Read Angguruk Yali 2 TAWARIKH 32 Bible Online

2 TAWARIKH 32 - Angguruk Yali bible

2 TAWARIKH 32

¹Hizkia ino Allah men inggik ahandip toho wereg lit ari obog toho tibagma Asyur inap onowe suwon Sanherib ino o Yehuda kinangma watfareg o pumbuk elehet ineyon walinggoho ohowon arimano ilmig tahuk ulug waling enesug latfag.

²Sanherib inowen o Yerusalem aru oho ilmig tahuk peruk ulug Hizkia oluk atfagma

³otsi iraham welatfahon men sehen seneg inap onowesi men unubam ele uruk lit, ”Ik eleruk o Yerusalem walinggoho werehon obog toho kinang fabuloho abibuhuk ano?” ibagma enele sahaltuk lit, ”Asyur inap onowesi arimano o Yerusalem horogma wamuhup halug ik naruk ambeg hiyahakup tohon ik obog toho latil lahuk,” ulug kong toho imbibag. Imbibareg ap anggolo wol enepfagma ik eleruk o Yerusalem walinggoho werehon obog toho latil libareg ik haloho o pumbuk elma kilabeg latfahon oho mapmu ribag.

⁵Mapmu ribagma Hizkia inowen elehet o Yerusalem walinggoho ohowon halog tibag ambeg arimano halfareg ap seliyon kahal enesug ambeg ulug o yaron elehet palimu witil libag. Witil libareg elehet pirenehon o pumbuk walinggoho oho felug o pumbuk Daud fam o yaron ineyon unuk Milo ino ineyap tibag. Ineyap tibareg fit men sing men anggolo wituk lamuhup ulug otsi hiyag isibag.

⁶Hiyag isibareg o Yerusalem inap sehen senehon onowesi milal eneptukon lahap enepfareg sok o pumbukmu kurukon iraham palu eneplug inindi inineyap eneptuk lit,

⁷”Hinindi wirik toho wereg lit henembong se roho turuk lamuhup! Ap seliyon mondoko waharukon fahet henekolen yuk la fug! Asyur inap onowe men waharukon arimanowen inine roho turuk ane apma regma nit men wereg ahunen ine roho turuk ane mondabi palimu reg.

⁸Asyur inap onowe inowen nit ap kinangmon ninine fam palimu amuhuk ulug wenggel haruk angge famen nit ninibil atukon NINIKNI Allah nit men wereg. Aren nit fahet tog aptuk lit windat nenebuhu,” ulug hiyag isibag. Ap suwon Hizkian hiyag isibag ane ari holfareg umalikisi inindi wirik atfag.

⁹Welatfagma Asyur inap onowe Sanherib umalikisi mondoko watfahon menen o pumbuk Lakhis walinggig lit otsi at iraham welatfahon unubam ap suwon Hizkia umalikisi Yehuda inap o Yerusalem weregma lalihip ulug mon enepfagma libag.

¹⁰Libagma hiyag isaruk lit, ”Asyur ninap nonowe Sanherib inowen ele urukon tu holeg lamek: Niren hit hinibam o Yerusalem aru waling henesug lit weregman hiren nungge fam wenggel haruk lit hinindi yuwag toho welahep?

¹¹Hit honowe Hizkia inowen hiyag hisaruk lit, ’NINIKNI Allah niren wel turuk laheyon inowen Asyur inap onowe inggikmuwen windat nenebuhu,’ ulug hinindi kahal heneptuk. Hinindi kahal heneptuk ane ariyen hit ik men suburu men oboken war amuhup.

¹²Hizkia inggarehen Yehuda hinap men Yerusalem hinap men hiyag hisaruk lit, ’Allah wel turuk ambeg o Yerusalem eneg weregma hit henebe watlug tuman eneg wel turuk lit hubu lahaptuk lamuhup,’ ulug hiyag hisarisireg o wina ke HINIKNI Allah wel turuk ambeg men hubu lahaptuk ambeg men obog toho elehap tirisi.

¹³An niknisi numbasi menen ap o pumbuk winamon unubam turuk latukukon fahet holtikip fug? It arimanowen tu Allah hag toho wereg perukon arimanowen it enengginang an Asyur inap onowe ninggikmuwen taluk naptusa ano? Eleg-o, nori.

¹⁴Nunumba ulug wel eneptukon obog toho enesehelimuwon misihen umalikisi an niknisiyen siyahap eneptukmu windat eneptisi ano? Nangginoho hit HINIKNI Allah inowen hit Yerusalem hinap an ninggikmuwen windat henebuhu?

¹⁵Hizkia inowen ele si ane uruk lit hinindi ninap henebuhu rohon! Aren hiyag hisaruk ane fahet tem uruk puk fug! O pumbuk kema-kema werehonen nunumba ulug wel eneptukon misihen oho umalikisi an niknisi men nininggikmuwen windat eneptisi fugmu hit hinikni Allah inowen oho hit an ninggikmuwen taluk nabuhu fug!” ulug hiyag isibag.

¹⁶Ari ulug hiyag isibareg Sanherib otsiyen nin sebe roho NINIKNI Allah we tem werehon ino men amingmingangge Hizkia men enebug il laruk latfag.

