Read Angguruk Yali 2 TAWARIKH 25 Bible Online

2 TAWARIKH 25 - Angguruk Yali bible

2 TAWARIKH 25

¹Amazia indag atfag sali mo ilig am wirig am turukmen hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo ilig am wirig am turukmu teng misigmen nubam hilag pirenen 29 atfag. Amazia isinga o Yerusalem hiyap unuk Yoadan welatfag.

²Amazia inowen NINIKNI Allahn fano perukon turuk latfag angge famen indi misig toho At ubam wenggel haruk latfag fug.

³Ap suwon Amazia ino ine atfareg amingmingangge at ikni Yoas ware fisibahon arimano unusibag.

⁴Unusuruk lit Musa wene fam paloho imbibag ane hikit toho it unumalikisi oho unusibag fug. Musa wene fam NINIKNI Allahn ibag ane haharehon tu, ”Amlohowen siyag ane turukon fahet ikni ware fusuhup fug. Ikniyen oho siyag ane turukon fahet amloho ware fusuhup fug. Ap eke inggarehen siyag ane turukon ari famen eneg war aruhu,” ulug paloho imbibahon ari hikit toho unumalikisi unusibag fug.

⁵Welatfareg Amazia inowen Yehuda inap men Benyamin inap men wol enepfareg ununggul unuk man-man watfahon arimano onowesi wal tanehen ap teng-teng angge 1.000 men ap teng uhan 100 men milal eneptuk lamuhup ulug minggir enepfag. Minggir enepfareg winag isarukmen ap indag tibag sali mo ilig am wirig am turukmu likin fumahen 20 atfahon emberim filon enebe teng-teng angge 300.000 welatfag. It obog tohowen fit men tog piyabangge men seneg latfag.

⁶Amazia inowen nin sebe roho Israel inap aren seneg latfag fuhon sehelimuwon enehako roho turukon enebe teng-teng angge 100.000 nit men ambiyeg tog abik laruk lamuhuk ulug mingming eneptuk latfag. Mingming eneptuk lit uang perak anggolo 3.400 kilogram og isibag.

⁷Og isibagma Allah amingmingangge eke Amazia ambeg watfareg ubam ele uruk lit, ”Nikni hat ap suwon, haren Israel inap arima onggo og isarikin angge famen NINIKNI Allah it men wereg elehen it men ambiyeg tog abik lahup fug!

⁸Ambiyeg lahupteg hahako roho tog abuhun halug oho Allahn hat siyag amag ulug ap seliyon onolohotma humbahaku rohon! Allah ineyon inowen ap let enebuk teg, Aren oho ap apmayap enebuk teg,” ulug hiyag itfag.

⁹Hiyag itfagma Amazia inowen Allah amingmingangge fam, ”Ari halug uang anggolo og isarikikon arimano fahet anden nangginmin?” ibagma ap inowen, ”NINIKNI Allahn mun angge man angge ngi reg lit nin sebe roho og hum teg,” ibag.

¹⁰Ibagma Amazia inowen Israel inap hinibam lalihip ulug hiyag isibag. Hiyag isibahon fahet unundama ahe lahibagma Yehuda inap fahet enehummu het-pet haruk lit inibam libag.

¹¹Inibam libagma Amazia inowen akol eleg toho umalikisi hondog eneplug o Saho tonggoma libareg Edom inap men tog aptuk lit enebe teng-teng angge 10.000 unusibag.

¹²Unusibareg Edom inap winon teng-teng angge 10.000 onoluk angge sen enepfareg tom fam hondog eneplug lahibareg atelman pilabeg hik isa wambibagma unuwag lilibug toho lin ibag.

¹³Ari tibagma Israel inap Amazia inowen hinibam lalihip ulug hiyag isibahon arimano inibam laruk lit o Samaria men Bet-Horon men honggolegma o Yehuda pumbukmu kibareg Yehuda inap enebe teng-teng angge 3.000 unusibareg enenggengge anggolo huhulangge hilibag.

¹⁴Ap suwon Amazia inowen Edom inap mulangge unusulug ibam waharuk lit usangge Edom inaben tohon walug watfag. Usangge arimano unduhuk fibareg Amazia inowen tu Allah hag toho wereg ulug onolohotma elenggen fam hur atug wel eneptuk lit it unubahet hubu lahaptuk latfag.

¹⁵Ari roho turukmu NINIKNI Allahn Amazia fahet olok hibareg amingmingangge nabi eke monde fik watfareg at ubam ele uruk lit, ”Usangge ap o winamonen tohon aruman it wel eneptuk latusa inap hat hinggikmuwen windat enebuk fug teg latusa angge famen haren nungge fahet let nabusa ulug usangge aruma unubam sembahyang uruk lahen?” ibag.

