Read Angguruk Yali 2 TAWARIKH 9 Bible Online

2 TAWARIKH 9 - Angguruk Yali bible

2 TAWARIKH 9

¹Hiyap suwon o Syeba kinang seneg latfahon inowen hol harukmen ap obog tohowen Salomo wel turukmu hol hibareg mun ane man ane oluk teg ano ulug wal hamin ulug Salomo ambeg watfag. Hiyap ino otsiyet luhaloho o Yerusalem waharuk lit amben fano angge men ili ruruk angge emas anggolo men ilembani umbagpag turukon men wam unta fam imbik lahibareg walug watfag. Salomo ambeg walug watfareg wal hamin ulug indimuwen wenggel hibag ane obog toho Salomo kapal hibag.

²Kapal hibagma Salomo inowen hiyap ino hebeloho hiyag um fug tohon wereg elehen il misig umbusuk fug angge seleg tohon eneg tintiloho hiyag itfag.

³Salomo indi anggat teg lit hiyag itfag ane men, o suwon Salomoen witfahon ino men,

⁴ik suburu aren narukon men, otsi ik hinang utukon men, Salomo otsi nohoruk ambeg men, iniyabuk wituk ane men, enesum wan turukon men, Allah ibamen wam yaltuk ane men obog toho arimano yet hibareg yihi uruk lit sat fo ibag.

⁵Sat fo ibareg hiyap suwon inowen Salomo fam ele uruk lit, ”Hat hindi anggat teg lit mun ane man ane turuk lahen ane fahet an nibamen holtikikteg

⁶enele si ane uruk perikik angge famen an nebe hambeg waharikikteg nilen yet haruk lit eneg tem toho urusa peruk lahi. Tam hat hindi anggat toho wenggel haruk lahen ane fahet we tor angge hiyag nutusama holtikikteg ketiya anden hat yet hiyarukmen mun ane man ane holuk teg lit alem obog toho fahet hindimu fano roho wenggeltuk lahen.

⁷Hat hotsi men hamingmingangge likiya hupmu hat hiraham werehon aruman hat hindi anggat teg lit uruk lahen ane hol haruken inindi enehiyeg toho wereg.

⁸HIKNI Allahn hat indi hasug lit Anden fano peruk lahi ane hikit toho Israel inap fet enesug laruhun ulug lahap haptisiyon ino wel turuk lahi. Hikni Allahn Israel inap mondabi welamuhup ulug indi enesug lit mun ane man ane alem fano roho haltuk laruhun ulug hat ap suwon humbaharisi,” ulug hiyag itfag.

⁹Hiyag itfareg hiyap suwon inowen ili ruruk angge emas teng-teng angge 4.000 kilogram men amben fano angge anggolo men ilembani umbagpag turuk angge arimano men Salomo og itfag. Amben fano angge og itfahon hag toho fobik eke ap misihen oho o Israel walug watfag fug.

¹⁰Hun Hiram otsi men Salomo otsi men ik ahum pali keyen o Ofir kinangma libareg ili ruruk angge emas men e fanowon anggolo men ilembani umbagpag turukon men Salomo ambeg walug watfag.

¹¹Salomo inowen e fanowon walug watfahon arimano fam inggareg ibam men Allah ibam men fahet yal hilingguruk lit sini yunggultuk inap fahet pinggong men waruk men wiri fibag. E fanowon walug watfahon ari hahon tam o Israel kinangma walug watfag fugmu ketiya eneg walug watfag.

¹²Ap suwon Salomo inowen hiyap inowen og nitisiyon fahet ayeg waroho og itmin pibag angge hiyap suwon Syeba kinang senehon og itfareg nin eke sebe roho hiyap inowen heng ibag ane hikit toho og itfagma hiyap suwon ino otsi men ambiyeg inibam suhuloho libag.

¹³Mo eke fam eke fam ili ruruk angge emas Salomo ambeg walug waharuk latfahon arimano anggin wirim turukon anggin anggolo roho teng-teng angge 23.000 kilogram wirim turuk latfag.

¹⁴Nin eke ayeg waroho hilaruk inaben emas og utuk latfag. Onggo paloho hilaruk inap men ap suwon o Arab kinang senehon men Israel inap onowesi menen oho hundig-hundig ap suwon ili ruruk angge emas men perak men og utuk lamuhup ulug hiyag isibag ane roho anggolo imbik waharuk latfag.

