Read Angguruk Yali 2 TAWARIKH 30 Bible Online

2 TAWARIKH 30 - Angguruk Yali bible

2 TAWARIKH 30

¹Pikalem tamon inam atfagma ap suwon Hizkia otsi iraham welatfahon men Yerusalem inap obog toho menen enele sahaltuk lit, ”Wam Paskah esetuk li horog aha angge famen imam we tor anggeyen Allah iyabuk tuhuken nunubabut haloho welamuhuk ulug puhunap tarusa. Ap o pumbuk walinggoho werehon oho we tor angge wam Paskah esebuhuk ulug o Yerusalem palu arik waharusa. Ari fahet pikalem pirenehon inam aruhumu eneg wam Paskah esebuhuk. Musa wene fam wam Paskah esetuk ane fahet haharoho imbibahon hikit toho Israel ninap nununggul unuk obog toho welaheyonen misihim oho esetukuk fug angge re ketiya eneg Musa wene hikit toho esebuhuken Israel inap obog toho o Bersyeba famen tulug Dan fam wol enebik lahuk,” ulug kong toho imbibag. Enele misig toho kong toho imbibag ane ari hikit toho Hizkia inowen suwesingga fam, ”Israel ninap NINIKNI Allah wel tuhuk ulug At ibamen wam Paskah esebuhuken o Yerusalem wamuhup,” ulug haharoho imbibareg amingmingangge og isaruk lit, ”Israel inap men Yehuda inap men obog toho hiyag isil(...)

⁶Hiyag isibag ane ari hikit toho ap suwon amingmingangge unuyug ilaluwe roho larukonen suwesingga Hizkia otsi iraham welatfahon menen haharoho imbibahon ino walug libareg Yehuda inap men Israel inap obog toho men hiyag isil laruk lit, ”Nonori Israel hinap, NINIKNI Allah Abraham, Ishak, Yakub menen wel turuk latfahon hebeloho heneluke yig umuhup. Heneluke yig umuhup halug Aren oho Asyur inaben honori ininggik hele waroho imbisik laruk lit hit we tor angge hunumbaharuson aluke yig hisahu.

⁷Hiniknisi honori menen nunumbasi INIKNI Allah enembol yig utusama Allahn siyahap eneptisimu aben yet isalug enekolen yuk lagmag urukmu hiren oho yet isaruk lahep. Ari fahet it onombolim laruk lamuhup fug.

⁸Hiniknisi inindi arik teg latusa hag toho hir oho welamuhup fug. NINIKNI Allah indi inahan turuk lit olok ane nunubam tuhu rohon At men nininggik ahandip toho welamuhuk ulug ambeg wamuhup. Allahn o tu mondabi welaruhuk ulug ibamap tarisi ambeg wamuhupteg At ubam sembahyang uruk lamuhup.

⁹Hiren NINIKNI Allah heneluke yig umuhup halug Asyur inaben honori hunumalikisi men ininggik hele waroho imbisik larusa angge famen nin hebeloho inindi isaruk lit hinibam lalihip ulug hiyag isahup. HINIKNI Allah ambeg hebeloho wamuhup halug inilaheg ulug ap obog toho indi enesug ahun inowen hit ambol yig hisahu fug,” ulug hiyag isil libag.

¹⁰Ari roho ap suwon amingmingangge unuyug ilaluwe roho larukonen Efraim kinang famen tulug o Manasye kinang keyen Zebulon kinangma o kema-kema ap hiyag isil larukmu aben hol isaluhen inda yako ininggaliyap eneptuk latfag.

¹¹We Asyer inap, Manasye inap, Zebulon inap men tor angge eneg inindi apmayap tibareg o Yerusalem libag.

¹²O Yehuda kinangma Allahn ap obog toho inindi misihap enepfagma enele misig toho, ”Ninikni suwon men nonowesi menen NINIKNI Allahn umalikisi komo enepfag ane hikit toho hiyag nisarusa ane roho tuhuk,” ibag.

¹³Pikalem pirenehon inam atfagma wam Paskah esebuhukteg suburu roti suwap turuk angge ragi embeselug wiratukon eneg naruk lit Allah olohotman nenehiyehen yunggultuk lamuhuk ulug ap anggolo mondoko o Yerusalem palu arik watfag.

