Read Angguruk Yali 2 TAWARIKH 8 Bible Online

2 TAWARIKH 8 - Angguruk Yali bible

2 TAWARIKH 8

¹Salomoen NINIKNI Allah ibam men at inggareg ibam men witukmen eneg mo ilig am wirig am turukmu likin fumahen 20 atfagma obog toho wiri fibag.

²Wiri fibareg Salomo inowen o pumbuk ap suwon Hiram inowen og itfahon arimano nin hebeloho wiri felug otsi Israel inap minggiroho winon o arimano welamuhup ulug hiyag isibagma yug toho welatfag.

³Weregma Salomoen o Hamat-Zoba tog abik libareg o ino ilmig tibag.

⁴Ilmig tibareg o pumbuk Tadmor lekma werehon elehet walinggoho ohowon suwap tibareg o pumbuk roti anggen foroho ambeg aren o Hamat kinangma witfahon arimano hebeloho wiri fibag.

⁵Wiri fibareg o Bet-Horon ik eleruk filon men ik ambut filon men walinggoho elehet aben pisan toho la fug tehon huk toho wibag.

⁶Wibareg o pumbuk Baalat men, o pumbuk roti anggen foroho ambeg men, o pumbuk otsi sehen senehon wam kudan lisoho walug laruk angge fam laruk inap inibam men wiri fibag. O arimano obog toho witil laruk lit hun Salomoen indimu wenggeltuk ane hikit toho kinang aren seneg latfahon atogman atogma o Yerusalem famen tulug tom Libanon fam o wiri fibag.

⁷O arimano wit numuhup ulug Salomoen Het inap, Amori inap, Feris inap, Hewi inap, Yebus inap Israel inap fuhon obog toho ininggik lisoho mingming eneptuk latfag.

⁸It unumbasi o Kanaan kinangma yug toho weregma Israel inap o Kanaan kinang fam kuruk lit Allahn hiyag isibag ane hikit toho obog toho elehap eneplep angge famen it obog toho unusuk fug teg latfagma iren ondohowonen ondohowon arimano Salomoen mingming eneptuk latfag. Ari hag toho ketiya oho Israel inap onowe fahet onggo eleg angge yabuk wit utuk.

⁹Ari turukmu Israel yug inap arimano Salomo inowen mingming enebuk fug angge sehen seneg inap, sehen senehon onowesi men, tog aptuk ane fahet wam kudan lisoho walug laruk angge laruk inap milal eneptukon men, wam kuda fam lahalug larukon onowesi men welamuhup ulug lahap eneptuk latfag.

¹⁰Hun Salomo fahet o yabuk wit utuk inap onowesi roho welamuhup ulug Israel kinang minggiroho seneg inaben onotsi enebe teng sohowen 250 in enepfag.

¹¹Weregma Salomoen indimu wenggel haruk lit indam nikni Israel inap onowe suwon Daud inowen ibam iraham e seng toho wirihon peti Wene Numen haharehon undama kilabeg angge ino foroho latfag ane ariyen o ino usa atfag angge re hiyap welam fug teg pibareg uhe Mesir inap onowe ahaloho ino humiya wit itfagma uhe ino o pumbuk Daud suwalfag ambeg embeselug ibam kibareg welatfag.

¹²O itano liyen tulug Salomoen NINIKNI Allah fahet hubu lahaptuk ambeg aren Allah ibam olohotma witfahon fam hundig-hundig wam waroho hubu lahaptuk latfag.

¹³Hubu lahaptuk ane ari Musan ibag ane hikit toho o sabir angge men, pikalem keron inam atuk sambil men, mo eke fam eke fam hinahanam Israel inap obog toho Allah wel tul ulug palu arik waharuk lit suburu roti suwap turuk angge ragi embeselug wiratukon eneg naruk li oho, roti anggen obog toho paltuk li oho, lekman o sabo wiroho nohil laruk latfag ane fahet wenggel haruk li oho Salomo inowen Allah fahet hubu lahaptuk latfag.

¹⁴Nin ikni Daud inowen kong toho imbibag ane hikit toho Salomo inowen Allah amingmingangge imam men Lewi inap men wal tanehen iniyabuk man-man turuk lamuhup ulug hiyag isibag. Hiyag isaruk lit likiya hupmu tuk ane hikit toho Lewi inaben imam arimano let eneptuk lit Allah sini fam wel turuk lamuhup ulug imbibag. Emberuk lit ikni Daud Allah amingmingangge inowen kong toho imbibahon hikit toho Allah ibam sok foroho inap palu wal tanehen sok misig-misig foroho lamuhup ulug hiyag isibag.

¹⁵Hiyag isibagma imam arimano men Lewi inap menen ap suwonen ibag ane ari obog toho il misig oho umbusuk fug angge turuk lit Allah ibam fano-fano angge emberuk latfahon arimano oho fano roho foroho latfag.

¹⁶Ari turukmu Salomoen NINIKNI Allah ibam wiruhuk pibag ane ino olun waruk ane ak tibag sambilen tulug obog toho wiri fibag sambil obog toho hikir atfag.

¹⁷Allah ibam wiri fibareg Salomo ino o Ezion-Geber men Edom kinang fam ik Longgop ayegma o Elot libag.

¹⁸Libareg weregma ap suwon Hiram inowen otsi ik ahum pali ke laruk ane onolukon kou fam o Elot lahup ulug mon enepfagma Salomo otsi men ambiyeg laruk latfag. Ambiyeg laruk lit kou Hiramen tohon fam ik ahum pali keyen o Ofir kinangma libareg suhuloho waharuk lit umbagpag turuk angge emas anggin anggolo 15.000 kilogram walug Salomo ambeg watfag.