Read Angguruk Yali 2 TAWARIKH 20 Bible Online

2 TAWARIKH 20 - Angguruk Yali bible

2 TAWARIKH 20

¹Welatfagma Moab inap men Amon inap men Meunim inap minggiroho winon menen Yosafat men tog abuhuk ulug watfag.

²Watfagma ap Yosafat ambeg watfareg hiyag utuk lit, ”Ap seliyonen hat men tog abuhuk ulug o Edom kinang famen ik Il Warehon fuma filen mondoko waharusareg ketiya o Hazezon-Tamar unuk eke En-Gedi suwaleg ambeg wereg,” ulug hiyag itfag.

³Hiyag itfagma holfareg Yosafat ino akol haruk lit NINIKNI Allahn hiyag nuruhu ane kapal hahuk ulug wenggel hibareg hiyangangge welamuhup ulug umalikisi Yehuda inap hiyag isibag.

⁴Hiyag isibagma ap o pumbuk Yehuda kinangma werehon obog toho NINIKNI Allahn let nenebuhuwen heng tuhuk ulug o Yerusalem watfag.

⁵Watfareg Yehuda inap arimano men Yerusalem inap men Allah ibam iraham elehet keron huk toho kilabeg ambeg luhal atfagma Yosafat ino it pulmu unduhuk lit ap obog toho iniline sembahyang ibahon tu,

⁶”NINIKNI Allah nunumbasiyen wel haptuk latfahon, Hat eneg poholma wereg lit ap suwon kinang atogman atogma werehon umalikisi men sen enesug lahen. Hat hinggik hineyonen mun angge man angge ki haruk lahenteg Haren peruk lahen ane ap misihen oho apmayap tuk fug teg.

⁷Haren ap kinang tu fam yug toho welatfahon arimano humalikisi Israel inap onolohotman yanggal eneptik inareg kinang aru Hat hindi reg latnahon Abraham umbusagsi mondabi ngi regman eneg welamuhup ulug og isinag.

⁸Og isinagma nunumbasi kinang tu fam wereg lit Hat hunuk wel haptuk ibam eke wiri fibag.

⁹Iren enele uruk lit, ’Niren siyag ane turuk laheyon fahet alem angginon nunubam aruhu ano, ap seliyonen nunusik waharuk lamuhup ano, ouk alem angginon nunubam aruhu ano, suburu obok lahaku halug Allahn let nenebuhuwen At olohotma lul ulug Hat hunuk wel haptuk ibam tu alukema in arik lahukteg Hat heng haptuk lamuhukmu Haren nenele hol nisaruk lit let neneptuk laruhun,’ uruk latfag.

¹⁰Ketiya Amon inap men Moab inap men tom Seir fam wereg inap men nunusuhuk ulug waharusama yet isimin! Nunumbasi Israel inap arimano o Mesiren wilip atuk lit it seliyon arimano enengginang horogma larukmen Haren kuhup fug ulug hiyag isinagma nunumbasiyen it elehap enebuk fug angge enengginang walinggoho laruk latfag.

¹¹Ari roho unubam turuk latfag ane fahet iren hebeloho fano ane nunubam telep angge famen ketiya nit Hat hangginang nit og nisinahon famen yanggal nenebuhuk ulug waharusama yet isimin.

¹²Ninikni Allah, iren siyahap nenebuhuk peruk ane fahet Haren ayeg waroho alem angginon unubam umbuhun fug ano? Nunusuhuk ulug mondoko waharuson arimano ninine elehen apmayap enebuk fug teg lahe. Nangginuhuk ulug ninindi nonghong uruk lahereg Haren eneg let nenebuk teg lahen ulug ninilen kilap hiyaruk lahe,” ulug sembahyang ibag.

¹³Sembahyang urukmu Yehuda inap obog toho unuhesi maliket NINIKNIAllah ibam alukema unduhuk lit holeg latfag.

¹⁴Unduhuk latfahon sehelimu Lewi ahun Yahaziel oho unduhuk lit weregman NINIKNI Allah ahime fanowon ubam atfag. Yahaziel ino hun Asaf inowen ondohowonen endetfahon welatfag. At ikni Zakharia, Zakharia ikni Benaya, Benaya ikni Yeiel, Yeiel ikni Matanya welatfag.

¹⁵Allah ahime Yahaziel ubam atfagma ele hi roho uruk lit, ”Yehuda hinap men, Yerusalem hinap men, nikni, hat ap suwon menen NINIKNI Allahn ele hiyag hisamisiyon tu holeg lamek: Ap seliyon mondoko waharuson fahet henekolen yuk la fug. Hiren it men tog abuk fug angge welamuhupmu An Allahn eneg hit fahet tog abuhuk.

¹⁶O sono ap seliyon arimano tonggoma weregma hit wambuhup. Wamburuk lit yet harukmen ap seliyon arimano o Ziz laharuk ke lahalug o Yeruel horogma lek fil tonggo atog ke larukmu yet isahupteg enelukema lahup.

¹⁷Enelukema lahupteg hiren tog abuk fug angge unduhuk lit yet harukmen An HINIKNI Allahn ap seliyon arimano apmayap eneptukmu yet niyahup. Ari fahet hit Yehuda hinap men Yerusalem hinap menen henekolen yuk lagmag uk fug. Hit sono it enelukema larukmu An HINIKNI Allah hit men welaruhuk ehek,” ulug hiyag itfag.

¹⁸Hiyag itfagma holfareg Yosafat men Yerusalem inap men Yehuda inap obog tohowen NINIKNI Allah wel tul ulug enelenggen fam hur atug onorohole han kinangma sahung atfag.

¹⁹Sahung atfareg Lewi inap ununggul unuk Kehat inap men Korah inap men nin in atfareg enele hi roho Israel inap INIKNI Allah wel turuk asini uruk latfag.

