Read Angguruk Yali 2 TAWARIKH 28 Bible Online

2 TAWARIKH 28 - Angguruk Yali bible

2 TAWARIKH 28

¹Ahas indag tibag sali mo ilig am wirig am turukmu likin fimahen 20 atfagma ap suwon lahibareg o Yerusalem wereg lit Yehuda inap fet enesugmen eneg mo ilig am wirig am turukmu nisanggo fimahen 16 atfag. Umba Daud ombolim la fug angge Israel inap onowesi tam welatfahonen turuk latfag ane hikit toho Ahas inowen oho NINIKNI Allah olohotman siyag ane eneg turuk latfag. Aren usangge besi ineyon fam lalfareg tu nunumbasi Baal ulug wel eneptuk lit

³o Ben-Hinom tonggoman wam waroho hubu lahaptuk latfag. NINIKNI Allahn Israel inap onolohotman yanggal enepfag inaben turuk latfag hag toho Ahas inowen oho ap enehummu siyahap eneptuk ane turuk lit umalikisi indokma yal enepfag.

⁴Hebeman oho punumuwen oho e usa ahen alman oho wam waroho hubu lahaptuk latfag.

⁵Ari roho turukmu NINIKNI Allah aren oho wel turuk latfahonen Ahas ino o Siria inap onowe suwon inggikmu imbibagma Siria inaben unusik watfareg Yehuda inap anggolo ininggik hele waroho o Damsyik imbisik libag. Imbisik libagma NINIKNI Allahn Ahas umalikisi men Israel inap onowe suwon hun Remalya amloho Pekah inggikmu imbibagma watfareg Yehuda inap mulangge unusibag.

⁶Yehuda inaben NINIKNI Allah unumbasiyen wel turuk latfahon ino enembol yig utuk latfag ane fahet Pekah inowen o misihim sambil eneg Yehuda inap enehako roho turukon teng obog sehelet obog 120.000 unusibag.

⁷Unusuruk lit o Efraim ahun ahako roho turukon unuk Zikhri inowen ap suwon Ahas amloho Maaseya men, ap suwon ibam foroho ahun Azrikam men, ap suwon iraham welatfahon Elkana men unusibag.

⁸Unusibareg Israel inaben onori yuhon Yehuda inap unuhesi men unumalikisi ap angge hiyap angge men enebe teng-teng angge 200.000 ininggik hele waroho o Samaria imbisik laruk lit enenggengge huhulangge hilibahon oho anggolo walug libag.

⁹Walug libagma NINIKNI Allah amingmingangge o Samaria welatfahon unuk Obed ino o pumbukmuwen wilip atug Pekah umalikisi men onolohotma libareg hiyag isaruk lit, ”NINIKNI Allah nit nunumbasiyen wel turuk latfahonen Yehuda inap fahet undama ahe laharisimu hit hininggikmu emberisi. Emberisimu hiren ap tor angge unuselep angge famen honolok anggolo roho al saguk-sagak toho unusurukmu enele hum toho ya nga uruson poholman oho hol isarikik.

¹⁰Ketiya hiren Yehuda inap men Yerusalem inap men abet hiyabet nenemingmingangge welamuhup peruk lahep. Ari roho turuk lit NINIKNI Allah hiren oho wel turuk lahebon olohotman siyag ane turuk lahebon ari henepeleg ano?

¹¹Ari fahet ketiya anden iminon tu holeg lamok: Hit honori yuhon famen ininggik hele waroho hondog eneplug waharikip angge re ininggik hele lol eneplihipteg hinibam lalihip ulug hiyag isalihip. Allah undama ahe laharukmu hit hunusuhu rohon!” ulug hiyag isibag.

¹²Hiyag isibagma Israel inap onowesi uhan Yohanan amloho Azarya men, Mesilemot amloho Berekhya men, Salum amloho Yehizkia men, Hadlai amloho Amasa men onotsi sehen senehon tog elman suhuloho watfahon onolohotma libareg

¹³hiyag isaruk lit, ”Ap aruma ninibam kilap enebik watlihip fug. Niren NINIKNI Allah olohotman siyag ane men nonolok ane men anggolo turukukmu At undama ahe laharukmu nit fahet olok haruk. Ketiya tul peruk lahep ane ariyen nin sebe roho siyag ane tuhup tohon!” ibag.

