Read Angguruk Yali 2 TAWARIKH 22 Bible Online

2 TAWARIKH 22 - Angguruk Yali bible

2 TAWARIKH 22

¹Yoram umalikisi obog toho Yehuda inap sehen senehon men o sabo wiroho weregman aben tohon huhulangge hilaruk inap men o Arab inap menen unusik watfagma Yoram umalikisi oho war atfag. War atfagma we Yoram amloho ilabowon Ahazia eneg oluk welatfag. Ikni Yoram war atfagma Yerusalem inaben Ahazia ikni ubalma ap suwon lahapfag.

²Ahazia indag atfag sali mo ilig am wirig am turukmen falfalik fimahen 22 atfagma ap suwon lahibareg o Yerusalem wereg lit Yehuda inap fet enesugmen mo misig libag. Ahazia isinga Israel inap onowe suwon Omri amloho Ahab inowen indag tibahon unuk Atalia welatfag.

³Isinga Atalia inowen milaltukmu Ahazia inowen ap suwon Ahab umalikisi menen turuk latfag hag toho siyag ane eneg til-wil laruk latfag.

⁴Ahazia ikni war atfagma Ahaben ondohowonen endetfahon arimanowen oho indi kahaltukmu Ahazia inowen NINIKNI Allahn siyag perukon turukmen eneg fobik mondabi siyag atfag.

⁵It arimanowen Ahazia komo ribag ane hikit toho Israel inap onowe suwon Yoram men ambiyeg o Gilead kinangma libareg o Ramot horogman Siria inap onowe suwon Hazael men tog aptukmen Siria inaben Yoram tog sinat watfag.

⁶Tog sinat watfagma Yoramen yowilangge nubam werehon hihit nabukag ulug o Yizreel libareg ouk waruk lit weregma Yehuda inap onowe Ahazia inowen pen ha watfag.

⁷Pen ha watfareg Ahazia ino Allahn war amag pibag ane hikit toho Yoram men ambiyeg hun Nimsi umbusag Yehu ambeg lul pibag. Ambeg uwan la fugmu NINIKNI Allahn hun Yehu ino mumal taruk lit, ”Haren hun Ahaben ondohowonen ondohowon obog toho elehap enebuhunteg Israel inap onowe lahakun,” ulug hiyag itfag.

⁸Hiyag itfag ane ari hikit toho Yehu inowen Ahaben ondohowon arimano unusil larukmen Yehuda inap onowesiyet ap suwon Ahazia umalikisi at men watfahonet salkal uruk lit ir oho unusibag.

⁹Unusibareg Yehu inowen Ahazia oho watmin ulug yami ril larukmen otsiyen Ahazia ino o Samaria hiraho lit weregma hiyahibareg senetfag. Senetfareg Yehu ambeg walug watug ware fisibag. Ware fisibareg at fahet inirimen kinangma saltuk ane embeselep angge famen hun Yosafat indi piren teg eleg angge NINIKNI Allah yami ruruk latfahon umbusag at tu wereg ulug Amazia ino kinangma salfag. Kinangma salfagma Ahazia amloho ebe suwon ikni ubalma ap suwon lahabuk hahon eleg latfag.

¹⁰Yehuda inap onowe suwon Ahazia war atisi urukmu holfareg isinga Atalia inowen Yehuda inap onowe suwon ori umalikisi men obog toho unusibag.

¹¹Unusuruk lit Ahazia amloho Yoas ino oho wabuk oho turuken Ahazia erek Yosabat ap suwon Yoram ahaloho imam Yoyada hilibahon inowen malik ino ori sehelimuwen hondoholug hirag-hirag libareg Atalia inowen malik ino waruhu rohon ulug hiyap at foroho latfahon men ambiyeg hili ap nohoruk ambeg hirag enebik kibag.

¹²He Atalia inowen Yehuda inap fet enesug latfag li Yoas men hiyap itano men NINIKNI Allah ibam hiraho lit weregman eneg mo falfaliken libag.