Read Angguruk Yali 2 TAWARIKH 33 Bible Online

2 TAWARIKH 33 - Angguruk Yali bible

2 TAWARIKH 33

¹Hun Manasye indag tibag sali mo ilig am wirig am turukmen nisanggowen atfagma ap suwon lahibareg o Yerusalem wereg lit Yehuda inap fet enesugmen eneg mo teng piren nubam hilag misig 55 libag.

²NINIKNI Allahn Israel inap onolohotman yanggal enepfag inaben ap enehummu siyahap eneptuk ane turuk latfag hag toho Manasye inowen oho NINIKNI Allahn siyag perukon eneg turuk latfag.

³Usangge fahet hubu lahaptuk ambeg punumu wirig latfahon ikni Hizkian siyahap tibag angge famen amloho Manasye inowen nin hebeloho wiri fil libag. Usangge Baal arimano fahet wam waroho yaltuk ambeg witil e usa ahen uwag hutuk tibil laruk lit suhal poholma mondoko werehon enepma elenggen fam hur atug wel eneptuk latfag.

⁴NINIKNI Allahn An nibam o Yerusalem wirihon inowen ketiya famen tulug fobik oho An nunuk wel naptukmen eneg welamuhup ibag angge famen Manasye inowen ap o winamon unumbasi fahet hubu lahaptuk angge Allah ibam unduhuk fik kibag.

⁵Unduhuk fik kibareg NINIKNI Allah ibam elehet piren huk toho kilabeg ambeg suhal poholma mondoko werehon fahet hubu lahaptuk ambeg wiri fibag.

⁶Usane arimano obog toho turuk lit o Hinom tonggoman umalikisi yuhon indokma yal enepfag. Aren pamongge fam ap unusuruk lit, fulu ane turuk lit, ap warehon enehime wol eneptuk lit, teko lahu ane fahet enehangge wereg ano ulug yami ruruk latfag. Ari roho NINIKNI Allahn siyag peruk ane su roho turuk lit At indi olokap turuk latfag.

⁷Usangge eke wit tibareg Allah ibam unduhuk fibag. Unduhuk fibag ambeg ino fahet Allahn ap suwon Daud amloho Salomo men unubam ele uruk lit, ”Anden Israel inap ununggul unuk obog toho enesehelimuwen o pumbuk Yerusalem eneko mumal tarikik. Mumal tarikik ambeg ino An nibam wit numuhupteg ketiya famen tulug fobik oho An nunuk wel naptukmen eneg welamuhup.

⁸Israel inap arimanowen An nele holtuk lit aben tuk teg ane men kalem pikiron laruk ane men fahet Musa feneyen komo eneptik iyag ane hikit toho turuk lamuhup halug Anden it fet enesugmen eneg welaruhukmu ap misihen oho kinang unumbasi og isiyag ambehen yanggal enebuhu fug,” ibag.

⁹Ari ibag angge famen Yehuda inap men Yerusalem inap menen holtuk latfag fug. Onowe Manasye inowen inindi kahal eneptukmu iren siyag ane su roho turuk latfahon men indam NINIKNI Allahn Israel inap onolohotman elehap enepfag inaben siyag ane turuk latfahon men wirim teg latfag fug.

¹⁰Ari regma NINIKNI Allahn Manasye umalikisi men unubam ele uruk latfag angge famen iren holfag fug.

¹¹Holfag fugmu NINIKNI Allahn o Asyur inap onowesi sehen senehon mon enebik watfagma hun Manasye kandi fam senetfareg kumbi ine angge tembaga wirihon fam waroho walug o Babilonia kinangma imbisik libag.

