Read Angguruk Yali 2 TAWARIKH 21 Bible Online

2 TAWARIKH 21 - Angguruk Yali bible

2 TAWARIKH 21

¹Welatfareg war atfagma Yosafat ino umbasi o pumbuk unuk Daud suwalfahon fam sal eneptuk latfag ambeg ar oho salfag. Salfagma amloho Yoram ikni ubalma ap suwon lahibag.

²Israel inap ik ambut fil werehon onowe suwon Yosafat umalikisi Yoram men otsi falfaliken ununuk Azarya, Yehiel, Zakharia, Azariahu, Mikhael, Sefaca men welatfag.

³Inikni Yosafat inowen fano-fano angge eke hag eke hag emas perak men o Yehuda pumbuk suwon elehet walinggoho ohowon men umalikisi og isibag. Og isibareg namloho wandabon Yoram ino an nubalma ap suwon aruhu ulug sali imbibag.

⁴Sali imbibag ane hikit toho Yoram ino ikni ubalma ap suwon lahibag. Lahibareg ine roho wereg lit otsi men Israel inap onowesi minggiroho winon men unusibag.

⁵Yoram indag tibag sali mo ilig am wirig am turukmen teng misigmen nubam hilag fuwaben 32 atfagma ap suwon lahibareg o Yerusalem wereg lit Yehuda inap fet enesugmen eneg mo likinen libag.

⁶Yoram inowen ap suwon Ahab ahaloho eke hilibareg Ahab umalikisi menen Israel inap onowesi tam welatfahon onombolim laruk lit siyag ane til-wil laruk latfag hag toho Yoram inowen oho NINIKNI Allahn siyag perukon eneg turuk latfag.

⁷Ari roho turuk latfag angge famen NINIKNI Allahn Daud ubam haren enderuhunonen endebuhubon ap suwon eneg weregman eneg mondabi welamuhup ulug sali imbibahon fahet wenggel haruk lit Dauren ondohowonen endetfahon ino siyahap tibag fug.

⁸Yoram ino Yehuda inap onowe suwon weregma Edom inap arimanowen Yehuda inap enepma welamuhuk fug ulug wenggel hibareg Edom ahun eke ap suwon raja lahapfag.

⁹Lahapfagma Yoram inowen Edom inap arimano nin apmayap enebuhuk ulug at otsi sehen senehon onowesi menen kereta wam kudan lisoho walug laruk angge obog toho walug libag. Libagma Edom inaben at men kereta walug watfahon men waling enebik watfareg weregman hubanggo in atfareg Edom inap unusuruk lit apmayap enepfag.

¹⁰Apmayap enepfag angge famen fobik Edom inap arimano Yehuda inap enepma welamuhuk fug ulug enemu in atfareg weregman eneg ketiya oho Yehuda inap enepma wereg eleg. Edom inap enemu in atfag li o Libna inap oho enemu in atfag. Yoram inowen NINIKNI Allah umbasiyen wel turuk latfahon ino ambol yit utuk latfag ane fahet ari obog toho teko libag.

¹¹Yoram inowen tu Allah hag toho wereg ulug laltuk angge fahet o Yehuda punu ke hubu lahaptuk ambeg wiri fil laruk lit usangge ap o winamonen wel eneptukon arimano Yerusalem inap men Yehuda inap menen oho wel enebukag ulug inindi ninap eneptuk latfag.

¹²Ari roho turukmu Elia inowen at fahet suwesingga eke haharoho emberuk lit, ”NINIKNI Allah hat humba Daud inowen wel turuk latfahonen ele urukon tu: Hat hikni Yosafat men humbusag Asa men laruk latfag ke embeserikinteg

¹³Israel inap onowesi suwonen siyag ane til-wil laruk latfag hag toho haren oho turuk lahen. Ap suwon Ahab umalikisi menen Allah enembol yig utuk latfag ane hikit toho haren oho Yehuda inap men Yerusalem inap menen usangge ap o winamonen tohon wel enebukag ulug inindi ninap eneptikin. Ari roho turuk lit hat hubabut siyahonen hat hotsi unubabut fanowon arimano obog toho unusirikin.

¹⁴Ari fahet NINIKNI Allahn hat hotsi Yehuda inap arimano men huhesi humalikisi men hanggengge obog toho men mondabi siyahap enebuhu.

¹⁵Hat hamu ouk alem angginon hubam aruhumu hahum ouk warukmen eneg hahum pilang tuhureg hal pulala roho wilip aruhu,” ulug suwesingga feneyen hiyag itfag.

¹⁶Hiyag itfagma NINIKNI Allahn Filistin inap men Arab inap o Etiopia inap iniraham werehon men inindi kahal enepfagma Yoram men tog abuhuk ulug wilip atfag.

¹⁷Wilip atfareg Yehuda kinangma kibareg ap suwon anggengge at ibamen foroho latfahon obog toho yoholiyangge hilaruk lit uhesi malik obog toho ininggik hele waroho og eneplug libag. Og eneplug laruk lit we Yoram amloho ilabowon Yoahas ino ikni men welamag ulug embeselug libagma pok atfag.

¹⁸Pok atfagma NINIKNI Allahn Yoram ino ouk alem angginon ubam monde fik watfagma ahummu ouk warukmen eneg welatfag.

¹⁹Ouk warukmen eneg mo ilig am wirig am turukmu piren atfagma ouk anggolo waruk lit ahum pilang toho al pulala roho war atfag. War atfagma umalikisi Yehuda inap arimanowen ap suwon tam welatfahon war atukmu ninindi ulug indok humon munggaltuk latfag hag toho Yoram fahet tibag fug.

²⁰Yoram indag atfag sali mo ilig am wirig am turukmen teng misigmen nubam hilag fuwaben 32 atfagma ap suwon lahibareg o Yerusalem wereg lit Yehuda inap fet enesugmen eneg mo likinen libagma war atfag. War atfagma ap misihen oho at fahet nindi ulug fong watuk latfag fug. Fong wabuk fug angge o pumbuk Daud ap suwon tam welatfahon sal eneptuk latfag ambehen saluk fug angge Yoram ino amumu salfag.