Read Angguruk Yali 2 TAWARIKH 6 Bible Online

2 TAWARIKH 6 - Angguruk Yali bible

2 TAWARIKH 6

¹Ari sambil Salomo inowen ele uruk lit, ”Hat NINIKNI Allahn An hik tegma welaruhuk pinag ane hikit toho hirahoma welahen.

²Ketiya anden Hat mondabi welaruhun ambeg ulug o fanowon aru wiri ferikik,” ibag.

³Ari ibareg Salomo ino aluke hebel atfareg Israel inap obog toho unduhukmu Allah unuk fam hi enepfag.

⁴Hi enepfareg ele uruk lit, ”Israel ninap NINIKNI Allah wel turuk lamul. Aren nikni Daud fam hiyag utuk lit, ’Anden numalikisi Israel inap o Mesiren hondog eneplug wilip atik iyag liyen weregman eneg An nunuk wel naptuk ibam eke wibuhup ulug Israel kinang walinggoho werehon misig fam oho hiyag isarikik fug. An numalikisi fet enesug laruhu ulug ap misig oho mumal tarikik fug. Ketiya eneg An nunuk wel naptuk lamuhup ambeg ulug o Yerusalem aru mumal taruk lit numalikisi Israel inap fet enesug laruhun ulug Anden hat Daud mumal haptikik,’ ulug sali imbibag. Sali imbibag ane ino Allahn hikirap tirisi,” ibag.

⁵

⁶

⁷Ibareg nin eke hiyag isaruk lit, ”Nikni Daud indimuwen Israel ninap NINIKNI Allah unuk wel turuk ibam wiruhuk pibag angge famen

⁸Allah at ubam ele uruk lit, ’Haren peruk lahen ane ari fano wenggel haruk lahen angge famen

⁹haren wiruhun fug. Hamloho haren enderuhunon inowen An nunuk wel naptuk ibam wiruhu,’ ulug Daud fam sali imbibag.

¹⁰Allahn sali imbibahon ino hikit toho tirisimu an nikni Daud ubalma Israel inap fet enesug laruhuken ap suwon laharikikteg Israel ninap NINIKNI Allah wel turuk ibam tu witikik.

¹¹Witikikteg Allah Wene Numen haharehon peti elma kilabeg angge ino At ibam kilabihi. NINIKNI Allahn nunumbasi unubam sali imbibag ane ino hahatfahon peti ino undama kila fibahon wereg,” ulug hiyag isibag.

¹²Salomoen lehoma unduhuk ambeg ulug ine angge tembaga fam witil laharuk lit wirimangge yat toho wirim turukon men, ayuhuk wirim turukon men ambi roho il piren, lahabeg wirim turukon il misig wirim toho wiri fibareg Allah ibam owahalma elehet huk toho oho ambeg pulmu unduhuk fibag. Salomo inowen Israel inap unubam ele hiyag isibareg lehoma unduhuk angge ino fam lahibareg aluke Allah fahet hubu lahaptuk fil hebeloho Israel inap iniline elenggen fam hur atfag. Hur atfareg inggik pohol fil leho lit sembahyang ibag.

¹³

¹⁴Sembahyang uruk lit, ”Israel ninap NINIKNI Allah, Hat hahon poholma oho kinangma oho misig wereg eleg. Hat hamingmingangge inindi piren teg eleg angge hele holtukon arimano hindi enesug lit sali unubam emberikinon hikit toho turukmen eneg welahen.

¹⁵An nikni Daud fam hiyag itikin ane ino hine roho seneg lit Hat hambilik famen irikinon hikit toho tirikin ane o yoho inam aha.

¹⁶Israel ninap NINIKNI Allah, Haren nikni Daud fam nin hiyag utuk lit, ’Anden tu men ari men turuk lamuhup ulug komo heneptikik ane haren holtuk lahen hag toho hat humalikisiyen oho holtuk lit welamuhup halug Anden hat humalikisi welamuhubon arimano ninggik kobog isa fug angge welaruhukmu iren Israel inap fet enesugmen eneg welamuhup,’ ulug nikni Daud hiyag itikin.

¹⁷Ari ulug Hat hamingmingangge an nikni Daud hiyag itikin ane ino ketiya inamap timihin.

¹⁸Allah Haren we tik-tem toho ap iniraham kinangma welaruhuk peruk lahen? Pohol obog tohowen Hat hebe waling hasug lam fug tegma o anden wiri ferikikon toron tuwen oho waling hasug lam fug teg.

¹⁹NIKNI Allah, an hamingmingangge tuwen Hat hubam sembahyang uruk lit heng haptuk lahiyon hebeloho yet niya ma! An nele ine roho o yoho Hat holohotma uruk lahiyon tu hol hamihin.

²⁰An nunuk wel naptuk lamuhup ulug hiyag nisarikin ibam tu Haren likiya hupmu foroho lit welaruhun ulug heng haptuk lahi. An Hat hamingmingangge aru men humalikisi Israel inap menen o aruwen Hat hubam sembahyang uruk lamuhukmu[4] Hat poholma welahenonen nenele holtuk lit niren siyag ane turukon elehap turuk laruhun.

²¹

²²Ap ekeyen ap eke fam siyag ane tehek urukon ino Hat fahet hubu lahaptuk ambeg o tu werehon alukema hondoholug wamuhupmu ap inowen siyag ane nubam uruk lahebon tik-tem toho tirikik fug ulug Hat holohotman fag turuk laruhu halug

²³Hat poholma welahenonen at ele uhuwon holtuk lit Hat hamingmingangge alem unubam werehon haloho emberuk laruhun. Siyag ane turuk inap arimano Haren hebeloho alem siyahon unubam emberuk laruhun. Fano ane turuk inap arimano Haren enehap siye eneptuk lit hebeloho fano ane unubam emberuk laruhun.