¹⁴Watfareg o Yerusalem walinggoho tu Allah hag toho wereg ulug wel eneptuk angge fahet wam waroho hubu lahaptuk ambeg witfahon arimanowet amben fano angge yaloho hubu lahaptuk ambehet halog toho ik Kidron ayegma hik isa libag.

¹⁵Pikalem pirenehon fam hup nunggul hurikenam atfagma wam domba unuk Paskah arimano watfag. Imam inap men Lewi inap menen pikalem tamon fam unubabut puhun toho welatfag fuhon fahet wenggel haruk lit ininggali hibareg ininggareg puhunap tibareg Allah ibamen wam winon eke waroho hubu lahapfag.

¹⁶Hubu lahapfareg it arimano wal-wal Allah amingmingangge Musan Allah iyabuk wituk inap fahet imbibag ambeg in arik libag. In arik libareg imam inaben wam Paskah watfahon arimano enemep Lewi inap ininggiken oko walug hubu lahaptuk ambeg hililik libag.

¹⁷Wam Paskah walug watfag inap anggolo unubabut haleg eleg anggeyen enembohom wabuk fug teg latfagma Lewi inaben wam arimano NINIKNI Allah fahet emberuk lit ware fibag.

¹⁸Ap yatman watfahon anggolo Efraim inap, Manasye inap, Isakhar inap, Zebulon inap enesehelimuwon ininggareg puhunap tibag fureg Musa wene fam haharoho imbibahon hikit toho wam Paskah na fug teg latfag angge famen nibag. Nibagma Hizkia inowen it unubahet sembahyang uruk lit, ”NINIKNI Allah, Hat hubabut fanowon, ap ininggareg puhunap tarukon eneg Hat hibam iraham wam teg angge famen ap aruma enebe puhunap ta fug angge holohotma wahasa. Tuk fug teg ane tehesa angge famen inindi obog tohowen Hat unumbasiyen wel haptuk latfahon ino fam wenggel hiyaruk lit wahasa angge re ap aruman teheson hambolmaya fisin,” ulug sembahyang ibag.

²⁰Sembahyang ibag ane ari NINIKNI Allahn holfareg ap arimano alem unubam imbibag fug.

²¹Imbibag fugmu Israel inap o Yerusalem palu arik watfahon arimanowen suburu roti suwap turuk angge embeselug wiratukon eneg naruk lit Allah olohotman enehiyeg anggolo roho yunggultukmen eneg o sabirenam atfag. Likiya hupmu Lewi inap men imam inap menen pinggong ele hum toho watuk lit NINIKNI Allah wel turuk latfag.

²²Ari roho tibagma Hizkia inowen Lewi inap obog toho unubam ele uruk lit, ”Hinindi anggat toho wenggel haruk lit NINIKNI Allah iyabuk turuk latikip,” ulug wel enepfag. Israel inap arimano enehiyehen yunggultuk lit Allah olohotma wam waroho osoko naruk lit unumbasi Inikni Allah fok turukmen eneg o sabirenam atfag.

²³O sabirenam atfagma ap obog tohowen enele misig toho, ”Nin sebe roho yunggultuk lamuhuk,” ibareg nin eke enehiyehen yunggultukmen eneg o sabirenam atfag.

²⁴Ap yunggultukon aruman naruk lamuhup ulug Yehuda inap onowe Hizkia inowen wam sapi uwaliyon teng-teng angge 1.000 men, wam domba teng obog sehelet obog 7.000 men og isibag. Og isibag hag toho Yehuda inap onowesi arimanowen oho wam sapi uwaliyon teng-teng angge 1.000 men, domba teng obog sehelet obog 10.000 men og isibag. Wam og isibahon watuk ane fahet imam anggolowen ininggareg puhunap tibag.

²⁵Likiya hupmu yunggultuk ane ari fahet Yehuda inap obog toho men imam inap men Lewi inap men Israel kinangman waharuk latfahon obog toho men ap pohon Israel kinangma welatfahon men Yehuda kinangma welatfahon menen enehiyeg haruk latfag.

²⁶Daud amloho Salomo Israel inap onowe suwon welatfag liyen tulug ari hag toho o Yerusalem inowen yunggultuk latfag fuhon ketiya eneg enehiyeg anggolo roho yunggultuk latfag.

²⁷Yunggultuk ane ari obog atfagma Lewi inap imam welatfahon arimano in atug ap obog toho Allah unuk fam hi enepfag. Hi eneptukmu NINIKNI Allah poholma werehonen enele holfareg iren heng naptukon hikit toho tuhuk pibag.