Read Angguruk Yali 2 TAWARIKH 4 Bible Online

2 TAWARIKH 4 - Angguruk Yali bible

2 TAWARIKH 4

¹Ari tibareg Salomoen ine angge tembaga fam hubu lahaptuk ambeg eke wiri fibag. Wituk lit wirimangge yat toho wirim turukon men, ayuhuk wirim turukon men ambi roho il numen 10 meter, lahabeg wirim turukon il fuwaben wirim toho wiri fibag.

²Wiri fibareg tembaga fam kou walu warehon humon eke lale fibareg unuk Ik Ahum suwalfag. Kou ino atog fuman fuma wirim tibahon il fuwaben, walinggoho wirim tibahon il nuwal fimahen, lahabeg wirim tibahon il piren wirim toho lale fibag.

³Kou ino umbangguwag walinggoho aliliyangge wam sapi hahon iraroho topno ribil libag. Topno ribil laruk lit il misig-misig fam wam hahon numen topno reberuk lit tot apma oho ari hag toho wam sapi hahon iraroho topno ribil libag. Wam hag angge arimano men kou ino men amu-amu laluk fug angge misigmu mangno roho lale fibag.

⁴Lale fibareg wam sapi hag angge tembaga fam witfahon nisanggowen unduhuk fibareg enemberimu kou humon ino imbibag. Wam sapi onorohole yali fil hinahan, hubula fil hinahan, ik eleruk fil hinahan, ik ambut fil hinahan yet teg latfag.

⁵Kou ino ine amag ulug onggorik men umbantu men ambi roho wirimangge inggik misig wirim toho wiri feruk lit e owil hag toho welaruhu ulug inggapkap sel fil simbuk toho lale fibag. Kou ino ik ololop toho hinangguruk lit kubag teng-teng angge 60.000 liter hinangguk teg latfag.

⁶Kou humon Ik Ahum suwaleg angge ino wiri fibareg kou ik hinanggoho foroho angge numen wiri fibag. Wiri fibareg kou fuwaben Allah ibam ik ambut fil embelug fuwaben Allah ibam ik eleruk fil imbibag. Kou itano fam wam men suwe men waroho hubu lahabul peruk latfahon arimano ik umatuk latfag angge famen kou humon Ik Ahum suwaleg angge fam we Allah amingmingangge imam arimano eneg enebe ik umatuk latfag.

⁷Kou obog toho unduhuk fibareg iral fahet imbibag ane hikit toho umbagpag turuk angge emas fam iral emberuk angge numen wiri fibag. Iral emberuk angge fuwaben Allah ibam undama inggik pikit fil unduhuk feruk lit fuwaben inggik hare fil unduhuk fibag.

⁸Unduhuk fibareg e tuwalehon numen wiri felug fuwaben Allah ibam undama inggik pikit fil unduhuk feruk lit fuwaben inggik hare fil unduhuk fibag. Unduhuk fibareg emas fam tebuwag numen wiri fibag.

⁹Ari obog toho wiri fibareg Allah ibam owahalma Allah amingmingangge imam kuruk ambeg ulug walinggoho elehet huk toho wibareg ap palu atuk lamuhup ambeg walinggoho elehet eke oho fibag. Ap palu atuk ambeg sok kurukon wiri feruk lit tembaga fam hililip toho lombog tibibag.

¹⁰Ari tibareg kou humon Ik Ahum suwaleg angge ino Allah ibam sok kuruk ambeg horogma ik ambut fil unduhuk fibag.

¹¹Unduhuk fibareg hun Huram inowen tembaga fam tumbuwo men tebuwag men fa men lalfag. Huram inowen ap suwon Salomoen hiyag itfag ane hikit toho Allah ibam iraham emberuk angge obog toho wiri fibag.

¹²Wiri fibag angge arimano obog toho tuma ul: Uwag piren men, inale pumangon piren men, sohomangge inale walinggoho keleg toho yihikon piren men,

¹³yanggila anggen hahon sohomangge itano fam apma fil oho pali fil oho iraroho aliliyangge lahabil libahon teng nuwal fimahen 400 men,

¹⁴kereta lisoho walug laruk angge men, kou ik hinanggoho foroho ambeg kereta itano fam emberukon men,

¹⁵kou humon unuk Ik Ahum suwalfahon men, kou emberuk ambeg wam sapi nisanggowen men,

¹⁶tumbuwo, tebuwag, fa men wiri fibag. Wiri fibag angge arimano obog toho Huram Abi inowen ine angge tembaga fam wiri felug orohole umbagpag turuk laruhu ulug fano roho umaho fibag.

¹⁷Ap suwon Salomo inowen ibag ane hikit toho Allah ibam iraham emberuk angge arimano wiri fuhuk ulug ik Yordan ayegma kinang huluwon wereg ambeg o Sukot men Zereda men honggolegma libareg ine angge tembaga ino indokma wiratfagma ik hag atfahon arimano emberuk angge unubabut wal-wal amag ulug kinang fam kubag wirim toho lalfahon elma hilili ferukmu ine atfareg emberuk angge eke hag eke hag atfag.

¹⁸Salomoen ibag ane hikit toho Allah ibam iraham imbibag angge tembaga fam witfahon arimano anggolo mondoko werehen anggin wirim haruk angge fam wirim tibag fugmu ap obog toho enepeleg teg.

¹⁹Ap suwon Salomoen ibag ane hikit toho Allah ibam foroho angge obog toho wiri fibag. Wiri fibag angge arimano tuma ul: Hubu lahaptuk angge men, e tuwalehon Allah olohotma roti emberuk ambeg men,

²⁰iral emberuk angge hili alukema Mondabi Fanoma suwaleg ambeg unduhukon arimano men, iral imbibag ane hikit toho pisatukon men,

²¹hesenggengge e owil hahon iral emberuk ambeg uwag fam topno rehon men, fa indok anggen hambo rurukon men,

²²tumbuwo, habo, tebuwag, indok anggen kilaboho walug laruk angge men, sok Mondabi Fanoma kurukon men, sok Allah ibam kurukon men arimano obog toho emas umbagpag turukon fam wiri fibag.