²⁴Hat humalikisi Israel inap arimanowen Hat holohotman siyag ane turukon ari famen ap seliyonen mulangge unusuruk lamuhupmu suhuloho Hat hambeg waharuk lamuhupteg Hat hunuk wel habul ulug o aruwen sembahyang uruk lamuhup halug

²⁵Hat poholma welahenonen it enele holtuk laruhun. Holtuk laruhunteg Hat humalikisi Israel inaben siyag ane turukon elehap turuk lit suhuloho kinang unumbasi men it men og isarik inahon ino fam hondog eneplug waruhun.

²⁶Iren Hat holohotman siyag ane turukon ari fahet Haren osit poholman pilabik waharuk laruhun fugmu it arimano Allahn apmayap neneptisimu niren siyag ane turukukon embesehe ulug eneluke Hat hibam tu fil hebel atuk lit hubam sembahyang uruk lamuhup halug

²⁷Hat poholma welahenonen it enele holtuk lit it men onowesi suwon menen siyag ane turukon elehap turuk laruhun. Haren pikir ane turuk lamuhup ulug komo eneptuk lit kinang Haren humalikisi ngi amuhup ulug og isarikinon ino fam osit pilabik waruhun.

²⁸O pumbuk tu fam suburu obok men, hom inggila watuk ane men, suburu inggila puglengge urukon men, heren sunggabi ayeg olokon men, sobolim men, ap seliyonen o pumbuk walinggoho kilap eneptukon men, ouk alem siyahon nungge-nungge it unubam atukmu

²⁹ap misihen ano Hat humalikisi Israel inap obog toho aruman ano asengseng toho wereg lit inindi man-man anggin toho wenggeltuk ane Allah fag toho hiyag umul ulug ininggik o aru fil leho lit Hat hubam sembahyang uruk lamuhup halug

³⁰Hat poholma welahenonen it enele holtuk lit let enepmin ulug iren siyag ane turukon elehap turuk laruhun. We Haren eneg ap obog toho inindimu wenggeltuk ane holuk teg lit iren siyag ane fano ane turukon Haren lisoho unubam lombohap eneptuk laruhun.

³¹Ari roho tuhun ane fahet kinang nunumbasi og isarikinon ino fam it arimano onoluk wereg lit kalem Allahn hiyag nisarukon laruk lamuhuk ulug Hat fahet enekol toho welamuhup.

³²Ap pohon eke Hat humalikisi Israel inap fuhon famen Hat suwonen fano ane hinggik hine roho turuk lahen ane fahet holuhureg Hat hunuk wel habuhuk ulug ibam yatman waruhureg o aruwen Hat hubam sembahyang uruk laruhu halug

³³Hat poholma welahenonen at ele uhuwon hol hahunteg ap pohon inowen Hat hubam heng habuhu ane hikit toho turuk laruhunmu ap kinangma werehon obog tohowen Hat hunuk onoluk toho wereg lit humalikisi Israel inap Hat fahet enekol toho wereg hag toho ir oho enekol toho welamuhup. It arimanowen o anden witikikon aru Hat hunuk wel haptuk ambeg wereg ulug inindi anggat toho welamuhup.

³⁴Haren humalikisi unubam ap seliyon unusik lahup ulug hiyag isaruk laruhunmu wilip amuhupteg o kema-kema wereg lit o pumbuk Haren mumal tarikinon men o anden Hat hunuk wel haptuk ibam witikikon aru fil hebeloho yet haruk lit Hat hubam sembahyang uruk lamuhup halug

³⁵Hat poholma welahenonen iren sembahyang uruk lit heng haptuk ane holtuk lit it inibil atuk laruhun.

³⁶Ap obog tohowen siyag ane eneg turuk angge re humalikisiyen Hat holohotman siyag ane turuk lamuhupmu Haren it unubahet holok toho wenggel haruk lit ap seliyon ininggikmu hik isaruk laruhunmu it arimano ininggik hele waroho ap seliyon wereg ambeg yatma horogma og eneptuk lamuhup.

³⁷Ininggik hele waroho welamuhup ambeg arimanowen inindi yuwag aruhumu niren Hat hele ying haptuk lit siyag ane eneg turukuk ulug hebeloho Hat hubam sembahyang uruk lamuhup.

³⁸Inindi men enebe obog tohowen Hat halukema wamuhupteg kinang nunumbasi og isarikinon men o pumbuk Haren mumal tarikinon men o Hat hunuk wel haptuk ibam witikikon aru fil yet haruk lit Hat hubam sembahyang uruk lamuhup halug

³⁹Hat poholma welahenonen iren sembahyang uruk lit heng habuhup ane holtuk lit let eneptuk laruhun. Iren siyag ane turukon Haren elehap turuk laruhun.

⁴⁰Nikni Allah, ap o tuwen Hat hubam sembahyang uruk lamuhubon arimano Haren kim isaruk lit iren heng haptuk lamuhubon holtuk laruhun.

⁴¹Allah NINIKNI, peti aru walug waharukmu Har oho in atug peti ino iraham lamihinteg kel taruk laruhun ambeg kik watmihin. Peti aru feneyen Hat hine inam atuk. Hamingmingangge imam arimanowen Haren ap windat enepmin peruk lahen ane hikit toho turuk lamag! Hat humalikisiyen Allahn fano ane nunubam tirisi ulug enehiyeg toho sini yunggultuk lamag!

⁴²Allah NINIKNI, Hat hamingmingangge Daud hindi reg lit sali ubam emberikinon wenggel haruk lit ap suwon Haren mumal tarikinon ino miyaloho hik isa fug!