Read Angguruk Yali 2 TAWARIKH 7 Bible Online

2 TAWARIKH 7 - Angguruk Yali bible

2 TAWARIKH 7

¹Hun Salomoen Allah fam sembahyang obog toho ibagma indok poholman pilabik watfareg wam hubu lahaptuk ambeg imbibahon ino men wam Allah olohotman naruk lit At fahet minggiroho umbul pibahon arimano men obog toho han nibag. Narukmu itano NINIKNI Allah At ibam o ele ke umbagpag turukmu o ino undamane seleg teg eneg latfag.

²O ino ele ke mondabi seleg teg latfagma imam arimano NINIKNI Allah ibam kuk fug teg latfag.

³Indok ino poholman pilabik waharukmu NINIKNI Allah umbagpag inowen At ibam saleg latfagma Israel inap arimanowen yet hibareg enelenggen fam hur atug onorohole han kinangma sahung atfareg NINIKNI Allah wel turuk lit, ”At ubabut fanowonen indi nenesugmen eneg wereg,” ulug sembahyang ibag.

⁴Sembahyang ibareg ap suwon Salomo men Israel inap obog toho arimanowen NINIKNI Allah olohotma wam nul ulug

⁵wam sapi teng-teng angge 22.000 men wam domba teng-teng angge 120.000 men waroho esetfag. Esetfareg Salomo ino men Israel inap obog toho menen Allah ibam ino sok husibag.

⁶Sok husibagma imam arimano hiyag isibag ambeg iniyabuk turuk lit weregma Lewi inap arimano oho pinggong NINIKNI Allah wel turukon ap suwon Daud inowen witfahon ininggikmu seneg lit hiyag isibag ambeg in arik libareg Dauren milal enepfag ane hikit toho NINIKNI Allah wel turuk lit, ”Aren indi nenesugmen eneg wereg,” urukmu imam arimanowen pinggong ele hum toho uruk angge watfag. Ari roho NINIKNI Allah wel turukmu Israel inaben holtul ulug unduhuk latfag.

⁷Allah fahet hubu lahaptuk ambeg Allah ibam alukema ine angge fam witfahon ino tot tehen wam anggolo esetuk ane wirim teg latfag fugmu Salomo inowen o ino owahalma ap luhal atuk ambeg pulmuwen wam indokma yaltukon men suburu men wam sei men Allahn let neneptisi ulug At fahet emberuk latfag. Ari roho turuk lit Salomo inowen owahalma ap luhal atuk ambeg ino Allahn ngi reg lamag ulug puhunap tibag.

⁸Allah ibam sok husibag sambil ino Salomo men Israel inap obog toho o Hamat larukon funggalma wereg inap famen tulug o Mesir hili-hilimu wereg inap kinang atogman atogma werehon obog toho palu atfag. Ap anggolo palu atfahon arimanowen nunumbasi lekma laruk lit o saboma nohorukmu Allahn fet enesug latfahon ino wel tul ulug enehiyeg toho yunggultukmen eneg hup sabirenam atfag.

⁹Ap arimanowen Allah ibam sok husibag sambil hubu tamon lahapfahon fahet enehiyehen hup sabirenam yunggultuk latfareg Yerusalem embeselug inibam la fug angge Allahn nunumbasi fet enesug latfag ane fahet oho hup sabirenam yunggultuk latfag. O likin angge Allah olohotma yunggultukon obog aha ulug ap obog toho palu atfag.

¹⁰Pikalem sabiron fam hup fuwap fimahen atfag sambil ino ap arimano palu atfagma Salomo inowen hinibam lalihip ulug hiyag isibagma inindi enehiyeg toho inibam wal taneg libag. Inibam laruk lit NINIKNI Allahn Daud men Salomo men umalikisi Israel ninap men nunubam fano ane anggolo tirisi ulug enehiyehen yunggultil laruk latfag.

¹¹Salomo inowen inggareg ibam men NINIKNI Allah ibam men indimuwen wiruhuk pibag ane obog toho fano wiri fibagma

¹²hubanggo NINIKNI Allah at olohotma ebenam atfag. Ebenam atfareg at ubam ele uruk lit, ”Haren An nubam sembahyang irikinon holtikikteg o haren witikinon aru An nubahet hubu lahaptuk ambeg ulug Anden nibamap taruk lahi.

¹³Anden osit poholman pilabik wam fug angge heren pambot fam kinang obog toho siyahap tuhup ulug hiyag isaruk lit ouk alem suwon An numalikisi sehelimu monde fik waruhuk halug

¹⁴An numalikisi Allah anggengge wereg ulug suwalehon arimano inindi apmayap taruk lit kalem hareyon laruk laheyon embeselug Allah orohole yami rik lul ulug An nubam sembahyang uruk lamuhup. Ari roho turuk lamuhup halug An poholma welahiyonen enele holtuk lit iren siyag ane turukon elehap turuk laruhukteg enengginang siyag atukon nin hebeloho fanowap turuk laruhuk.

¹⁵Ap o tu aruwen An nubam sembahyang uruk lamuhubon arimano Anden kim isaruk lit iren heng naptuk lamuhubon holtuk laruhuk.

¹⁶O haren witikinon aru An nunuk mondabi wel naptuk lamuhup ambeg ulug Anden nibamap taruk lahi. O aru An nindi pulmu werehen nilen kim haruk lit Anden forohoman eneg welaruhuk.

¹⁷Hat hikni Daud An nolohotma fano ane turuk latisi hag toho haren oho Anden mun ane man ane hiyag hutuk latikikon holtuk lit hunumbasi komo eneptik iyag ane haharoho imbibahon arimano hikit toho eneg turuk laruhun.

¹⁸Ari turuk laruhun halug hikni Daud fam Anden sali emberikikon hikit toho hat men humalikisi menen Israel inap fet enesugmen eneg welamuhuben Anden hinineyap heneptuk laruhuk angge famen

¹⁹hat humalikisi menen An henembol yig nutuk lit Anden komo henepmin ulug hiyag hisarikik ane embeselug ap winonen wel eneptuk angge hiren oho wel eneptuk lamuhup halug

²⁰Anden Israel hinap kinang og hisarik iyahon aru famen hik hisaruk lit o An nunuk wel naptuk lamuhup ulug nibamap tihi ibam aru oho ninggik kobog isahukmu o pumbuk obog tohowen o aru abug uruk lit inda yatuk lamuhup.

²¹O aru ketiya fano wirig angge famen halog toho lin uhumu ap o aru pisan isalug larukonen kim haruk lit enekolen homhombuk turuk lamuhup. Iren te, ’NINIKNI Allahn nungge fahet o pumbuk aru men At ibam tu men siyahap tirisi?’ uruk lamuhupmu

²²ap winonen it hiyag isaruk lit, ’INIKNI Allah unumbasiyen wel turuk latfahon inowen o Mesiren hondog eneplug wilip atfag angge famen enembol yig utuk lit ap winonen wel eneptuk angge fam ninikni uruk lit sembahyang uruk ane fahet NINIKNI Allahn alem siyahon tu it unubam emberisi,’ uruk lamuhup,” ulug Allahn Salomo hiyag itfag.