Read Angguruk Yali 2 TAWARIKH 35 Bible Online

2 TAWARIKH 35 - Angguruk Yali bible

2 TAWARIKH 35

¹Welatfareg Yosia inowen NINIKNI Allah wel tulen wam Paskah wirabul ibagma pikalem tamon fam hup nunggul hurikenam atfagma wam domba umalik unuk Paskah arimano watfag.

²Watfagma Yosia inowen imam unubam NINIKNI Allah ibamen hit hiniyabuk wal tanehen fano roho turuk lamuhup ulug milal enepfag.

³Milal enepfareg Lewi inap NINIKNI Allahn mumal tibahon Israel inap Allah wene fahet anggul eneptukon arimano unubam ele uruk lit, ”Peti Wene Numen haharehon elma kilabeg angge ino Allah ibam Israel ninap nonowe suwon Salomo hun Daud amloho inowen witfag ambeg imbik kibag. Imbik kibag ambeg mondabi werehen hiren o kema-kema paya roho walug laruk lahep fug. Ari fahet ketiya NINIKNI Allah hiren wel turuk lahebon iyabuk turuk lit umalikisi Israel inap let eneptuk lamuhup.

⁴Israel ninap nonowe Daud inowen haharoho imbibag ane men amloho Salomoen haharoho imbibag ane men hikit toho hit palu wal taneg welahebonen yabuk man-man turuk lamuhuben wep toho welamuhup.

⁵Hit palu wal tanehen honori Israel inap palu amu-amu Allah ibam waharukon arimano let eneptuk lamuhup.

⁶Let enebuk oho lit NINIKNI Allahn Musa feneyen ibag ane hikit toho nunubabut haloho welamul ulug puhunap tahupteg honori Israel inap fahet wam domba arimano waroho isag isahup,” ulug hiyag isibag.

⁷Hiyag isibareg ap suwon Yosia inowen Israel inap Allah ibam palu arik watfahon unubahet wam Paskah wiratukon ulug ambohom domba umalik men kambing uwaliyon kabiniyon men teng-teng angge 30.000 og isaruk lit nin sebe roho ambohom sapi teng-teng angge 3.000 og isibag.

⁸Aren og isibag hag toho otsi at iraham welatfahon arimanowen oho Israel inap men imam men Lewi inap men inindiyen wam og isibag. Og isarukmu imam onowesi Allah ibam forohowon Hilkia, Zakharia, Yehiel menen seni Paskah esetukon wam kambing domba teng-teng angge 2.600 onotsi imam arimano og isibareg nin sebe roho wam sapi teng nanggoloben 300 og isibag.

⁹Ari hag toho Lewi inap onowesi roho welatfahon Konanya ori Semaya men Netaneel men, it onori Hasabya, Yeiel, Yozabad menen onotsi Lewi inap unubahet wam Paskah wiratukon wam kambing domba teng-teng angge 5.000 kilaptuk lit nin sebe roho wam sapi teng num fimahen 500 kilapfag.

¹⁰Wam Paskah wirabul ulug mun ane man ane tuk hahon tibibareg ap suwonen hiyag isibag ane hikit toho imam arimano wal tanehen iniyabuk turuk ambeg in arik larukmu Lewi inap palu wal taneg enembeg libag.

¹¹Libareg Lewi inap arimanowen wam Paskah arimano watfareg enemep oko walug imam og isibagma hubu lahaptuk ambeg hililoho hik isibag. Hik isarukmu Lewi inaben wam warehon enehap funggulfag.

¹²Funggulfareg Musan haharoho imbibahon hikit toho Israel inap palu wal tanehen NINIKNI Allah fahet wam misig-misig waroho hubu lahaptuk lamuhup ulug amumu imbibag. Ari hag toho wam sapi oho misig-misig amumu imbibag.

¹³Amumu imbibareg wene fam haharoho imbibag ane hikit toho wam Paskah arimano indok ambulpul ke sulum pal heheg wiratuk lit wam sapi arimano Allah olohotma nul ulug kubag men kou men fam esetfareg folo-folo ap obog tohowen nawag ulug fibir enepfag.

¹⁴Fibir enepfareg imam hun Harunen ondohowonen ondohowon arimanowen wam unu men wam sei men anggolo indokma yaltuk lit hubu lahaptukmen eneg o hup atmisi ulug Lewi inap arimanowen it men ininggareg men unubahet wam Paskah arimano wiratfag.

