Read Angguruk Yali 2 TAWARIKH 27 Bible Online

2 TAWARIKH 27 - Angguruk Yali bible

2 TAWARIKH 27

¹Yotam indag tibag sali mo ilig am wirig am turukmu hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo nisanggo fimahen 16 libag. Isinga unuk Yerusa hun Zadok ahaloho welatfag.

²Ikni Uzia inowen turuk latfag hag toho Yotam inowen oho NINIKNI Allahn fano perukon turuk latfag. We ikniyen Allah ele sobir isalug Allah ibam kibag hag toho at kibag fug. Umalikisi Yehuda inap arimanowen eneg siyag ane til-wil laruk latfag.

³Yotam inowen NINIKNI Allah ibam elehet walinggoho ohowon sok ik eleruk filon ino wiri fibag. Elehet punu Ofel walinggoho ohowon oho ineyap tibag.

⁴Tom Yehuda fam o pumbuk wiri fil laruk lit ohimu o yaron ap kahal enesug ambeg men o ineyon elehet yaron walinggoho ohowon men witil laruk latfag.

⁵Yotam inowen Amon inap onowe suwon men tog aptuk lit palimu atfagma Amon inap onowe inowen Yotamen hiyag itfag ane hikit toho ili ruruk angge perak anggin wirim tibahon 3.400 kilogram men, roti gandum anggen anggin wirim tibahon 1.000 ton men roti jelai anggen anggin wirim tibahon 1.000 ton men walug watfag. Walug watfag ane ari hikit toho mo eke fam eke fam walug waharukmen eneg mo hinahan atfag.

⁶Yotam ino NINIKNI Allah aren wel turuk latfahonen fano peruk ane hikit toho turukmen eneg ine anggolo atfag.

⁷Yotam oluk wereg lit turuk latfag ane tuma tor angge haharoho emberuk lahe. At ap suwon wereg lit tog aptuk latfag men mun ane man ane turuk latfag ane obog toho suwesingga Israel inap onowesi suwon men Yehuda inap onowesi suwon menen turuk latfag ane fahet haharehon fam paloho imbibag.

⁸Yotam indag tibag sali mo ilig am wirig am turukmu hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo nisanggo fimahen 16 libag.

⁹Welatfareg Yotam ino war atfagma o pumbuk umba Dauren witfahon fam salfag. Salfagma amloho Ahas ikni ubalma ap suwon lahibag.