Read Angguruk Yali 2 TAWARIKH 34 Bible Online

2 TAWARIKH 34 - Angguruk Yali bible

2 TAWARIKH 34

¹Hun Yosia indag atfag sali mo likinen atfagma ap suwon lahapfag. Lahapfagma o Yerusalem wereg lit Yehuda inap fet enesugmen eneg mo teng misigmen nubam hilag uhan 31 atfag.

²Umba Dauren turuk latfag hag toho Yosia inowen oho Allah olohotma fano roho wereg lit ke hareyon la fug angge pikir ane eneg turuk latfag.

³Ap suwon lahibagma mo ilig am wirig am turukmu likinen atfagma ebe kabinimu ak tibareg Allah umba Dauren wel turuk latfahon ele holtukmen eneg welatfag. Ap suwon lahibahon mo nisanggowon fam ak tibareg usasum o Yerusalem men Yehuda kinangma werehon obog toho elehap tuhuk ulug punu ke hubu lahaptuk ambeg siyahap tibisil laruk lit e usa ahen uwag hutuk tibibahon men usasum e men ine angge men fam wirihon halog til laruk latfag.

⁴Laruk lit umalikisi milal eneptukmu nunumbasi ulug wel eneptuk latfahon Baal fahet wam waroho yaltuk ambehet hubu lahaptuk ambeg emberim ke wirihonet siyahap til laruk lit e usa ahen uwag hutuk tibibahon arimano men, usasum e men ine angge men fam wirihon halog toho lilibug tibisibagma ul atfag. Ul atfag angge arimano usasum arimano wel eneptuk inap wareg angge sal eneptuk latfag ambeg hik-hak isa libag.

⁵Hik-hak isa libareg hubu lahaptuk inap imam unusibareg unuwag hubu lahaptuk ambeg arimanowen yal enepfag. Ari roho turuk lit Yosia inowen usasum o Yerusalem men o Yehuda kinangma welatfahon obog toho elehap tibag.

⁶Elehap tibareg Israel kinang obog toho walinggoho laruk lit o pumbuk Manasye kinangma werehon famen tulug o Efraim men o Simeon men keyen Naftali kinangma libareg usasum foroho ano ulug ap inibam o ele ke yami ril laruk latfag.

⁷Israel kinang obog toho famen nunumbasi ulug wel eneptuk latfahon fahet wam waroho yaltuk ambeg men hubu lahaptuk ambeg men siyahap til laruk lit e usa ahen uwag hutuk tibibahon arimano men usasum ininggiken wirig latfahon men halog toho lilibug turuk latfag. Ari tibareg suhuloho ibam o Yerusalem watfag.

⁸Yosia ino ap suwon weregman eneg mo num fimag 18 atfagma Yosia inowen usasum Israel kinangma foroho latfahon men Allah ibam foroho latfahon obog toho elehap turuk latfag li Azalya amloho Safan ino men o Yerusalem seneg ahun Maaseya men Yoahas amloho Yoah ap suwon unuk fam ap hiyag isaruk ahun ino men unubam ele uruk lit, ”NINIKNI Allah anden oho wel turuk lahiyon ibam haluhuben lalihip,” ulug hiyag isibag.

⁹Hiyag isibagma it hinahan itano imam onowe Hilkia ambeg libagma Hilkia inowen uang Israel inaben Allah ibam fahet emberuk latfahon og isibag. Uang ari Manasye inap men Efraim inap men Israel inap ununggul unuk winon ik eleruk fil werehon men Yehuda inap men Benyamin inap men Yerusalem inap men Allah ibam kuruk lit Lewi inap Allah ibam sok forohowon ininggikmu emberuk latfag. Uang arimano Hilkian it hinahan itano ininggikmu imbibagma

¹⁰iren Allah ibam haltuk inap onowesi og isibag.

¹¹Haltuk inap onowesiyen uang arimano onotsi e witukon men helep warukon men og isibagma obamangge aben walug waharuk latfahon arimano onggo paltuk latfag. Obamangge arimano fam Yehuda inap onowesi Yosia uwanma welatfahonen halfag fug ke arimano haltuk lit

¹²ininggik fano roho wituk latfag. Haltuk ane milal eneptukon ulug Lewi amloho Merari inowen ondohowonen endetfahon Yahat men Obaja men, Lewi amloho Kehat inowen ondohowonen endetfahon Zakharia men Mesulam men lahap enepfag. Lewi inap pinggong watukon arimanowen

¹³o miningguruk inap men yabuk ekeyon-ekeyon turuk inap men milal eneptuk latfag. Lewi inap winonen suwesingga haharoho emberukmu winonen mun angge man angge haltukmu winonen sok foroho latfag.

¹⁴Ari turuk li uang aben Allah ibam walug waharuk latfahon arimano wiliptukmu imam Hilkia inowen NINIKNI Allahn Musa feneyen umalikisi komo enepfag ane haharoho imbibahon ino Allah ibam hirako weregma hiyahibag.

¹⁵Hiyahibareg Hilkia inowen suwesingga hahatukon Safan hiyag utuk lit, ”Allahn umalikisi komo enepfag ane haharoho imbibahon ino Allah ibam hirako weregma hiyahaki,” ibareg suwesingga hiyahibahon ino Safan og itfag.

¹⁶Og itfagma Safan inowen suwesingga ino walug ap suwon Yosia og irik libareg hiyag utuk lit, ”Haren nit hamingmingangge hiyag nisarikinon obog toho teberukuk.