¹⁵Ari hag toho Lewi inaben onori Allah wel turuk asini uruk inap men Allah ibam sok foroho inap men wam Paskah arimano wirag isibag. Wirag isarukmu ap suwon Daud men Asaf, Heman, fulu roho yet halug hiyag utuk latfahon Yedutun menen imbibag ane hikit toho sini uruk inap hun Asaf inowen ondohowonen endetfahon arimano inibalma weregma sok foroho inap arimano oho sok wal taneg iraham unduhuk latfag.

¹⁶O ino sambil ap suwon Yosian hiyag isibag ane hikit toho turuk lit NINIKNI Allah wel tul ulug wam Paskah arimano wiratuk lit wam unu men sei men hubu lahaptuk ambeg indokma yaloho hubu lahaptuk latfag.

¹⁷Ari tibareg Israel inap palu roho welatfahon arimanowen suburu roti suwap turuk angge ragi embeselug wiratukon eneg narukmen hup sabirenam atfag.

¹⁸Allah amingmingangge nabi Samuel welatfag liyen tulug ari hag toho Israel inap onowe suwon misihen oho wam Paskah wiratuk latfag fuhon we ari sambil eneg ap suwon Yosia, imam inap, Lewi inap menen o Yerusalem inap men o Yerusalem watfahon Yehuda inap men Israel inap men ambiyeg wiratuk latfag.

¹⁹Wam Paskah wiratfag ane ari Yosia ap suwon lahibagma mo ilig am wirig am turukmu num fimahen 18 atfagma teko libag.

²⁰Yosia inowen Allah ibam halfareg welatfagma Mesir inap onowe suwon Nekho inowen ik Efrat ayegma o pumbuk Karkemis horogma tog abuhuk ulug larukmen Yosian at seneruhuk ulug wilip atfag.

²¹Wilip atfagma holfareg Nekho inowen otsi Yosia ambeg mon enebik waharuk lit, ”Yehuda inap onowe welahenon, nare, nungge fahet haren te anden tuhuk peruk lahiyon fahet nirim peruk lahen? Anden hat apmayap habuhuk ulug wahi fug, an men seli roho werehon o Babilonia inap men tog abuhuken wahi. Allahn folo-folo lahun ulug hiyag nitisi. At an men werehon inowen hat huwaruhu rohon ulug ele ying tuk fug,” ulug hiyag itfag.

²²Ari ulug hiyag itfag angge famen Yosia inowen Allahn hun Nekho feneyen hiyag itfag ane ari holfag fug. Holfag fureg Yosia inowen Nekho men tog abuhuk pibag ane umbusuk fug angge it seliyonen an fahet ap amuwon pukag ulug sum amuwon wan taruk lit o Megido tonggoma tog abul ulug libag.

²³Tog elma larukmen Nekho otsi sehen senehonen tog sinat ware fisibag. Tog sinat watfagma ap suwon Yosia inowen otsi unubam, ”Tog nuwarehesama tog silimu embeselug og naplug lalihip,” ulug hiyag isibag.

²⁴Hiyag isibagma otsiyen Yosia ino kereta wam kudan lisoho walug laruk angge emberimu heriyegma lisoho pilabik watfareg kereta eke fam imbik lahibareg o Yerusalem walug watfagma war atfag. War atfagma umbasi sal eneptuk latfag ambeg ar oho kinangma salfag. Saltukmu Yehuda inap men Yerusalem inap men obog tohowen Yosia fahet fong watuk latfag.

²⁵Yosia war atfagma nabi Yeremian piya sini milalfag. Yeremian milalfag ane hikit toho sini uruk inabet hiyabet obog tohowen ap suwon Yosia fahet piya sini uruk latfag hag toho ketiya oho uruk. Piya sini uruk ane ari Israel inaben enepeleg am fug angge hundig-hundig uruk. Piya sini arimano suwesingga unuk Hunu Sini suwalehon fam haharoho imbibag.

²⁶Ap suwon Yosia oluk wereg lit turuk latfag ane tuma tor angge haharoho emberuk lahe. Aren ak tibag sambilen tulug obog-obogma turuk latfag ane obog toho men aren NINIKNI Allah Wene haharoho imbibahon hikit toho fano ane turuk latfahon men suwesingga Israel inap onowesi men Yehuda inap onowesi men unubahet haharoho imbibahon fam hahareg lit wereg.