Read Angguruk Yali 2 TAWARIKH 29 Bible Online

2 TAWARIKH 29 - Angguruk Yali bible

2 TAWARIKH 29

¹Hizkia indag atfag sali mo ilig am wirig am turukmen hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo teng misigmen nubam hilag piren 29 atfag. Hizkia isinga Zakharia ahaloho unuk Abi welatfag.

²Umba Daud inowen turuk latfag hag toho Hizkia inowen oho NINIKNI Allahn fano peruk ane turuk latfag.

³Hizkia ino we ket eneg ap suwon lahibahon mo ino fam pikalem tamon inam atfagma NINIKNI Allah ibam sok ikniyen lare fibahon arimano nin hebeloho husoho fanowap tibag.

⁴Fanowap tibareg imam inap men Lewi inap men wol enepfagma Allah ibam owahalma yali fil palu arik watfag.

⁵Palu arik watfagma Hizkia inowen it unubam ele uruk lit, ”Lewi hinap nori, anden iminon tu holeg lamek: Ketiya hunubabut puhun toho wereg lit NINIKNI Allah nunumbasiyen wel turuk latfahon ibam tu puhunap tebelihip. O tu siyahap turuk angge elma werehon obog toho wili feselihip.

⁶Niniknisiyen NINIKNI Allah ele sobir isalug Aren siyag perukon eneg turuk latusa. Enembol yig utuk lit At ibam fahet inirim peruk latusa.

⁷Inirim peruk lit NINIKNI Allah ibam sok arimano lare feserusareg iral olma werehon arimano ware feselug amben fano angge yaloho hubu lahaptuk ane men Israel ninap Ninikni Allah fahet wam waroho yaltuk ane men elehap turusa.

⁸Iren turuk latuson fahet NINIKNI Allahn olok haruk lit Yehuda kinang men o Yerusalem tu men siyahap tirisimu aben yet halug enekolen yuk lagmag uruk lit amben siyag ulug enembiyang lat tarukmu hiren oho yet isaruk lahep.

⁹Siyag ane turuk latuson fahet niniknisi tog elman unusurusareg nunuhesi nunumalikisi men ininggik hele waroho imbisik larusa ambeg wereg.

¹⁰Ari fahet ketiya NINIKNI Allahn nit nunubahet undama ahe laharukon ino eleg aruhuwen an nindimuwen nit Israel ninap NINIKNI Allah men nininggik ahandip toho welamuhuken sali umbul peruk lahi.

¹¹Numalikisi, ketiya ninirim puk fug angge hiniyabuk turuk lamek. NINIKNI Allahn nolohotma unduhuk lit An nubahet hubu lahaptuk lamuhup ulug hit mumal heneptisimu At amingmingangge roho wereg lit iyabuk turuk lamek,” ulug hiyag isibag.

¹²Hiyag isibagma Lewi inap Hizkian ehekon hikit toho tul ulug in atfahon ununuk ulon tu: hun Kehat inowen ondohowonen endetfahon Amasai amloho Mahat men Azaria amloho Yoel men; hun Merari inowen ondohowonen endetfahon Abdi amloho Kis men Yehaleleel amloho Azaria; hun Gerson inowen ondohowonen endetfahon Zima amloho Yoah men Yoah amloho Eden men;

¹³hun Elisafan inowen ondohowonen endetfahon Simri men Yeiel men; hun Asaf inowen ondohowonen endetfahon Zakharia men Matanya men;

¹⁴hun Heman inowen ondohowonen endetfahon Yehiel men Simei men; hun Yedutun inowen ondohowonen endetfahon Semaya men Uziel men in atfag.

¹⁵In atug onori wol enepfagma enembeg watfareg it obog tohowen Allah iyabuk tulen nunubabut haloho welamul ulug puhunap tibag. Puhunap tibareg indam NINIKNI Allahn kong toho imbibag ane hikit toho ap suwonen hiyag nisarisi ulug Allah ibam puhunap turuk ane ak tibag.

¹⁶Ak turuk lit imam arimano NINIKNI Allah ibam kibareg o ino siyahap tibag angge obog toho walug wilip atuk lit Lewi inap owahalma unduhuk latfahon og isarukmu iren ik Kidron tonggoma walug laruk latfag.

¹⁷Allah ibam puhunap turuk ane ari pikalem tamon ket inam atfag sambil ak tibareg puhunap turukmen eneg hup sabirenam atfag. Hup likin angge Allah ibam sokolma o toron witfahon ino fam kibareg NINIKNI Allah ibam sok lare feseruson nin hebeloho husuhuk ulug o ino obog toho fanowap turukmen eneg hup likinen atfag. Pikalem ino fam hup nisanggo fimahen atfagma Allah ibam obog toho hale fibag.

¹⁸Obog toho hale fibareg Lewi inap arimano ap suwon Hizkia ambeg libareg hiyag utuk lit, ”Niren NINIKNI Allah ibam obog toho puhunap turuk lit hubu lahaptuk ambehet hubu lahaptuk anggeyet e tuwalehon suburu roti emberuk ambeg oho e tuwalehon fene wereg angge oho puhunap teberukuk.

¹⁹Hun Ahas ap suwon laharisireg Allah ambol yig utuk lit Allah ibam foroho angge siyahap tirisiyon arimano niren nin hebeloho fanowap turukukteg NINIKNI Allah fahet hubu lahaptuk ambeg alukema emberukuk,” ulug hiyag itfag.

²⁰Hiyag itfagma likiyamon hubet Hizkia inowen Yerusalem inap onowesi wol enepfareg it men ambiyeg NINIKNI Allah ibam libag.

