Read Angguruk Yali 2 TAWARIKH 31 Bible Online

2 TAWARIKH 31 - Angguruk Yali bible

2 TAWARIKH 31

¹Yunggultuk latfareg inibam wal taneg laruk li horog atfagma Israel inap o Yerusalem palu roho welatfahon arimano Yerusalem embeselug o pumbuk Yehuda kinangma werehon walinggoho laruk lit usa ahalep halog tebeselug e usa ahen uwag hutuk tibibahon kong toho hik isaruk lit hubu lahaptuk ambeg punu ke witfahon arimano siyahap tibisil libag. Siyahap tibisil libag ane ari hag toho o Benyamin men Efraim men Manasye men kinangma tu Allah hag toho wereg ulug wel eneptuk ambeg obog toho siyahap tibisil libag. Ari tibareg inibam wal taneg libag.

²Ap suwon Hizkia inowen Allah amingmingangge imam men Lewi inap men palu wal tanehen iniyabuk man-man turuk lamuhup ulug hiyag isibahon tu, ”Likiya hupmu wam waroho hubu lahaptuk lit wam Allah olohotma nul perukon esetuk lamuhup, NINIKNI Allah ibamen sembahyang uruk ane haltuk lit Allah sini fam wel turuk lamuhup,” ulug imbibag.

³Allah ibamen hubu lahaptuk ane fahet ap suwon inowen ambohom og isaruk latfag. Hundig-hundig og isarukmu imam arimanowen NINIKNI Allahn ibag ane Musan haharoho imbibahon hikit toho hubet men hupmu men, o sabir angge men, pikalem keron inam atuk sambil men, Allah olohotma yunggultuk sambil winon men wam arimano waroho hubu lahaptuk latfag.

⁴Ap suwonen o Yerusalem inap obog toho hiyag isaruk lit, ”Imam men Lewi inap menen NINIKNI Allahn ibag ane Musa Wene fam haharoho imbibahon hikit toho iniyabuk inine roho turuk lamuhuben naruk angge eke hag eke hag og isa waharuk lamuhup,” ulug imbibag.

⁵Imbibag ane ari hiyag isil libagma Israel inap ik elerukmu welatfahon arimanowen iniyabukmuwen anggen atam paltukon eke hag eke hag anggolo roho walug waharuk lit roti anggen men, hele anggur men, e zaitun ahaluwe men, kin ahaluwe men Allah ibam walug waharuk latfag. Walug waharuk lit ininggikmu atuk angge obog toho palu numen tebelug numon arimano oho Allah ibam yabuk wituk inap og isa waharuk latfag.

⁶Israel inap men Yehuda inap men Yehuda kinangma welatfahon arimanowen enembohom sapi men domba men ininggik winag harukmu numen teg halug numon arimano men, mun angge man angge winon men NINIKNI Allah anggengge werehen umbul ulug walug waharuk lit palu roho emberukmen eneg palimu laharuk latfag.

⁷Imbik waharuk ane ari pikalem hinahanehon fam ak tibareg imbik waharukmen eneg pikalem sabiron inam atfag.

⁸Inam atfagma Hizkia men Israel inap onowesi men watfareg mun angge man angge palu roho imbik waharuk latfag angge arimano yet hibareg NINIKNI Allahn anggolo og isaruk latfahon fahet wel turuk lit umalikisi Israel inaben anggolo walug waharuk latfag ane fahet oho wel enepfag.

⁹Wel enepfareg Israel inaben palu ribik waharuk latfag angge arimano fahet Hizkia inowen imam inap men Lewi inap men umung isibagma

¹⁰imam onowe Azarya hun Zadoken ondohowonen endetfahon inowen hiyag utuk lit, ”NINIKNI Allahn umalikisi Israel inap mun angge man angge anggolo og isarukmu iren minggiroho NINIKNI Allah fahet imbik lul ulug At ibam waharuk. Ibam waharuk ane ari ak turusa sambilen tulug niren narukmen eneg nenehum ouken embeserukukon aruma haren yet haruk lahen,” ulug hiyag itfag.

