Read Angguruk Yali 2 TAWARIKH 36 Bible Online

2 TAWARIKH 36 - Angguruk Yali bible

2 TAWARIKH 36

¹Ap suwon Yosia salfagma o Yerusalemen Yehuda inaben Yosia amloho Yoahas Yehuda ninap fet nenesug laruhun ulug ikni ubalma ap suwon lahapfag.

²Yoahas indag tibag sali mo ilig am wirig am turukmen fuwap fimahen 23 atfagma ap suwon lahibareg o Yerusalem wereg lit Yehuda inap fet enesugmen pikalem hinahan eneg libag.

³Libagma Mesir inap onowe suwon inowen Yoahas ino Yehuda inap onowe welaruhu fug ulug pilabe fisibag. Pilabe fisibareg Nekho inowen Yehuda inap alem unubam emberuk lit onggo ili ruruk angge perak anggin wirim turukon 3.400 kilogram men emas anggin wirim turukon 34 kilogram men og numuhup ulug hiyag isibag.

⁴Hiyag isibareg Mesir inap onowe Nekho inowen Yoahas are unuk Elyakim Yehuda inap men Yerusalem inap men onowe welaruhun ulug unduhuk fibag. Unduhuk feruk lit unuk keron Yoyakim suwalfag. Ari obog toho tibareg are Yoahas ino senetfareg hondoholug o Mesir watfag.

⁵Hun Yoyakim indag tibag sali mo ilig am wirig am turukmen hinahaneg fimahen 25 atfagma ap suwon lahibareg o Yerusalem wereg lit Yehuda inap fet enesugmen eneg mo nanggoloben libag. Yoyakim inowen NINIKNI Allah aren oho wel turuk latfahonen siyag perukon turuk latfag.

⁶At ap suwon welatfag li Babilonia inap onowe suwon Nebukadnezar inowen at men tog abul ulug watfareg Yoyakim ino senetfareg inggik kumbi ine angge tembaga wirihon fam waroho walug o Babilonia kinangma imbisik libag.

⁷Imbisik laruk lit NINIKNI Allah ibam foroho angge minggiroho winon hilalug ibam o Babel welatfahon fam imbik libag.

⁸Yoyakim oluk wereg lit turuk latfag ane tuma tor angge haharoho emberuk lahe. At ap suwon wereg lit turuk latfag ane obog toho men ap enehummu siyahap eneptuk ane turuk latfahon men suwesingga Israel inap onowesi suwon men Yehuda inap onowesi suwon menen turuk latfag ane fahet haharehon fam paloho imbibag. Welatfagma Yoyakim amloho Yoyakhin ikni ubalma ap suwon lahibag.

⁹Hun Yoyakhin indag atfag sali mo ilig am wirig turukmen num fimahen 18 atfagma ap suwon atfareg o Yerusalem wereg lit Yehuda inap fet enesugmen eneg pikalem hinahan libagma hup numenam atfag. Yoyakhin inowen NINIKNI Allah olohotman we siyag ane eneg turuk latfag.

¹⁰Mo wirig atfareg ilig atug heriyegma ap suwon Nebukadnezar inowen otsi o Yerusalem mon enebik watfareg ap suwon Yoyakhin ino o Babilonia kinang fam hondoko imbisik laruk lit fano-fano angge Allah ibamen foroho latfahon oho hilalug libag. Libareg Nebukadnezar inowen Yoyakhin ikni are Zedekia Yehuda inap men Yerusalem inap men onowe welaruhun ulug lahapfag.

¹¹Zedekia indag tibag sambilen mo ilig am wirig am turukmen sabit fiman 21 atfagma ap suwon lahapfag. Lahapfagma o Yerusalem wereg lit Yehuda inap fet enesugmen eneg mo nanggoloben atfag.

¹²Zedekia inowen NINIKNI Allah aren wel turuk latfahon olohotman siyag ane eneg turuk lit inggarehen apmayap ta fug angge NINIKNI Allahn amingmingangge nabi Yeremia feneyen hiyag itfag ane holtuk latfag fug.

¹³Holuk fug angge indi arik teg lit Israel inap INIKNI Allah anduhun yig utuk latfag. Ari roho turukmu ap suwon Nebukadnezar inowen at ubam, ”Allahn holeg lit weregma an napma welaruhunen tem toho imihin,” ulug hiyag itfag ane hikit toho sali imbibag angge famen fobik Nebukadnezar inggikmu welaruhuk fug ulug inggik kobog isibag.

