Read Angguruk Yali 2 TAWARIKH 24 Bible Online

2 TAWARIKH 24 - Angguruk Yali bible

2 TAWARIKH 24

¹Yoas indag tibag sali mo ilig am wirig am turukmu sabiren atfagma ap suwon lahibag. Lahibareg o Yerusalem wereg lit Yehuda inap fet enesugmen eneg mo teng misigmen nubam hilag nuwalen 40 libag. At isinga o Bersyeba hiyap unuk Zibya welatfag.

²Allah amingmingangge imam Yoyada oluk weregma ap suwon Yoas inowen NINIKNI Allahn fano perukon turuk latfag.

³Yoyada inowen Yoas hiyap piren og itfagma ap umaliket hilani umaliket indag enepfag.

⁴Welatfareg Yoasen NINIKNI Allah ibam siyag teg ke arimano haluhuk ulug

⁵imam inap men Lewi inap men wol enepfareg it unubam ele uruk lit, ”O Yehuda pumbuk walinggoho lahupteg uang heng enebuhupmu og hisahubon arimano fam Allah hiren oho wel turuk lahebon ibam siyag atuk ke mo eke fam eke fam haltuk lamuhuk. Anden ihiyon ari folo-folo tilihip,” ulug hiyag isibag. Ari ulug hiyag isibag angge famen Lewi inap arimanowen amusunap tibag.

⁶Amusunap tibagma ap suwon inowen imam onowe Yoyada wol tibareg ubam ele uruk lit, ”O sabo fanowon Allah Wene Numen haharehon foroho ambeg ino fahet ap wal tanehen hundig-hundig uang emberuk lamuhup ulug NINIKNI Allah amingmingangge Musa men Israel inap obog toho menen kong toho imbibag. Kong toho imbibag angge famen ketiya haren nungge fahet humalikisi Lewi inap unubam o Yerusalem men o Yehuda pumbuk men walinggoho lahupteg uang arimano heng enebuhup ulug hele ine roho hiyag isarikin fug?

⁷He Atalia ubabut olokon ino men at ombolim laruk latfahon menen Allah ibam siyahap tibareg aben fano-fano angge NINIKNI Allah ibam imbik waharuk latfag angge iren walug usangge wel eneptuk latfahon Baal unubahet imbibag,” ulug hiyag itfag.

⁸Hiyag itfareg, ”Peti e seng toho wiri felihibon eke NINIKNI Allah ibam sok kurukon iraham embelihip,” ulug Lewi inap hiyag isibag ane hikit toho tibag.

⁹Ari tibareg indam Allah amingmingangge Musa lekma wereg lit kong toho imbibag ane hikit toho NINIKNI Allah fahet hundig-hundig uang emberuk lamuhup ulug o Yerusalem men o Yehuda pumbuk men walinggoho hiyag isil libag.

¹⁰Hiyag isil libagma ap obog toho onowesi men enehiyehen Allah fahet uang umbul ulug Allah ibam waharuk lit uang iren tohon peti fam kilaptukmen eneg peti ino keleg atuk latfag.

¹¹Ari roho turukmu o eke sambil eke sambil winag hawag ulug Lewi inaben peti ino ap suwon ot eke ambeg walug laruk latfag. Walug larukmu peti ino uang keleg tegma yet halug ap suwon amingmingangge suwesingga hahatukon ino men imam onowe amingmingangge eke men wol enepfagma waharuk lit uang arimano peti elman hinanggoho walug peti ino nin hebeloho Allah ibam sok iraham imbik laruk latfag. Ari roho turuk lit uang anggolo andog toho emberuk latfag.

¹²Uang andog toho emberuk latfahon arimano ap suwon ino men Yoyada menen NINIKNI Allah ibam haltuk ane fahet in enepfag inap ininggikmu og isaruk latfagma iren ap helep warukon men e witukon men ine angge besi tembaga witukon men mingming eneptukmu Allah ibam siyag atfag ke arimano haltuk latfag.

¹³Haltukmen eneg Allah ibam ino tam ine roho wirig latfag hag toho nin hebeloho fanowap tibag.

¹⁴Allah ibam obog toho hale fibareg o witukon onowesi arimanowen uang unumalikisi og isaruk lit minggiroho imbibahon arimano ap suwon men Yoyada men suhuloho og isa watfag. Uang arimano iren nungge-nungge laltuk inap og isibagma iren kubag men hubu lahaptuk lit wan turuk angge men, Allah ibamen yabuk turuk lit wan turuk angge eke hag eke hag ili ruruk angge emas perak fam lale fibag. Ari tibibagma imam Yoyada oluk wereg li umalikisiyen likiya hupmu NINIKNI Allah ibamen hubu lahaptuk latfag.