¹⁷Uang Allah ibam imbik waharuk latuson obog toho o haltuk inap men onowesi milal eneptukon men ininggikmu emberukuk,” ibag.

¹⁸Ibareg nin ele uruk lit, ”Imam Hilkia inowen suwesingga aru og nerehek,” ulug Yosia olohotman hahareg ane winon eneg kim heheg uruk latfag.

¹⁹Ari urukmu hol hibareg indi siyag atfagma Yosia inowen sum wan teg latfahon tararag tibisibag.

²⁰Tararag tibisibareg imam Hilkia, Safan amloho Ahikam, Mikha amloho Abdon, suwesingga hahatuk ahun Safan, at let turuk ahun Asaya, it arimano unubam hiyag isaruk lit,

²¹”Suwesingga aru fam hahareg ane nit nunumbasiyen fano roho kim ha fug angge NINIKNI Allahn komo enepfag ane hikit toho turuk latfag fugmu NINIKNI Allah ahum ke het-pet haruk lit olok peruk ane indok ambulpul hag toho nunubam atuk. Ari fahet lalihipteg suwesingga hiyaharisiyon fam hahareg ane fahet NINIKNI Allahn an men Israel inap men Yehuda inap men we tor angge welaheyon nunubam hiyag nisamisi ane kapal ha lalihip,” ulug hiyag isibag.

²²Hiyag isibagma hun Hilkia men it uhan itano men o Yerusalem o keron arimano witfag ambeg Allah amingmingangge nabi hiyap angge Hulda weregma libag. (Hulda ahun unuk Salum ino sum Allah ibam forohowon arimano haloho emberuk ahun welatfag. Salum ikni Tokhat, Tokhat ikni Hasra welatfag.) Hulda ambeg libareg Yosian mon enepfahon arimanowen suwesingga hiyahibahon fahet Hulda hiyag itfag.

²³Hiyag itfagma Hulda inowen hiyag isaruk lit, ”Israel ninap NINIKNI Allahn uruk ane iminon tu Yosia fam hiyag irik lalihip,

²⁴’Suwesingga fam hahareg ane Safan inowen Yehuda inap onowe Yosia olohotman ehekon hikit toho An Allahn o Yerusalem inap siyag amuhup iyahon hikirap turuk lit alem angginon unubam umbuhuk.

²⁵Iren An enembol yig nutuk lit ap winonen Allah hag toho wereg perukon unubahet wam waroho hubu lahaptuk latusa. Iren siyag ane eneg turuken An nindimu nolok haruk lahi ane indok ambulpul war atuk elehon o pumbuk aru fam aruhu.

²⁶Yosia nare, hat hinggareg fahet An Israel hinap HINIKNI Allahn nele tu uruk lahi: Suwesingga ino fam hahareg ane holehenteg

²⁷hinggarehen An nolohotman apmayap taruk lit hindimuwen nambiken tirikik peruk lahen. ’Anden o pumbuk Yerusalem aru men o aru wereg inap men alem angginon unubam umbuhuk,’ irikik ane ari fahet hindi siyag ahama hasum tararag tebeseruk lit An nolohotman uba yarehen. Ari fahet haren An nubam sembahyang uruk lahenon Anden holtuk lahi.

²⁸Anden hat let haptukmu hebe fano weregman eneg war aruhun. War aruhunmu eneg Anden o pumbuk aru men o aru wereg inap men alem angginon unubam umbuhuk,’ ehek,” ulug Hulda inowen hiyag isibagma Yosian mon enepfahon arimanowen onowe hiyag irik libag.

²⁹Hiyag irik libagma Yosia inowen Yehuda inap onowesi men Yerusalem inap onowesi men wol enepfareg

³⁰it men Allah ibam foroho inap imam men, Lewi inap men, Yehuda inap, Yerusalem inap obog toho suwonet toronet Allah ibam libag. Libareg weregma ap arimano iniline Yosia inowen suwesingga Allah ibamen hiyahibahon ino fam hahareg ane obog toho kilap heheg uruk latfag. Suwesingga ino fam Allahn hit An numalikisi welamuhup ulug sali emberuk latfag ane haharoho imbibag.

³¹Haharoho imbibahon kilap halug uruk latfareg Yosia ino e Allah ibam owahalma pilabehon iraham in atfareg NINIKNI Allah olohotman sali emberuk lit, ”We Hat hombolim eneg laruk lit Haren komo neneptuk lit imbinahon eneg seneg lit ninindiyen oho nenehimeyen oho Haren peruk lahen ane eneg turuk lit suwesingga aru fam haharehon hikit toho welamuhuk,” ulug sali imbibag.

³²Sali imbibareg o Yerusalem inap welatfahon men o Benyamin kinangman watfahon men unubam hiren oho sali embelihip ulug hiyag isibagma it obog tohowen, ”Allah nunumbasiyen wel turuk latfahon olohotman sali ehenon holehereg niren oho seneg lamuhuk,” ulug fag toho ibag.

³³Ari ibagma Yosia inowen kinang Israel inaben seneg latfahon atogman atogma usasum ap enehummu siyahap eneptukon arimano obog toho elehap tibareg Israel kinangma welatfag inap obog toho unubam, ”We NINIKNI Allah eneg wel turuk lamuhup,” ulug hiyag isibag. Hiyag isibag ane ari hikit toho Yosia oluk wereg li Israel inap arimanowen NINIKNI Allah unumbasiyen wel turuk latfahon enembol yig um fug angge At ombolim eneg laruk latfag.