¹⁵Salomo inowen sing suwon teng likinen 200 ili ruruk angge emas fam wiri fibag. Emas fam witfahon arimano wal taneg anggin kilogram wirim tibahon sabit fam atfag.

¹⁶Nin toron eke emas fam witfahon arimano teng nanggoloben 300 witfag. Toron witfahon arimano anggin wirim tibahon hinahan fam atfag. Witfahon arimano obog toho Salomo inowen o unuk Libanon Ohi suwalfag ibam imbik kibag.

¹⁷Nin eke Salomo inowen ap suwon hur atuk angge yaron eke wiri fibareg melei men ili ruruk angge emas mondabi fanowon men fam lombog toho witfag.

¹⁸Witfareg yal il falfaliken witil lahibareg hur atuk angge ino palimu imbik lahibag. Hur atuk angge ino apma uyug ahongge emas fam wirihon eke ahandip tibibag. Inggik sabit timi roho hur atuk ambeg fumag-fumag witfahon iraham olomene hag toho piren wiroho unduhuk fibag.

¹⁹Yal il falfaliken witfahon itano fumag-fumag olomene hag toho nisanggowen wiroho unduhuk fibag. Ap suwon hur atuk angge Salomo inowen witfahon ino hag toho o kema-kema ap suwon wereg ambeg oho wereg eleg.

²⁰Kubag ik naruk angge Salomo inowen tohon obog toho men o unuk Libanon Ohi suwalfag ibam foroho latfag angge arimano obog toho men emas mondabi fanowon fam wiri fibag. Salomo welatfag li itano aben fano angge perak fahet siyag ulug wibag fugmu perak fam witfahon eke welatfag fug.

²¹Sidon inap onowe Hiram otsi arimano kou humon Salomo inowen tohon fam ik ahum pali ke o Tarsis laruk lit mo hinahan fam misihim emas men perak men melei men pak su hahon men suwe puwali men walug waharuk latfag.

²²Ap suwon Salomo ino indi anggat teg lit inggikmu anggengge anggolo werehen ap suwon winon kinangma werehon obog toho men wirim teg latfag fug.

²³Ap suwon atogman atogma welatfahon obog toho arimanowen Salomo ino Allahn indi anggarap turukmu ele fano roho uruk ane hol hahuken ambeg lahuk peruk latfag.

²⁴Ap suwon arimano mo eke fam eke fam Salomo ambeg waharuk lit enebe wal tanehen perak emas fam witfag angge men sum men sehen men amben fano angge men wam kuda men keledai men Salomo onggo og utuk latfag.

²⁵Salomoen wam kuda tog aptuk ane fahet kereta lisoho walug larukon teng obog sehelet obog 4.000 foroho lit otsi sehen senehon wam kuda fam lahalug larukon teng-teng angge 12.000 sen enesug latfag. It winon unubam o pumbuk kereta arimano foroho ambeg wal taneg welamuhup ulug hiyag isibareg winon unubam an horogma o Yerusalem welamuhup ulug hiyag isibag.

²⁶Salomoen ik Efrat famen tulug Filistin inap enengginang keyen Mesir kinang hilihilimu o wal taneg ap suwon welatfag ambeg obog toho seneg latfag.

²⁷At ap suwon welatfag li itano o Yerusalem ili ruruk angge perak arimano helep ik pilikmu mondeg hag toho mondeg latfag. E sahi ineyon tom Libanon famen walug watfahon oho farema e anggolo wereg hag toho mondeg latfag.

²⁸Ap suwon otsi arimanowen onowe Salomo fahet wam kuda o Mesir men o pumbuk winamon anggolo men onggo paloho wak laruk latfag.

²⁹Salomo oluk wereg lit turuk latfag ane tuma tor angge haharoho emberuk lahe. Salomoen ak tibag sambilen tulug obog-obogma turuk latfahon oho Allah amingmingangge nabi Natan men o Silo ahun nabi Ahia men hun Nebat amloho Yerobeam fam fulu roho yet halug hiyag utuk latfag ahun Ido menen suwesingga wal taneg haharoho imbibag.

³⁰Salomo ino o Yerusalem wereg lit Israel inap obog toho fet enesugmen eneg mo teng misigmen nubam hilag nuwalen 40 atfagma

³¹Salomo war atfag. War atfagma o pumbuk unuk Daud Ibam kinangma sale fisibag. Sale fisibagma amloho Rehabeam ikni ubalma ap suwon lahapfag.