¹⁵Imam Yoyada indat tibag sali mo ilig am wirig am turukmen teng fuwaben 130 atfagma amusun toho welatikik ulug indi yuwag toho war atfag.

¹⁶War atfagma Yoyada inowen Israel ninap men Allah men At ibam men fahet fano ane anggolo turuk latisimu ap suwon sal eneptukon hag toho saltul ulug o pumbuk unuk Daud suwalfahon fam ap suwon sal eneptuk latfag ambeg iraham salfag.

¹⁷Yoyada war atfagma Yehuda inap onowesi ap suwon ambeg watfareg at olohotma enelenggen fam hur atug hi ribag. Hi ribag sambil ino ak tibareg iren ap suwon indi kahaltukmu enele holtuk latfag.

¹⁸Ari roho turukmu Yehuda inap arimanowen Allah nunumbasiyen wel turuk latfahon wel tul ulug NINIKNI Allah ibam laruk ane imbisibareg usangge men usa ahan men fahet tu Allah hag toho wereg ulug wel turuk latfag. Ari roho turuk lit Allah enembol yit utuk latfag ane fahet Allahn Yehuda inap men Yerusalem inap men unubahet olok hibag.

¹⁹Olok hibareg An nambeg hebeloho wamuhup ulug amingmingangge nabi enembeg mon enebik watfareg fag toho komo eneptuk latfag angge famen iren enele holtuk latfag fug.

²⁰Holtuk latfag fugmu Allah ahime fanowon imam Yoyada amloho Zakharia ubam atfagma ap obog toho unubam ele uruk lit, ”Allahn ele urukon iminon tu holek lamok: Nungge fahet An HINIKNI Allahn ari-ari turuk lamuhup ulug imbiyahon arimano sobir isaruk lahep? Ari roho turuk lit fano amuhup fug. Hiren An HINIKNI Allah numbaharikipmu ketiya Anden oho hit hunumbaharuk lahi,” ulug hiyag isibag.

²¹Ari ulug hiyag isibagma iren hun ari ware fusul ulug mangno atfareg ap suwonen hiyag isibag ane hikit toho Zakharia ino senetfareg NINIKNI Allah ibam owahalman helep fam ware fisibag.

²²Zakharia ikni Yoyada inowen indam ap suwon Yoas indi reg lit let turuk latfag ane fahet wenggel ha fug angge ap suwon inowen Zakharia wariyok ulug hiyag isibag ane hikit toho helep fam ware feserukmu Zakharia inowen, ”Iren an nubam turukon NINIKNI Allahn yet isalug alem angginon unubam umbuhu,” ibareg war atfag.

²³Weregman mo wirig atfareg ilig atug heriyegma o Siria inaben Yoas umalikisi Yehuda inap men Yerusalem inap men tog abuhuk ulug watfareg it onowesi obog toho unusulug enenggengge huhulangge hilibahon obog toho ninikni ap suwon o Damsyik weregma walug lalihip ulug onotsi hiyag isibagma walug libag.

²⁴Yehuda inap arimanowen NINIKNI Allah unumbasiyen wel turuk latfahon enembol yig utuk latfag ane ari fahet NINIKNI Allahn Yehuda inap sehen senehon enebe mondoko welatfahon arimano o Siria inap enebe we tor angge watfahon ininggikmu imbibag. Imbibagma o Siria inaben Allahn pibag ane hikit toho Yoas umalikisi siyahap eneptuk lit

²⁵inikni Yoas oho tog sinat ware fisibareg inibam libag. Libagma Yoas amingmingangge piren inindimuwen wenggel haruk lit, ”Ninikni ap suwon inowen imam Yoyada amloho watisiyon ino fahet wabul,” pibareg Yoas ino ouk waruk lit nohoruk ambeg weregma libareg ware fisibagma war atfag. War atfagma o pumbuk unuk Daud suwalfahon fam ap suwon sal eneptuk ambeg saluk fug angge amumu sale fisibag.

²⁶Yoas ware fisibahon ununuk o Amon hiyap Simeat amloho Zabad men, o Moab hiyap Simrit amloho Yozabad men welatfag.

²⁷Ap suwon Yoas umalikisi ununuk men, nabi arimanowen aren siyag ane turuk ulug enele anggolo uruk latfahon men, aren Allah ibam haltuk latfag ane ari obog toho suwesingga ap suwonen turuk latfag ane fahet haharehon selehap tul ulug suwesingga amu paloho imbibahon fam hahareg. Yoas ino war atfagma amloho Amazia ikni ubalma ap suwon lahibag.