²⁰Ari tibareg likiyamon hubet o Tekoa lek fil lul ulug wilip amuk oho lit Yosafat it enelukema in atfareg ele uruk lit, ”Numalikisi Yehuda hinap men Yerusalem hinap menen holeg lamek! Hit hinindi wirik toho NINIKNI Allah niren wel turuk laheyon fam wenggel haruk lamuhup halug hinine roho welamuhup. At amingmingangge nabi arimanowen hiyag hisarukon fahet tem toho hiyag nisaruk ulug wenggel haruk lamuhup halug palimu amuhup,” ulug hiyag isibag.

²¹Ari ulug hiyag isibareg umalikisi men enele sahalfareg otsi winon hiyag isaruk lit, ”Allah wel turuk sambil wan turuk asum wan toho hit tam atihipmu sehen seneg inap honombolim lalusa. Laruk lit hiren, ’NINIKNI Allahn indi nenesugmen eneg werehon ino wel tiyok!’ il laruk latihip,” ulug hiyag isibag.

²²Hiyag isibag ane ari hikit toho ap arimanowen Allah wel turuk asini uruk ane ket ak tibagma ap seliyon tog elma lul ulug waharukmen NINIKNI Allahn inindi nonghonga fisibagma

²³Amon inap men Moab inap menen tom Seir fam wereg inap arimano ilahal waroho lilibug heheg unusibareg it-it wat-war atuk latfag.

²⁴Wat-war atfagma Yehuda inap arimano ap seliyon mondoko wahason pen isa lul ulug punumuwen lek fil yet haruk ambeg lahibareg yet harukmen ap seliyon misig oho wilip am fug angge obog toho waroho yi-yingga urukmu yet isibag.

²⁵Yet isibareg Yosafat umalikisi menen ap seliyon enenggengge hulul ulug wambibareg wam anggolo men sum wan turukon men yabuk eke hag eke hag wituk angge men mun angge man angge fanowon hilibag. Hilibag angge arimano aben ha ruk fug toho hilarukmen eneg hup hinahanam atfag.

²⁶Hup hinahanam atfagma tonggo unuk ”Wel Turuk Ambeg” suwalehon fam libareg luhaloho wereg lit NINIKNI Allahn let neneptisi ulug wel tibag. Wel tibag ane ari fahet tonggo ino ”Wel Turuk Ambeg” suwalfahon ino ketiya oho wereg.

²⁷Ari obog toho tibareg Yehuda inap men Yerusalem inap men inikni ombolim laruk lit NINIKNI Allahn ap nunusul ulug waharuson arimano apmayap eneptisi ulug inindi enehiyeg toho inibam o Yerusalem watfag.

²⁸Waharuk lit pinggong men puhuli men ele hum toho uruk angge men watil NINIKNI Allah ibam owahalma libag.

²⁹Ap seliyon Yehuda inap unusul ulug waharukmen INIKNI Allah amuwen umalikisi fahet tog aptisi urukmu holfareg ap suwon kinang atogman atogma werehon unumalikisi menen enekol anggolo haruk latfag.

³⁰Ari obog toho teko libagma Allah Yosafaren wel turuk latfahon inowen at foroho lit weregma ap seliyon misig oho at men tog abik watfag fugmu Yosafat umalikisi men inindi yuwag toho welatfag.

³¹Yosafat indag atfag sali mo ilig am wirig am turukmen teng misigmen nubam hilag likinen 35 atfagma ap suwon lahibareg o Yerusalem wereg lit Yehuda inap fet enesugmen eneg mo hinahaneg fimahen 25 libag. At isinga hun Silhi ahaloho unuk Azuba welatfag.

³²Ikni Asa inowen fano ane eneg turuk latfag hag toho amloho Yosafat ino ke hareyon la fug angge ikni ombolim laruk lit NINIKNI Allahn fano perukon eneg turuk latfag.

³³Yosafat ap suwon weregma Yehuda inap inindi misig toho Allah unumbasiyen wel turuk latfahon fam wenggel ha fug angge tu Allah hag toho wereg ulug wel eneptukon fahet o kema-kema punu ke hubu lahaptuk ane imbisibag fug.

³⁴Ap suwon Yosafat oluk wereg lit turuk latfag ane tuma tor angge haharoho emberuk lahe. Aren yabuk seneg lit turuk latfag ane ak tibag ambehen tulug obog tibag ane fahet suwesingga Hanani amloho Yehu inowen turuk latfag ane fahet haharehon fam paloho imbibag. Paloho imbibag ane ari suwesingga Yehuda inap onowesi suwonen turuk latfag ane fahet haharehon fam kilabeg lit wereg.

³⁵O misihim sambil Yehuda inap onowe Yosafat inowen Israel inap onowe Ahazia olok ane anggolo turuk latfag ahun ino men nininggik ahandip toho welamuhuk ulug sali imbibag.

³⁶Sali emberuk lit Yosafat inowen Ahazia fam, ”Ik ahum pali keyen o Tarsis larukon kou humon wibuhuk,” ibareg o Ezion-Geber inowen it pirenen kou humon arimano wiri fibag.

³⁷Wiri fibagma Allah amingmingangge nabi o Maresa ahun Dodawa amloho Eliezer ino Yosafat ambeg watfareg at ubam ele uruk lit, ”Haren Ahazia men nininggik ahandip toho welamuhuk irikin ane ari fahet NINIKNI Allahn siyag peruk lit haren wiri ferikin angge arimano siyahap tuhu,” ulug hiyag itfag. Hiyag itfag ane ari hikit toho kou humon iren witfahon arimano ik ahum pali ke larukmen lilibug toho siyag atfagma o Tarsis libag fug.