¹²Imbisik libagma Manasye ino asengseng toho wereg lit Allah umbasiyen wel turuk latfahon olohotman indi apmayap tibareg NIKNI Allah indi wiyihap timin ulug ele ilaheg toho sembahyang uruk latfag. Sembahyang urukmu NINIKNI Allahn holfareg let turukmu Manasye ino suhuloho o Yerusalem watfareg nin Yehuda inap fet enesug latfag. Ari teko libag ane ariyen Manasye inowen Allah we tik-tem toho NINIKNI wereg ulug oluk atfag.

¹⁴Welatfareg o pumbuk Daud walinggoho elehet yaron waruk lit ik Gihon eleruk hubula filen tulug ik Kidron tonggo ilig atug hebe unuk Ofel walinggoho sok o pumbukmu kurukon unuk Ikan suwalehon fil imbik libag. Elehet ino wibareg o Yehuda pumbuk elehet walinggoho ohowon wal taneg fam sehen seneg inap onowesi henebe misig-misig welamuhup ulug hiyag isibag.

¹⁵Hiyag isibareg ap o winamon unumbasi wel eneptuk ane elehap turuk lit usangge aren NINIKNI Allah ibam unduhuk fibahon oho hik isibag. Usangge fahet hubu lahaptuk ambeg aren Allah ibam horogma punumu witfahon men o pumbuk Yerusalem walinggoho witfahon men halog toho anggenma hik isa libag.

¹⁶Hik isa libareg NINIKNI Allah fahet hubu lahaptuk ambeg siyahap tibahon ino hale fibareg Allahn let naptisimu At men nininggik ahandip toho welamuhuk ulug wam waroho hubu lahapfag. Hubu lahapfareg Allah Israel ninap NINIKNI ino eneg wel turuk lamuhup ulug umalikisi Yehuda inap hiyag isibag.

¹⁷Ari ulug hiyag isibagma Yehuda inaben NINIKNI Allah fam wenggel haruk latfag angge famen At fahet punumuwen hubu lahaptuk ane imbisibag fug.

¹⁸Manasye oluk wereg lit turuk latfag ane tuma tor angge haharoho emberuk lahe. Aren turuk latfag ane obog toho men, Allah fam sembahyang uruk latfag ane men, Israel inap INIKNI Allahn nabi feneyen hiyag utuk latfag ane men suwesingga Israel inap onowesi suwonen turuk latfag ane fahet haharehon fam paloho imbibag.

¹⁹Manasye inowen sembahyang ibagma Allahn holfag ane men, Allah ambol yig utuk lit siyag ane turuk latfag ane men, Allah olohotman inggareg apmayap tibahon uwanma punu ke hubu lahaptuk ambeg wituk latfag ane men, e usa ahen uwag hutuk tebelug usangge unduhuk feruk latfag ambeg ununuk men ari obog toho suwesingga nabi arimanowen turuk latfag ane fahet haharehon fam paloho imbibag.

²⁰Welatfareg Manasye war atfagma inggareg ibam olma kinang habuloho salfag. Salfagma amloho Amon ikni ubalma ap suwon lahibag.

²¹Hun Amon indag tibag sali mo ilig am wirig am turukmen falfalik fimahen 22 atfagma ap suwon lahibareg o Yerusalem wereg lit Yehuda inap fet enesugmen eneg mo piren libag.

²²Ikni Manasye inowen turuk latfag hag toho amloho Amon inowen oho NINIKNI Allahn siyag perukon eneg turuk latfag. Ari roho turuk lit usangge ikniyen wit tibahon arimano obog toho aren oho wel eneptuk lit onolohotman hubu lahaptuk latfag.

²³Ikniyen NINIKNI Allah olohotman indi apmayap tibag hag toho amloho Manasye inowen inggareg apmayap ta fug angge siyag ane su roho turuk latfag.

²⁴Ari roho turukmu Amon otsiyen ninikni pilabul ulug enele sahalfareg ap suwon ibamen ware fisibag.

²⁵Ware fisibagma Yehuda inaben ap suwon watfag inap arimano obog toho unusibareg Amon amloho Yosia ikni ubalma ap suwon lahapfag.