²¹Laruk lit ap suwon umalikisi men Yehuda inap obog toho menen siyag ane turuk latukukon men, Allah ibam siyag angge tag tehon men eleg amag ulug wam waroho hubu lahabul pibahon wam sapi yuhambukon sabiren men, domba yuhambukon sabiren men, domba umalik sabiren men, kambing yuhambukon sabiren men walug libag. Walug libareg Hizkia inowen hun Harunen endetfahonen ondohowon imam arimano unubam, ”Wam walug waheyon aruma NINIKNI Allah fahet hubu lahaptuk ambeg waroho hubu lahabiyok,” ulug hiyag isibag.

²²Hiyag isibagma wam sapi arimano watfagma imam arimanowen enemep oko walug hubu lahaptuk ambeg hililoho hik isibag. Ari tibag hag toho wam domba yuhambukon men wam domba umalik men wal-wal watfagma enemep wal taneg oko walug hubu lahaptuk ambeg hililoho hik isibag.

²³Hik isibagma siyahon nunubam tag tehon eleg amag ulug wam kambing waroho yaltul pibahon arimano ap suwon men umalikisi Yehuda inap men onolohotma walug watfag. Walug watfagma ap suwon men Yehuda inap menen wam ununggulmu ininggik imbibag.

²⁴Imbibagma imamen wam arimano watfareg enemep hubu lahaptuk ambeg hilili fibag. Hilili fibag ane ari ap suwonen tam hiyag isibag ane hikit toho Israel inap obog tohowen siyag ane turuk latuson eleg amag ulug turuk latfag.

²⁵Hilili fibagma Hizkia inowen Lewi inap unubam pinggong, puhuli, waruk men seneg lit Allah ibam iraham unduhuk lamek ulug hiyag isibag. Hiyag isibag ane ari NINIKNI Allahn amingmingangge nabi Natan men fulu roho yet halug hiyag isaruk ahun Gad men feneyen ap suwon Daud hiyag itfagma Dauren kong toho imbibag ane hikit toho Hizkia inowen hiyag isibag.

²⁶Hiyag isibagma Lewi inap arimano pinggong Dauren witfahon ininggikmu seneg lit in atfagma imam ele hum toho uruk angge ininggikmu seneg lit iniraham in arik libag.

²⁷In arik libagma Hizkia inowen wam warehebon aruma hubu lahaptuk ambeg imbik lahalug yaltuk lit hubu lahabiyok ulug hiyag isibagma hubu ket laharukmu itano NINIKNI Allah wel turuk asini lahapfag. Sini ino urukmu Lewi inap arimanowen pinggong Israel inap onowe Dauren witfahon arimano watikim imamen ele hum toho uruk angge watuk latfag.

²⁸Ari roho turukmu ap obog tohowen Allah wel tul ulug enelenggen fam hur atfag. Hur atukmu sini irikim ele hum toho uruk angge watukmen eneg wam arimano obog toho yalfag.

²⁹Yalfagma ap suwon men umalikisi iraham welatfahon obog toho enelenggen fam hur atug onorohole han kinangma sahung atfareg Allah wel tibag.

³⁰Allah wel tibareg Hizkia men ap suwon-suwon menen Lewi inap unubam NINIKNI Allah wel turuk asini Daud men fulu roho yet halug hiyag isaruk ahun Asaf menen milaltuk latfahon arimano ilihip ulug hiyag isibagma enehiyeg toho yunggultuk latfag. Yunggulfareg ir oho enelenggen fam hur atug onorohole pilabeg kinangma yinggig latfag.

³¹Ari tibagma Hizkia inowen ap obog toho unubam ele uruk lit, ”Ketiya hit NINIKNI Allahn tohon ahepteg amingmingangge roho wereg lit Allah olohotman nul ulug wam waroho esetukon men Allahn let neneptisi ulug wam waroho hubu lahaptukon men NINIKNI Allah ibam iraham tuma walug maniyek!” ulug hiyag isibagma wam walug watfag. Walug waharuk lit ap inindiyen nambohom abirangge Allah fahet waroho yalmin peruk latfahon arimanowen oho enembohom walug watfag.

³²Wam abirangge NINIKNI Allah fahet yalmin ulug walug watfahon sapi teng piren nubam hilag nisanggo fimahen 70 men, domba uwaliyon teng uhan 100 men, domba umalik teng sabiren 200 men walug watfag.

³³Wam Allah olohotma nul ulug walug watfahon sapi teng falfalik fimahen 600 men, domba teng-teng angge 3.000 men walug watfag.

³⁴Walug watfag li imam we tor anggeyen Allah iyabuk tulen nunubabut haloho welamul ulug puhunap tibag. Tor angge welatfahon arimanowen wam Allah fahet yaltukon anggolo walug watfahon enehap fungguluk fug teg latfagma onori Lewi inap folo-folo puhunap tibahon arimanowen let eneptukmen eneg imam winonen oho puhunap tibareg wam enehap obog toho fungguli fibag.

³⁵Fungguli fibareg imam arimanowen wam anggolo walug watfahon arimano men wam Allah olohotma esebul ulug walug watfahon sei men yalfareg wam yaltukon iniraham ik anggur ahaluwe hilili fibag. Ari roho turuk lit NINIKNI Allah ibamen wel turuk ane imbisibahon ino nin hebeloho ak tibag.

³⁶Ari obog toho tibibareg Hizkia umalikisi menen inindimu wenggel haruk lit Allahn let neneptukmu niren musun tuk fug angge folo-folo obog teberukuk ulug enehiyeg haruk latfag.