.600 welatfag.

¹⁸Weregma it minggiroho winon teng-teng angge 80.000 unubam tom fene helep fele ruruk lamuhup ulug hiyag isibareg it winon teng-teng angge 70.000 unubam helep fele rehon arimano salmako walug wamuhup ulug hiyag isibag. Ap arimanowen yabuk fano roho wibukag ulug kim isaruk lamuhubon ap anggolo 3.600 in enepfag.