Read Angguruk Yali 2 TAWARIKH 23 Bible Online

2 TAWARIKH 23 - Angguruk Yali bible

2 TAWARIKH 23

¹Mo ilig am wirig am turukmen sabiren atfagma Allah amingmingangge imam Yoyada inowen nindimuwen tuhuk perikikon ketiya nine roho timin pibareg sehen seneg inap onowesi Yeroham amloho Azarya, Yohanan amloho Ismael, Obed amloho Azarya, Adaya amloho Maaseya, Zikhri amloho Elisafat men wol enepfareg nit mangno roho welamuhuken sali nubam ilihip ulug hiyag isibag ane hikit toho sali imbibag.

²Sali imbibareg o Yehuda pumbuk obog toho libareg Lewi inap men Israel inap ununggul unuk wal-wal werehon onowesi men hondog eneplug suhuloho o Yerusalem watfag.

³Watfareg ap arimanowen Allah ibamen ap suwon war atfahon amloho Yoas ubam sali emberuk lit, ”Hat men nit men sebe roho welamuhuk,” ibag. Ari ibagma Yoyada inowen, ”NINIKNI Allahn Daud fam ele uruk lit, ’Haren enderuhunen endebuhubon arimano ap suwon weregman eneg welamuhup,’ ibag ane hikit toho ap suwon amloho aru ikni ubalma ap suwon welaruhu.

⁴Ari fahet hiren turuk lamuhubon fahet iminon tu: O sabir aruhumu hit imam men Lewi hinap men hiniyabuk turuk lamuhubon minggiroho winonen Allah ibam sok kurukon foroho lamuhup,

⁵hit winonen ap suwon ibam foroho lamuhup, winonen sok unuk Ubule ino foroho lamuhup. Hit Yehuda hinap welahebon obog tohowen NINIKNI Allah ibam owahalma luhaloho welamuhup.

⁶Ap sa-sa NINIKNI Allah ibam kuhu fug. We imam arimano men Lewi inap men Allah amingmingangge wereg angge re iniyabuk wuk oho lit Allah ibam kuruk lamuhup. Ap winon obog tohowen NINIKNI Allahn imbibag ane hikit toho At ibam kuruk lamuhup fug.

⁷Hit Lewi hinaben ap suwon Yoas foroho lamuhup. Hiren fit hininggikmu seneg lit at walinggoho unduhuk lamuhup. At ino kuk wilip am turukmu hit at walinggoho laruk lamuhup. Ap sa Allah ibam kul perukon arimano unusuhup,” ulug hiyag isibag.

⁸Hiyag isibag ane ari hikit toho Lewi inap men Yehuda inap palu arik watfahon arimano men wal tanehen onotsi yabuk witukon men onotsi o sabir angge kel tarukon men palu enebik libareg it men ambiyeg Yoyada ambeg watfag. Yoyada inowen ap misig oho o sabir aruhu sambil kel tahu fug ibag ane hikit toho misig oho ibam pok atfag fug.

⁹It obog toho watfagma Yoyada inowen fit men tog piyabangge suwonet toronet ap suwon Dauren tohon Allah ibam foroho latfahon arimano ap sehen senehon onowesi og isibag.

¹⁰Og isibagma ap obog tohowen Yoyadan hiyag isibag ane hikit toho fit ininggikmu seneko ap suwon amloho ino foroho lamul ulug Allah ibam ilan fuma filen tulug hubu lahaptuk ambeg walinggoho o ino ilan fuma fil in arik libag.

¹¹In arik libagma Yoyada otsi menen ap suwon amloho Yoas ino hirahoman hondoholug wilip atfareg ap suwonen lahaptuk angge unggulmu lahabe fibareg suwesingga Allahn ari-ari turuk lamuhup ulug paloho imbibahon og itfag. Og itfagma ap welatfahonen nit nonowe welaruhun ulug e zaitun ahaluwe unggulmu are ribibareg enele hi roho, ”Ninikni, hat ap suwon hi haptuk lahe,” uruk latfag.

¹²Enehiyehen ap suwon hi rurukmu holfareg Atalia ino ap anggolo NINIKNI Allah ibam luhaloho weregma libag.

¹³Libareg yet harukmen ap suwon we ket eneg lahapfahon ino Allah ibam sokolma ap suwon lehoma unduhuk ambeg unduhukmu onowesi roho welatfahon men pinggong watuk inap men iraham weregma Yehuda inaben puhuli kong turuk lit enehiyehen enele urukmu sini yunggultuk inaben puhuli ele watuk lit ap suwon wel tul ulug sini milal eneptukmu yet isibareg Atalia inowen indi siyahen sum wan teg latfahon tararag tibisibareg ele hum toho, ”Nuwabul ulug turuk lahep,” ibag.

¹⁴Ibagma imam Yoyada inowen hiyap ari NINIKNI Allah ibam tuman ware fusul fug ulug sehen senehon onowesi unubam ele uruk lit, ”He aru hit honotsi iraroho unduhukon honggoleg keyen hondoholug wilip atihip. Wilip atuk lit ap sa at ombolim lamin perukon arimano unusilihip!” ulug hiyag isibag.

¹⁵Hiyag isibagma iren Atalia ino senetfareg wam kuda ap suwon ibam laruk abunggalem keyen hondoholug libareg o sokolman ware fisibag.

¹⁶Ware fisibagma Yoyada inowen ap suwon men ap welatfahon obog toho unubam ele uruk lit, ”’We tik-tem toho NINIKNI Allah umalikisi wereg lit Aren peruk ane hikit toho turuk lamuhuk,’ ulug sali embelihip,” ulug hiyag isibag ane hikit toho sali imbibag.

¹⁷Sali imbibareg ap arimano obog toho Baal wel turuk ibam libareg o ino halog toho siyaha feselug hubu lahaptuk ambeg men usangge ibam foroho latfahon men lilibug toho hik isibag. Hik isibareg hubu lahaptuk ambeg siyahap tibahon arimano onolohotman Baal amingmingangge Matan ino ware fisibag.

¹⁸Ware fisibagma Yoyada inowen imam men Lewi inap men unubam ele uruk lit, ”Ap suwon Dauren imbibag ane hikit toho NINIKNI Allah ibam foroho lamuhup,” ulug hiyag isibareg, ”Musa wene fam paloho imbibag ane roho NINIKNI Allah fahet hubu lahaptuk lit Dauren milal enepfag ane hikit toho henehiyehen sini yunggultuk lamuhup,” ibag.

¹⁹Ari ibareg ap siyahon unubam tag tehen Allah wel tuk fuhon Allah ibam kuhup tohon ulug Yoyada inowen Allah ibam sok foroho lamuhup ulug ap in enepfag.

²⁰In enepfareg Yoyada inowen ap sehen senehon onowesi men ap suwon-suwon men ap welatfahon obog toho palu enepfareg it men ambiyeg laruk lit ap suwon ino NINIKNI Allah ibamen hondoholug wilip atfareg sok pali filon ele keyen libareg ap suwon ibam kibag. Kibareg Yoas ino ap suwon hur atuk ambeg hur arik lahamihin ulug hiyag itfagma hur arik lahibag.

²¹Hur arik lahibagma Yehuda inap obog toho inindi enehiyeg haruk latfag. He Atalia fano ware feserusa ulug Yerusalem inap arimano inindi yuwag toho welatfag.