¹⁶Ari urukmen Amazia inowen ele paloho nabi ino fam, ”Haren an ap suwon komo naptuk laruhunen unduhuk hubaharukuk ano? Hat huwabuhuk tohon hele imbisin!” ulug pet tibag. Pet tibagma nabi inowen ele imbisibag. Ele imbisibarehen nin ele uruk lit, ”Haren usangge aruma wel eneptuk lahen ane fahet anden komo habihi angge famen holehen fugmu Allahn hat siyahap habuhuk ulug kong toho embehekon ketiya an noluk aha!” ibag.

¹⁷Welatfagma Amazia inowen otsi men enele sahalfareg Israel inap onowe Yoas hun Yehu inowen indag tibahon Yoahas amloho ino ambeg lalihip ulug otsi mon enepfagma libareg inikniyen ibag ane hiyag utuk lit, ”Sa ine wereg ulug wal hahuken an men hat men tog abuhuk ehek,” ibag.

¹⁸Ibagma Yoas inowen Amazia hiyag utuk lit, ”Misihim sambil alog ahen tom Libanon fam welatisiyon ekeyen e sahi tom ino fam werehon hiyag utuk lit, ’Hat hahaloho an namlohowen hilamisiyen og itmihin,’ irisi. Og itmihin irisi angge famen wam eli ambeg waharuk lit alog ahen unuyuhen sobir-sabar isarusa,” ulug ele indit toho ibareg,

¹⁹”Haren Edom inap mulangge unusirikik ulug hinggareg wel taruk lahen. Ketiya aben wel nabukag ulug nin wilip aruhuk peruk lahen angge famen o kema-kema la fug angge hibam welaruhun! Nungge fahet haren siyag aruhuk peruk lahen? Haret humalikisiyet siyag amuhup tohon!” ibag.

²⁰Ari ulug hiyag itfag angge famen Amazia inowen holfag fug. Amazia umalikisi menen usangge Edom inaben tohon unubam sembahyang uruk ane fahet Allahn Yoas inggikmu umbuhuk pibag. Pibag ane ari hikit toho Yoasen an men hat men tog abuhuk fug ulug hiyag itfag angge famen Amazia inowen holfag fug.

²¹Holfag fugmu Israel inap onowe Yoas ino Yehuda kinangma watfareg at umalikisi men Amazia umalikisi menen o Bet-Semes horogman tog aptuk latfag.

²²Israel inap arimanowen Yehuda inap mulangge unusurukmu linggik-longgo ibareg inibam wal taneg libag.

²³Larukmu Israel inap onowe Yoas inowen Yehuda inap onowe Amazia ino o Bet-Semes horogman senetfareg o Yerusalem hondoholug libag. O Yerusalem libareg elehet walinggoho ohowon sok unuk Efraim famen tulug sok unuk Indit tehon fam halog toho siyahap til libag. Elehet halog tibag ambeg wirimangge yat toho wirim tibahon il teng sabiren 200 meter wirim toho siyahap tibag.

²⁴Siyahap tibareg emas perak umbagpag turukonet Allah wel turuk lit wan turuk anggeyet hun Obed-Edom inowen Allah ibam foroho latfahon arimano men fano-fano angge ap suwon ibam foroho latfahon men huhulangge hilalug suhuloho ibam o Samaria libag. Laruk lit Yehuda inap winon ininggik hele waroho hondog eneplug libag.

²⁵Israel inap onowe suwon Yoas war atfagma mo ilig am wirig am turukmu nuwal fimahen 15 atfagma Yehuda inap onowe suwon Amazia ino oho war atfag.

²⁶Amazia oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane ak tibag ambehen tulug obog tibag ane fahet suwesingga Yehuda inap onowesi men Israel inap onowesi menen turuk latfag ane fahet haharehon fam paloho imbibag.

²⁷Amazia inowen NINIKNI Allah ele holtukon imbisibag liyen tulug aben ap suwon ino pilabuhuk ulug enele sahaltuk latfag. Enele sahaltukon fahet holfareg Amazia ino o Yerusalem embeselug hirag-hirag o Lakhis libag. Libagma at pilabuhuk pibahon arimanowen at muko lalihip ulug ap mon enepfagma muko libareg o Lakhis inowen ware fisik libag.

²⁸Ware fisibagma Amazia wareg angge wam kuda fam imbik lahalug o Yerusalem libareg umbasi o pumbuk unuk Daud suwalfahon fam sal eneptuk latfag ambeg ar oho salfag.