Read Angguruk Yali 2 TAWARIKH 3 Bible Online

2 TAWARIKH 3 - Angguruk Yali bible

2 TAWARIKH 3

¹Welatfareg hun Salomo inowen tom Moria o Yerusalem werehon ino famen NINIKNI Allah ibam wituk ane ak tibag. Tam tom ino fam o Yebus ahun Ornanen tohon roti anggen waruk ambeg irahamen NINIKNI Allah Salomo ikni Daud olohotma inam arik watfagma Daud inowen Allah ibam tuma wiruhuk ulug sali imbibag.

²Amloho Salomo ino ap suwon lahibagma mo ilig am wirig am turukmu uhan atfagma pikalem pirenon fam o pireneg angge Allah ibam wituk ane ak tibag.

³Allah ibam Salomo inowen witfahon ino wirimangge ilihig wirim tibahon il teng misig 27 meter, nunggulig wirim tibahon il sohowen wirim tibag.

⁴Allah ibam sokolma o toron eke witfahon wirimangge nunggulig wirim tibahon Allah ibam wirim tibahon hikit toho il sohowen, lahabeg wirim tibahon il sohowen[1] wirim tibag. O toron ino ubahat undama fil ili ruruk angge emas orohole mondabi fanowon fam lombog toho wiri fibag.

⁵Allah ibam hili suwon ubahat undamane e mur fam altap toho wiri fibareg emas orohole fanowon fam lombog tibil libag. Lombog tibibareg ubahat ino fene uluwa men e walahen owil fanowon men wirim toho hesenggengge oho fibag.

⁶Oho fibareg o ino undamane obog toho helep ili faya rurukon fam topno ribil libag. O ino undamane obog toho emas o Parwaim inowen walug watfahon fam hililip toho lombog tibil laruk lit uwag men ubahat men sok arimano men kembilik men fene oho lombog tibibag. Lombog tibibareg ubahat fene malaikat eneherabul wilibihon wirim toho hesenggengge oho fibag.

⁸Ari obog toho tibareg hili unuk Mondabi Fanoma suwaleg ambeg wiri fibag. Hili ino wirimangge ilihig wirim tibahon il sohowen wirim turuk lit nunggulig wirim tibahon oho Allah ibam wirim tibahon hikit toho il sohowen wirim tibag. Wirim tibareg hili ino undamane obog toho ili ruruk angge emas orohole fanowon anggin wirim tibahon 20.000 kilogram fam lombog tibil libag.

⁹Posiyemanggen arimano emas anggin wirim tibahon 500 gram fam hililip toho lombog tibag. Hili hinawimu werehon arimano oho emas fam lombog tibibag.

¹⁰Hili unuk Mondabi Fanoma suwaleg ambeg malaikat piren ilit toho wiri fibag. Malaikat itano wal taneg eneherabul piren wirimangge yat toho wirim tibahon il piren men misig minggiroho men wirim tibag. Malaikat piren itano hili ino pulmu unduhuk lit eneherabul wiriligmu malaikat misig aherabul fimahen ubahat fimag filon fam tung tegma malaikat pirenehon aherabul fimahen ubahat fimag filon fam tung teg latfag. Ari roho tung tegma eneherabul atog fimag-fimag o ilonggo fil ambimu tung teg latfag. Eneherabul wirilihon uhan itano wirimangge atogman atogma yat toho wirim tibahon il numen wirim tibag. Malaikat piren itano emas fam altap toho lombog tibibareg onorohole hili ino sok kurukon fil yet hawag ulug unuyug fam unduhuk fibag.

¹⁴Unduhuk fibareg Mondabi Fanoma mapmu roho ulug aluke fil sum tuhuloho pilabeg asum il sakowon hik toho urukon mut men polu men fam palehon yihik fibareg sum ino fam malaikat ahuhe ilit tibag.

¹⁵Ari tibareg hun Salomo inowen Allah ibam alukema unduhuk lamag ulug uwag piren wiri fibag. Uwag piren wirimangge lahabeg wirim turukon il nanggolop fimahen 17 meter wirim toho wiri fibag. Wiri fibareg uwag ambiyangma inale hutuk tohon wirimangge lahabeg wirim turukon il piren men sebe roho misig pul ke minggiroho men wirim toho wiri fibag.

¹⁶Inale piren itano walinggoho sohomangge keleg toho yihik fibag. Sohomangge itano fam yanggila anggen hahon teng uhan 100 iraroho aliliyangge lahabil libag.

¹⁷Lahabil libareg uwag piren itano Allah ibam alukema hutuk tibibag. Hutuk tibibagma uwag inggik pikit fil hutuk tibahon ino unuk Yakhin,[2] hare fil hutuk tibahon ino unuk Boas[3] suwaleg latfag.