¹⁷Enebug uruk latfag ane hikit toho Sanherib inowen suwesingga fam haharoho emberuk lit, ”O pumbuk winamonen nunumba ulug wel eneptukon misihen oho unumalikisi an ninggikmuwen windat eneptuk latusa fugmu Hizkia ikni Allah inowen oho umalikisi an ninggikmuwen taluk nabuhu fug!” ulug Israel inap INIKNI Allah abug uruk lit unuk siyahap tibag.

¹⁸Sanherib otsiyen o pumbuk aru pin kulen enekolap enebul ulug o Yerusalem inap elehet emberim ke welatfahon unubam Yehuda inap enele fam hi roho hiyag isaruk latfag.

¹⁹Uruk lit Yerusalem inap Inikni Allah ino ap o pumbuk winamon unumbasi ininggiken witukon hag toho wereg ulug abug uruk latfag.

²⁰Ari urukmu holfareg Hizkia men Allah amingmingangge nabi Yesaya hun Amos amloho ino menen enele hi roho Allah poholma werehon ubam sembahyang uruk latfag.

²¹Sembahyang urukmu NINIKNI Allahn holfareg ot malaikat eke Asyur inap o sabo wiroho welatfag ambeg monde fik watfagma ap enehako roho turukon obog toho onowesiyet milal eneptuk inabet unusibag. Unusibagma Asyur inap onowe suwon ino inggali haruk lit suhuloho ibam libag. Libareg numbasi ulug wel eneptuk latfahon inibam kurukmen umalikisi yuhon arimanowen karog fam ware fisibag.

²²NINIKNI Allahn Hizkia men umalikisi Yerusalem inap men ili og eneptuk lit Asyur inap onowe Sanherib men ap seliyon obog toho ininggikmuwen windat eneptuk latfagma ap seliyon misig oho tog abik watfag fugmu Hizkia umalikisi men inindi yuwag toho welatfag.

²³Ari regma o pumbuk winamon anggolowen NINIKNI Allah fahet eke hag eke hag o Yerusalem imbik waharuk lit Yehuda inap onowe Hizkia oho fano-fano angge og irik waharuk latfag. Ari roho turuk lit o pumbuk winamon obog tohowen Hizkia unuk suwap turuk latfag.

²⁴Itano li ap suwon Hizkia ino ouk ubam atfagma war am hag ane turuk lit NINIKNI Allah ubam sembahyang ibag. Ibagma NINIKNI Allahn ele holfareg nin hebeloho fano aruhun ulug enehane aben tuk fug tehon ubam tibag.

²⁵Fano ane ubam tibahon fahet Hizkia inowen Allah wel telep angge famen Allah fahet wenggel ha fug angge inggarehen palimuwap taruk latfag. Palimuwap tarukmu yet hibareg Allahn at men umalikisi Yehuda inap men o pumbuk Yerusalem fahet undama ahe lahibag.

²⁶Undama ahe lahibagma Hizkia umalikisi men inindi anggar atuken ininggarehen apmayap tibagma Hizkia oluk welatfag li NINIKNI Allahn olok ane unubam tibag fug.

²⁷Hizkia unuk su atfagma anggengge anggolo foroho latfag. Nanggengge foroho ambeg ulug o witfareg ili ruruk angge emas men perak men helep ili faya rurukon men amben fano angge men sing men fano-fano angge eke hag eke hag men o witfahon arimano fam imbik kibag.

²⁸Imbik kibareg suburu foroho ambeg ulug o eke witfareg roti anggen men hele anggur anggen men e zaitun ahaluwe men andog toho imbik kibag. Imbik kibareg wam foroho ibam o kema-kema witil libareg ambohom anggolo endetuk latfahon arimano kilap eneptuk latfag.

²⁹Allahn mun angge man angge og utuk latfagma wam domba men sapi men anggolo foroho lit o pumbuk anggolo witil laruk latfag.

³⁰Hizkia inowen ik Gihon eleruk o pumbuk sel fil werehon ino kinang apmane haloho hubula fil lalug o pumbuk Daud fam kukag ulug kilabik watfag. Ari roho turuk lit mun ane man ane Hizkian timin peruk latfahon fano teberuk latfag.

³¹O itano li Babilonia inap onowesiyen onotsi mon enepfagma Hizkia o Yerusalem weregma libareg at ubam, ”Ouk alem angginon hubam welatisiyon ke roho fano atikin?” ulug kapal hibag. Kapal hibagma Allahn Hizkia indimuwen wenggel haruk ane noluk atmisiyen wal hamin ulug Hizkia imbisibagma ap mon enebik watfahon arimano Allahn let naptisi ulug hiyag isa fug angge un ane eneg hiyag isibag.

³²Ap suwon Hizkia oluk wereg lit turuk latfag ane tuma tor angge haharoho emberuk lahe. Aren turuk latfag ane obog toho men Allah men inggik ahandip toho wereg lit fano ane turuk latfahon men suwesingga nabi Yesaya hun Amos amloho inowen fulu roho yet haruk lit haharoho imbibahon fam paloho imbibag, suwesingga Yehuda inap onowesi suwon men Israel inap onowesi suwon menen turuk latfag ane fahet haharehon fam oho wereg.

³³Welatfareg war atfagma ap suwon Dauren ondohowonen ondohowon kinangma sal enepfag ambeg laharukon iraham salfag. Salfag sambil ino Yehuda inap men Yerusalem inap men obog tohowen at hi ribag. Ari tibagma amloho Manasye ikni ubalma ap suwon lahibag.