¹⁴Imam onowesi men Israel inap onowesi menen oho NINIKNI Allah enembol yig utuk lit o pumbuk winamonen ap enehummu siyahap eneptuk ane turuk hag toho siyag ane til-wil laruk lit NINIKNI Allahn ibamap tibag ambeg o Yerusalem werehon ino oho siyahap tibag.

¹⁵Siyahap turukmu yet isibareg NINIKNI Allah Israel inap unumbasiyen wel turuk latfahon inowen umalikisi Israel inap indi isaruk lit At ibam oho indi reg latfareg siyag amuhup tohon komo enebik lalihip ulug eke sambil eke sambil amingmingangge mon enebik waharuk latfag.

¹⁶Mon enebik waharuk latfag angge famen umalikisiyen Allahn komo eneptukon fahet inda yatuk lit amingmingangge nabi arimano enele ying eneptuk latfag. Ari roho Allah ele apmayap turukmen eneg NINIKNI Allah undama ahe lahibagma numalikisiyen siyag ane turukon Anden nambolmaya fusuhuk fug pibag.

¹⁷Ari pibareg NINIKNI Allahn o Babilonia inap onowe suwon Nebukadnezar indi kahaltukmu o Yerusalem watfagma NINIKNI Allahn Yehuda inap obog toho inggikmu emberukmu Nebukadnezar inowen abet hiyabet kabiniyonet sabalonet indi isa fug angge obog toho unusuruk lit Allah ibam welatfahon oho unusibag.

¹⁸Unusibareg Allah ibamen sembahyang uruk lit wan turuk angge suwonet toronet fano-fano angge Allah ibamen foroho latfahon men ap suwonen tohon men Israel inap onowesiyen tohon men obog toho hilibag.

¹⁹Hilibareg Allah ibam men o fanowonet fano-fano angge huhulangge hilaruk lit imbisibahonet harep pisako siyaha fisibareg elehet o Yerusalem pumbuk walinggoho ohowon halog toho lin-lan isibag.

²⁰Lin isibareg ap karog fam unusuruk lit imbisibahon arimano ininggik hele waroho o Babilonia kinang fam imbisik libagma Babilonia inap men unumalikisi men enemingmingangge weregman eneg o Persia inaben Babilonia inap arimano apmayap enebik watfag.

²¹Israel inap arimano o Babilonia kinangma weregman eneg mo ilig am wirig am turukmen teng pirenman nubam hilag nisanggo fimahen 70 atfagma suhuloho enengginangma watfag. Ari teko libag ane ari fahet NINIKNI Allahn amingmingangge nabi Yeremia feneyen ele uruk lit, ”Hit henengginang mo sabiron fam kel tawag ulug hiniyabuk wibuk fug angge welalep angge famen hiren hiniyabuk umbusuk fug angge witukmen eneg henengginang kel tarisi fug. Ari fahet ketiya eneg kel tawag ulug hit henengginang famen wilip amuhupteg ap seliyon wereg ke weregman eneg mo ilig am wirig am turukmen teng piren nubam hilag nisanggo fimahen aruhu,” ibag ane ari hikir atfag.

²²O Persia ahun Kores ino ap suwon lahibahon mo ino fam NINIKNI Allahn hun Yeremia feneyen ibag ane hikir amag ulug Kores indi kahaltukmu Kores inowen o pumbuk obog tohowen holukag ulug suwesingga eke haharoho imbibag. Haharoho imbibag ane tu,

²³”An Kores o Persia hinap honoweyen nele uruk lahiyon tu holeg lamek: NINIKNI Allah poholmon inowen o pumbuk kinang atogman atogma werehon obog toho an ninggikmu og nitisireg Aren an nubam hiyag nutuk lit, ’Yehuda kinang fam o Yerusalem An nunuk wel naptuk lamuhup ibam wit nuruhun,’ ulug hiyag nitisi. Ari fahet hit winon Yahudi hinap Allah umalikisi welahebon HINIKNI Allahn fet henesugmu hit hinibam o Yerusalem tam welatikip ambeg suhuloho lahup,” ulug haharoho imbibag ane ino o Persia pumbuk obog toho walinggoho hiyag isil libag.