Read Angguruk Yali 2 TAWARIKH 5 Bible Online

2 TAWARIKH 5 - Angguruk Yali bible

2 TAWARIKH 5

¹Ari roho witukmen eneg Salomoen NINIKNI Allah ibam obog toho wiri fibag. Wiri fibareg ikni Dauren Allah fahet imbibahon umbagpag turuk angge perak men emas men Allah wel turuk lit wan teg angge winon men Allah ibam fano-fano angge foroho ambeg imbik kibag.

²Salomo inowen Allah ibam obog toho wiri fibareg Allah Wene Numen haharehon peti elma kilabeg angge o pumbuk Daud Ibam tom Sion fam werehon ino wak lulteg Allah ibam imbik lulen o Yerusalem nambeg watlihip ulug Israel inap onowesi ap suwon-suwon men o wal taneg fet enesug inap men obog toho wol enepfag.

³Wol enepfagma pikalem sabiron fam Allah wel turuk sambil it obog toho Salomo ambeg palu arik watfag.

⁴Israel inap onowesi obog toho palu arik watfagma Lewi inap arimanowen peti ino paya roho walug watfag.

⁵Lewi inap arimano men Allah ibam foroho inap imam inap menen peti inowet o sabo Allah men Ambi Atuk Ibamet fano-fano angge o saboma foroho latfahon arimano obog toho Allah ibam imbik lul ulug walug watfag.

⁶Walug watfagma ap suwon Salomo men Israel inap obog toho men peti ino alukema unduhuk lit wam domba men sapi men teng-teng angge winag ha fug toho Allah olohotma waroho yalfag.

⁷Yalfareg imam arimanowen peti ino Allah ibam walug kibareg o hili undamon Mondabi Fanoma suwalfag ambeg ino malaikat piren unduhuk fibahon itano eneherabul apma imbik kibag.

⁸Peti ino e payahen itanowet angge apma weregma malaikat itano eneherabul peti ino palimu wiriloho hondo reg latfag.

⁹E payahen itano hili Mondabi Fanoma suwalfag ambeg weregma ap hili ino sel fil unduhuk lit yet harukmen e payahen itano ambiyang yat tehen inam teg latfag. Ari reg latfag ambeg ino ketiya oho wereg.

¹⁰Peti ino elma nungge-nungge winon elegma Allah Wene Numen helep piren fam hahatfahon itano Musan tom Sinai alman peti elma kilabe fibahon itano eneg wereg latfag. Helep piren itano fam hahatfag ane Israel inap o Mesiren wilip atukmu NINIKNI Allahn it unubam An numalikisi welamuhup ulug sali imbibahon ino hikit toho haharehon welatfag.

¹¹ O ino sambil imam inap minggiroho winonen Allah ibamen yabuk warukmu onori winon onowesi wal taneg werehon kel taruk latfag angge famen ir oho unubabut puhun toho wereg lit Allah ibam watfag. It obog toho watfag hag toho Lewi inap Allah asini yunggultukon hun Asaf, Heman, Yedutun men unumalikisi onori men obog toho watfag. Lewi inap arimano sum il sulumon kindik hein fam yihikon wan teg lit pinggong, puhuli, waruk men ininggikmu seneg lit hubu lahaptuk ambeg yali fil unduhuk latfag. It iniraham imam inap enebe teng uhan nubam hilag 120 pinggong ele hum toho uruk angge seneko unduhuk latfag. Unduhuk latfahon arimanowen NINIKNI Allah wel tul ulug pinggong, waruk, ele uruk angge winon men teltuk lit enele misig toho, ”At ubabut fanowonen indi nenesugmen eneg wereg,” ulug yunggultuk latfag. Ari roho yunggultukmu imam winon arimano NINIKNI Allah ibamen wilip atukmu itano hina kik watfareg Allah ibam o ele ke keleg teg latfag.

¹⁴NINIKNI Allah hina sehelimu wambik watfareg umbagpag turukmu o ino ele ke mondabi seleg teg latfagma imam arimano Allah ibam kuk fug tehen yabuk wituk latfag fug.