¹⁴Ari ibagma ap sehen senehon arimanowen Israel inap onowesi men ap luhaloho welatfahon men onolohotman Yehuda inap hondog eneplug watfahon ininggik hele lol enepfareg enenggengge huhulangge hilibahon hebeloho og isibag.

¹⁵Og isibagma ap aruma let eneplihip ulug ununuk ibahon arimanowen Yehuda inap enebe wal taneg welatfag ane kim isalug ik men suburu men og isibareg enesum elehon arimano sum huhulangge hilibahon men unuyug hililip angge men og isalug yowilangge werehon e zaitun ahaluwe enebene are enepfareg inine elehon wam keledai fam lahap eneplug ap og eneplug watfahon arimano obog toho inibam horog toho imbisik lul ulug o Yerikho palem ahen wereg ambeg libag. Imbisik libareg suhuloho inibam o Samaria watfag.

¹⁶O itano li Edom inap arimanowen nin eke Yehuda inap men tog abul ulug watfareg mulangge unusulug Yehuda inap winon ininggik hele waroho hondog eneplug libag. Hondog eneplug libagma Yehuda inap onowe Ahas inowen o Asyur inap onowe suwon ambeg lalihip ulug otsi mon enebik libareg ili og nenebik ma ulug heng tibag.

¹⁸Heng tibag li Filistin inaben oho o pumbuk Yehuda kinang hubula fil werehon men ik ambut fil werehon men senerik lahuk ulug watfareg o Bet-Semes, Ayalon, Gederot men, o Sokho, Timna, Gomzo men o pumbuk toron walinggoho werehon men ilmig tibareg yug toho welatfag.

¹⁹Yehuda inap onowe suwon Ahas inowen NINIKNI Allah ambol yig utuk lit umalikisi Yehuda inap alem unubam werehon fano hal enebuk fug angge welatfag ane fahet NINIKNI Allahn ap seliyon arimano mon enebik watfagma Yehuda inap apmayap enepfag.

²⁰Apmayap eneptukmu Ahas inowen o Asyur inap onowe suwon Tiglat-Pileser ili og nabik ma ulug wol tibag angge famen Tiglat-Pileser inowen Ahas ele ying tik watfag.

²¹Ele ying turukmu Ahas inowen fano-fano angge NINIKNI Allah ibam men ap suwon ibam men onowesi roho welatfahon inibam men foroho latfahon arimano wibareg o Asyur inap onowe suwon og itfag angge famen ap suwon inowen ele ying turuk ane imbisibag fug.

²²Ari roho ap seliyonen Ahas ino siyahap tuhuk ulug waharuk latfag li oho Ahas inowen NINIKNI Allah ambol yig utuk lit nin sebe roho siyag ane turuk latfag.

²³At indimuwen wenggel haruk lit, ”O Siria inaben nunumbasi ulug wel eneptukon arimanowen let eneptukmu Siria inap onowesiyen an apmayap naptusa angge re an oho let nabukag ulug anden it unumbasi fahet hubu lahabuhuk,” ulug o Siria inaben nunumbasi ulug wel eneptuk latfag angge arimano fahet wam waroho indokma yaltuk latfag. Ahas inowen o Siria inap unumbasi wel eneptuk latfag ane ariyen fobik at men umalikisi obog toho men mondabi siyag atfag.

²⁴Ahas inowen Allah ibam foroho latfag angge andog toho imbibareg halog toho hik isibag. Hik isibareg NINIKNI Allah ibam sok lare fibareg o Yerusalem walinggoho tu Allah hag toho wereg ulug laltuk angge fahet hubu lahaptuk ambeg ta witil ya witil laruk latfag.

²⁵Witil libareg o Yehuda pumbuk obog toho fam punu ke ap o winamon unumbasi fahet hubu lahaptuk ambeg wiri fil libag. Ari roho turuk lit Ahas inowen NINIKNI Allah umbasiyen wel turuk latfahon indi siyahap turuk latfag.

²⁶Ahas oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane ak tibag ambehen tulug obog tibag ane fahet suwesingga Yehuda inap onowesi men Israel inap onowesi menen turuk latfag ane fahet haharehon fam paloho imbibag.

²⁷Welatfareg Ahas war atfagma Israel inap onowesi suwon sal eneptuk latfag ambeg saltul fug ulug o Yerusalem saplanggema sale fisibag. Sale fisibagma amloho Hizkia ikni ubalma ap suwon lahibag.