¹¹Hiyag itfagma Hizkia inowen Allah fahet imbik waharuk angge foroho ambeg ulug NINIKNI Allah ibam iraham hili wiri fuhup ulug hiyag isibag ane hikit toho hili arimano wiri fibag.

¹²Wiri fibareg yabukmuwen anggen atam paltukon men, ininggikmu atuk angge obog toho palu numen tebelug numon arimano men, Allah fahet umbul ulug Israel inaben walug waharuk latfahon arimano hili arimano fam imbik kibag. Imbik kibag angge arimano Lewi ahun Konanya men at let turukon are Simei menen foroho latfag. Forohoma ap suwon Hizkia men Allah ibam foroho latfahon Azarya menen hiyag isibag ane hikit toho Yehiel, Azazya, Nahat, Asael, Yerimot, Yozabad, Eliel, Yismakhya, Mahat, Benanya menen hun Konanya men Simei men let eneptuk latfag.

¹⁴Lewi ahun Yimna amloho Kore Allah ibam sok yali fil werehon foroho ahun inowen Israel inap inindiyen Allah fahet imbik waharuk angge foroho latfag. Foroho lit Israel inaben Allah og irik waharuk angge men, Allahn tohon ulug imamen eneg na hahon men imam arimano og isaruk latfag.

¹⁵Hun Kore let turuk inap ununuk Eden, Minyamin, Yesua, Semaya, Amarya, Sekhanya men imam inibam pumbuk wal-wal wereg lit onori Lewi inap Allah ibam yabuk wal taneg witukon kabiniyonet sabalonet Allah fahet emberuk angge arimano fibir eneptuk latfag. Fibir eneptuk ane fahet imbibahon inine roho seneg lit ap wal taneg fibir eneptuk latfag.

¹⁶Fibir eneptuk lit imam inabet unumalikisi ap anggeyet ununuk suwesingga fam haharoho imbibahon eneg og isaruk latfag. Suwesingga ari haharoho emberuk lit imam onowesi ununuk men, palu wal tanehen tu sambil ano ari sambil ano Allah ibam yabuk turuk lamuhup ulug imbibahon men, unumalikisi ap angge indag atuk sambil mo ilig am wirig am turukmu hinahan atukon famen pali filon ununuk men haharoho imbibag. Ari hag toho Lewi inap palu wal tanehen iniyabuk man-man turukon indag atuk sambil mo ilig am wirig am turukmu likin fimahen 20 atukon famen pali filon ununuk oho haharoho imbibag.

¹⁸It obog toho likiya hupmu inindiyet enebeyet Allah iyabuk turukon ununuk ap hiyap malik obog toho haharoho imbibag.

¹⁹Hun Harunen ondohowonen ondohowon imam inap o pumbuk wal taneg walinggoho enembohom endetuk lit inibam anggenma welatfahon arimanowen oho suburu naruk lamuhup ulug Allah fahet emberuk angge fibir eneptukon lahap enepfareg ununuk suwesingga fam haharoho imbibag. It arimanowen imam men unumalikisi ap angge men Lewi inap ununuk haharehon men Allah fahet emberukon minggiroho og isaruk latfag.

²⁰Ari obog toho Hizkia inowen Yehuda kinang atogman atogma haloho emberuk latfag. Hizkia ino NINIKNI Allah men inggik ahandip toho wereg lit kalem pikiron embeselug la fug angge fano ane eneg turuk latfag.

²¹An Nikni Allah ele eneg holtuk laruhuk ulug indi obog tohowen Allah yami ruruk lit Allah ibamen sembahyang uruk ane hale fibareg Allahn tu men ari men turuk lamuhup ulug komo enepfag ane ineyap turuk latfag. Ari roho turuk lit mun ane man ane Hizkian timin peruk latfahon fano teberuk latfag.